பொல்லாதவன் - விமர்சனம் அல்ல

பாடல்கள் குறித்து:
நீண்ட நாள்களாகவே நினைத்துக்கொண்டிருப்பதுதான், ஒரு படத்தில் நான்கைந்து பாடலாசிரியர்கள் பாடல்கள் எழுதியிருக்கையில் பெயர் காட்டும்போதே யார் எந்தப் பாடலை எழுதியது என்று அதிகப்படியான விவரத்தை ஏன் திரை உலகோர் தருவதில்லை. அடிமைப்பெண், காதல் ஓவியம் இந்த இரண்டு படங்களில் அப்படிப் பார்த்தது சட்டென நினைவிற்கு வருகிறது. இன்னும் சில படங்களில் இருந்திருக்கலாம். ஒருவேளை இன்றைய பொல்லாதவனிலும் அப்படி அவர்கள் ஏதாவது விவரம் காட்டி நான் பார்க்கத் தவறிவிட்டேனோ என்றும் நினைக்கத் தோன்றுகிறது.

இது என்ன உத்தியோ? ஒலிநாடாவை வாங்கிப் பார்த்துக்கொள் என்கிறார்களோ? சில படங்களில் ஒலிநாடாவின் அட்டையிலும் கவிஞர்களின் பெயரைப் போடுவதில்லை. அப்படி என்னதான் திரைக்கவிஞர்களின் பாடல்களை அடையாளம் காட்டுவதில் இவர்களுக்குத் தயக்கம் என்பது விளங்கவில்லை. ஒலிப்பேழையை இன்னும் வாங்காததால், இணையத்தில் ம்யூசிக் இண்டியா ஆன்லைனைப் பிடித்து பாடல்களின் கவிஞர்கள் யார் யார் என்பதைப் பார்க்கவேண்டியதாக இருக்கிறது.

1.
எங்கேயும் எப்போதும் பாடலின் மறுகலவைக்குத் தேவைப்பட்ட வரிகளை யுகபாரதி எழுதியிருக்கிறார்.

2.
அலிபாபா தங்கம்
யாரும் உரசாத அங்கம் - களியாட்டப் பாடலுக்கும் யுகபாரதிதான் கவிஞர்.

டேனியல் பாலாஜி திரையில் இருந்தாலே இப்படியான பாடலும் இருக்க்வேண்டுமோ.
இன்று (23.11.07) சன் ம்யூசிக்கில் டேனியல் பாலாஜி வந்திருந்தார். வழமையான 'நான் உங்க ஃபேன் சார்' சமாசாரங்கள்தான்.

3.
மின்னல் கூத்தாடும் - நா.முத்துகுமார்.

புதுபேட்டை நிழலுகப்பாடல் (கமல் பாடியது) பலருக்கு நினைவிருக்கலாம், இவர்தானே கவிஞர். பார்த்தாலே பரவசத்தின் 'முத்தத்தால் வன்முறை செய்வாயா' நான் ரசித்த வரிகளுள் ஒன்று. நா.மு.தான் கவிஞர். தற்போதைய கற்றது தமிழில் 'வலிக்கும்போதுதான் தெரிகிறது உயிரோடிருக்கிறேன் என்பது; விழிக்கும்போதுதான் தெரிகிறது நீ அருகில் இல்லை என்பது' வரிகள் கொஞ்சம் மாறியிருக்கலாம். நா.மு.வேதான்.

4.
படிச்சுப் பாத்தேன் ஏறல
குடிச்சுப் பாத்தேன் ஏறிடுச்சு
சிரிச்சுப் பாத்தேன் சிக்கல
மொறச்சுப் பாத்தேன் சிக்கிக்கிச்சு - கபிலன்.

குத்துப்பாடல்களின் வித்தகராகிவிட்டார். அய்யாவிடம் நாம் எதிர்பார்ப்பது இன்னொரு 'உப்பா சர்க்கரையா'வை.

5.
முத்தம் வேண்டும்
மோகம் தீருமா (தணியுமா?)

அடுத்த வரியை எழுத இயலவில்லை - வைரமுத்துவின் வரிகளில் சிருங்கார ரசம் அதிகம். சிருங்காரம் எழுதுவது தவறென்று கவிப்பேரசிற்குச் சொல்லும் அளவிற்கு நான் வளர்ந்தவனோ அறிந்தவனோ அல்லன். வாலியவர்களின் 'நான் காசுக்கும் மாஸுக்கும் எழுகிறேன்' என்ற வரிகளில் அனைத்து திரைக்கவிஞர்களும் அடக்கம். நாளை எங்கேனும் ஆயிரத்தில் ஒன்றாக ஒரு வாய்ப்பு கிடைத்து நான் எழுதினேன்றாலும் இயக்குனர் சொல்வதைச் செய்து போவதைத் தவிர வேறு வழியில்லை. வெளியில் இருந்து வலைப்பூவில் சுட்டிக்கொண்டிருக்கலாம், உள்ளிருக்கும் கவிஞர்களே அழுத்தத்தினை அறிவார்கள். எனினும், அய்யாவின் உயரத்திற்கு 'எச்சில்' போன்ற வார்த்தைகளெல்லாம் தேவையில்லையென்பது எனது தாழ்மையான கருத்து.

