எண்ணம்

டான் - பழசும் புதுசும் சலீம் ஜாவீத் (சலீம் கான், ஜாவீத் அக்தர்), இந்தித் திரையில் என்றைக்கும் பேசப்படும் சில படங்களுக்கு கதை, திரைக்கதை, வசனம் எழுதிய இரட்டையர். உதாரணத்திற்கு ஷோலே, மஜ்பூர் (நான் வாழவைப்பேன்). இருவரின் வாரிசுகளும் வடக்கே திரைத் தொடர்புள்ள, ஆனால், வெவ்வேறான துறைகளில் கால் பதித்தார்கள். சலீம் கானின் மகன் சல்மான் கான் நடிகராகவும், ஜாவீத் அக்தரின் மகன் ஃபர்ஹான் அக்தர் இயக்குனராகவும் உருவானார்கள். சமீபத்தில் வெளியாகியிருக்கும் டான் படத்தில் மகனின் (ஃபர்ஹான் அக்தர்) இயக்கத்திற்கு அப்பா (ஜாவீத் அக்தர்) பாடல்கள் எழுதியிருக்கிறார். மிகவும் எதிர்பார்க்கப்பட்ட படங்களுள் ஒன்றாகிப்போனது இந்த டான் . காரணம், இருபத்தெட்டு ஆண்டுகளுக்கு முன்னர் அமிதாப் நடித்து வெளியாகி சக்கைப்போடு போட்ட படத்தை, ஷாருக்கை வைத்து மீண்டும் உருவாக்கியது. அமிதாபைப் பார்த்த அலைவரிசையை முன்வைத்து ஷாருக்கைப் பார்க்கக்கூடாது. பழைய டான் வேறு ரசிகர்களுக்காக எடுக்கப்பட்டது, புதிய டான் வேறு ரசிகர்களுக்காக எடுக்கப்பட்டது. கதையமைப்பு, உத்திகள், அரங்கங்களில் ஒலியமைப்பு, வெளிநாட்டுப் படப்பிடிப்பு, டிஜிட்டல் அச்செடுப்பு...

பெருநாள் தொழுகையும் மழைநீரும் நான் குடியிருக்கும் பகுதியிலிருக்கும் பள்ளிவாசல் அத்தனை பெரிதன்று. குன்றத்தூர் சாலைக்கு வந்து மாங்காடு செல்வதென்றால் எந்தச் சாலையில் திரும்புவீர்களோ அதில் நூறுமீட்டர் சென்றதும் இடப்புறமாக இருக்கும் சிறிய கட்டடம்தான் எங்கள் ஜமாத்தின் பள்ளிவாசல். தோராயமாக நூறு நபர்கள் வரையில் நெரிசலில்லாமல் தொழலாம். அதற்கு மேலென்றால் மொட்டைமாடிக்குதான் செல்லவேண்டும். பெருநாளன்று அதிகமாகக் கூட்டம் கூடுமென்பதால் மாடியில் பந்தல் போட்டு கோரைப்பாய்களை அடுக்கி வைத்திருந்திருக்கிறார்கள். நேற்று பெய்த மழையில் பாய்களெல்லாம் ஈரமாகி, மாடி முழுதும் நீர் தேங்கிக் கிடந்தது. சமமான தரையாக பூசப்படாததால் தண்ணீர் ஓட வழியில்லாமல் அங்கங்கே சிறிதுசிறிதாக தேங்கிக் கிடந்தது. காலையில் யாரையாவது ஏற்பாடு செய்து தளத்தைச் சுத்தப்படுத்தியிருக்கலாம், எப்படியோ தவறவிட்டுவிட்டார்கள், தாமதமாகத்தான் ஒரு நபரை ஏற்பாடு செய்திருக்கிறார்கள். கூட்டம் அதிகமாவதை உணர்ந்ததும் மாடிக்குச் சென்றேன். மாடியில் இரண்டாவது ஆளாக நான் சென்றிருக்கிறேன். தண்ணீரைத் துடைக்க வந்த நபர் தென்னந்துடைப்பத்தால் நீரைத் தள்ளிக்கொண்டிருந்தார்....