சண்டைக் காட்சிகள் குறித்து:
எங்கேயும்ம்ம்ம் எப்போதும்ம்ம்ம் அதிகம் பேசப்படாத ஆசாமிகள் இவர்கள், சண்டைப் பயிற்சியாளர்கள்.

படத்தில் ரயிலடி வாரவதியின்மேல் கழுத்தை வெட்டிச் சாய்க்கும் காட்சியில் பாதி உடல் உள்ளும், பாதி வெளியுமாக தொங்கிய சண்டைக்கலைஞரை இயக்கியது யார்? அந்த அதிரடி தானியோட்டக் (ஆட்டோ) காட்சிகளெல்லாம் இவரது மேற்பார்வையில்தானே. வண்டியோட்டும்போது வீசப்படும் அரிவாளை ஓட்டிய நிலையிலிருந்தே மல்லாந்து தவிர்த்து வாகனத்திலிருந்து வீழ்ந்த தனுஷின் போலியை (டூப்) இயக்கியவர் இவர்தானே.

இந்தப் படத்தின் சண்டைப் பயிற்சியாளர் ராம்போ ராஜ்குமார் எனப் பார்த்த நினைவு (நாளை ஏ.வி.எம்.ராஜேஸ்வரி வழியாகப் போகும்போது உறுதி செய்துகொள்வேன்). இவரில்லாமல் இந்தப் படமில்லை. சிறிய இடைவெளிக்குப் பிறகு இயல்பான சண்டைக் காட்சிகளைப் பார்க்க முடிகிறது. அதென்ன அது இயல்பான சண்டைக் காட்சி என வினவலாம். தேவர் மகனில் கமல் - நாசர் சண்டைக் காட்சிகளைப் போல் இருந்தால் அது 'இயல்பான' என்பது எனது பார்வை.

கடைசி சண்டைக் காட்சியில் கதாநாயகனை தோரணையில் உயர்த்த வேண்டிய அவசியத்தில் கொஞ்சம் சமாதானப்படுத்திக்கொண்டுள்ளார். அதைத் தவிர்த்து மற்றவை அருமை. குறிப்பாக நெடுஞ்சாலையில் கிஷோர் - டேனியல் பாலாஜி - குழுவினர் போடும் சண்டை, அதில் கிஷோர் அரிவாள் வீசி இங்கும் அங்குமாக நகர்ந்து எதிரிகள் ஒருமித்துவிடாமல் பிரிக்கும் காட்சியை ரசித்தேன்.

'பரிந்தா'வில் ஜாக்கி ஷ்ரோஃபின் சண்டையில் நொடிக்கு ஒருவனை வீழ்த்தி உச்சிக்குச் சென்று எதிரியை நோக்கும் காட்சியை ரசித்தேன்.

'டான்'னில் ஷாருக்கான் சங்கி பாண்டேயை வீழ்த்தும் காட்சி பிடிக்கும்.

'ட்ராய்'யில் ப்ராட் பிட்டின் பக்கவாட்டுத் துள்ளலும் வாள் வீச்சும் பரவசப்படுத்தியிருக்கின்றன.

இவற்றுடன் இப்போது பொல்லாதவனில் கிஷோரின் சண்டைக் காட்சியையும் சேர்த்துக்கொள்கிறேன் [கவனிக்க தனுஷின் சண்டைக் காட்சி எதையும் நான் எனது ரசனைக்குத் தேர்ந்தெடுக்கவில்லை].

தனுஷின் சண்டைக் காட்சிகளில் முன்னேற்றம் தெரிகிறது. அவரது, புதுக்கோட்டையிலிருந்து சரவணன் சண்டைக் காட்சிகள் எனக்கு சிறிதும் பிடிக்காமற்போனது. இதில் அப்படியல்ல. தனுஷ் சண்டைக் காட்சிகளிலும் முன்னேறியிருக்கிறார். தனுஷ் - டேனியல் பாலாஜி மோதும் கடைசி சண்டைக் காட்சி தனுஷ் ரசிகர்களுக்கு விருந்து. அதிலும், வடசென்னை வட்டாரங்களில் பிரபலமான 'நாக் அவுட்' வீச்சை [கீழ்த்தாடையின் கீழ்ப்புறத்தில் மேல்நோக்கிக் குத்துவது] குறுநகர்வில் (ஸ்லோ மோஷன்) படம் பிடித்திருக்கும் விதம் நிச்சயமான விருந்து.

கதையும் மற்ற விவரங்களையும்தான் லக்கிலுக்கும் சில நண்பர்களும் சொல்லிவிட்டார்களே.

ம்ம்ம்... விடுபட்ட செய்தி ஒன்று சொல்கிறேன், படத்தில் இளைஞர்களுக்குப் பிடித்தமான பல்சர் வண்டியும் நடித்திருக்கிறது.

அன்புடன்
ஆசாத்