தோற்றம்: 24.7.1953 மறைவு: 19.10.2006 புற்றுநோய் காரணமாக மருத்துவமனையில் சிகிச்சை பெற்றுவந்த ஸ்ரீவித்யா அவர்கள் இன்று மரணமடைந்தார் (தகவல்: சன் செய்திகளில் ஃப்ளாஷ் ந்யூஸ், தி ஹிண்டு). 77-78இல் மதுர கீதம் திரைப்படத்தில் நடித்ததற்காக இவர் சிறந்த நடிகை (சிறப்பு விருது) விருதினைப் பெற்றார் என தி ஹிண்டு செய்திக்குறிப்பு சொல்கிறது. ஸ்ரீவித்யாவின் தாயார் பிரபல பாடகி எம்.எல்.வசந்த குமாரி (ஆடாத மனமும் உண்டோ - படம்: மன்னாதி மன்னன்) என்பதை பலர் அறிவார்கள். தந்தையார் 'விகடம்' கிருஷ்ணமூர்த்தி (தகவல்: தி ஹிண்டு). எம்.ஆர்.பி. - எம்.ஆர்.பைரவி (அபூர்வ ராகங்கள்) . ஸ்ரீவித்யாவின் பெயரை எங்கு படித்தாலும், அவர் படங்களில் தோன்றும் காட்சியைப் பார்த்தாலும், ஒரு வினாடிக்காவது எம்.ஆர்.பி. என்னும் அந்தப் பாத்திரம் நினைவில் தோன்றி மறையும். 'ஏழு ஸ்வரங்களுக்குள் எத்தனை பாடல்' (வாணி ஜெயராம்). திரையிலும் அதனை உயிரோட்டமுள்ள பாடலாக மாற்றியதன் பெருமையை இயக்குனருடன் சேர்ந்து ஸ்ரீவித்யாவும் பங்கு போட்டுக்கொள்வார். அந்தப் படத்தில் ஸ்ரீவித்யா கமலஹாசனுடன் பலப்பரீட்சை (ஆர்ம் ரெஸ்லிங்) செய்யும் காட்சி சென்னையின...

முதன்முறையாக வாக்களித்தேன் தேர்தல் நாளில் விடுமுறையில் சென்னையில் இருப்பது இதுவே முதன்முறை. அதனால், தேர்தலில் வாக்களிப்பதும் இதுவே முதன்முறை. கள்ளவாக்கு, வாக்குச்சாவடி குழப்பங்கள், பிரச்சனைகள் இவை குறித்து நேற்று திருவல்லிக்கேணி நண்பர்களுடன் நீண்டநேர அரட்டையில் (அலசலில்) ஈடுபட்டும் அது குறித்து எந்தவிதமான முன்முடிவும் எடுக்காமல், காலை ஏழு மணிக்கெல்லாம் துணவியாருடன் வாக்குச்சாவடிக்குச் சென்றுவிட்டேன். வாக்குச்சாவடிக்குச் செல்லும் பொதுமக்களுக்காக களப்பணியாளர்கள் செய்யும் சேவையைப் பாராட்டியே தீரவேண்டும். கட்சிப்பாகுபாடின்றி இந்தப் பாராட்டு அனைத்து கட்சிகளின் களப்பணியாளர்களுக்கும் உரித்தாகும். வாக்காளர் பட்டியலிலிருந்து நமது வரிசை எண், வார்டு எண், வாக்குச் சாவடி எண், பாகம் எண் போன்ற எல்லா விவரங்களையும் அச்சடித்த படிவங்களில் நிரப்பி இரண்டுமூன்று நாள்களுக்கு முன்னரே வீடு வாரியாக விநியோகித்துவிடுகிறார்கள். அந்த அச்சடித்த படிவத்தின் இடப்பக்கத்தில் அவர்களது கட்சியின் சின்னம் இருக்கும் என்பது வேறு விஷயம். வாக்களிக்கப்போகையில் இடப்பக்கமிருக்கும் அவர்களது கட்சிச் சின்னத்தைக் கிழித்துவிட்டு சீட்டை ...

கூண்டுக்கிளி (1954) நடிப்பு: எம்.ஜி.ராமச்சந்தர் (இப்படித்தான் எழுதியிருக்கிறார்கள்), சிவாஜி கணேசன், பி.எஸ்.சரோஜா இசை: கே.வி.மகாதேவன் திரைக்கதை, வசனம்: விந்தன் இயக்கம்: ராமண்ணா எம்.ஜி.ஆர். - சிவாஜி இணைந்து நடித்த ஒரே திரைப்படம் என்பதைத் தவிர வேறு எதற்காகவும் ஏன் இந்தப் படம் குறிப்பிடப்படுவதில்லை என்பதை நினைத்து வியப்பாக இருக்கிறது. கடைசிக் காட்சியில் கதாநாயகியின் மீது பாலியல் வன்முறையில் இறங்கும்போது வில்லனின் கண்களை மின்னல் தாக்கி அவன் குருடாகிப் போகின்ற திரை மசாலாவைத் தவிர்த்துப் பார்த்தால், ஐம்பதுகளின் சாயலுக்கு இப்படம் மாறுபட்ட கதையமைப்பு கொண்டதாகவே தோன்றுகிறது. ஐம்பதுகளின் சாயல் என்று இங்கே குறிப்பிடுவது மந்திரி குமாரி, மர்மயோகி, மலைக்கள்ளன் வகையறாக்களை. பராசக்தியின் பாதிப்போ என்னவோ தெரியாது, 'வந்தாரை வாழவைக்கும் தமிழ்நாடே' யின் மறுபதிப்பாகத்தான் படத்தின் ஆரம்ப வசனம் ஒலிக்கிறது. 'காதலையும் வீரத்தையும் இருகண்களெனப் போற்றி வளர்த்த என் கன்னித் தமிழ்நாடே, நீ காதல் கொண்ட நெஞ்சுக்கு நஞ்சூட்டும் வஞ்சகியாக எப்போது மாறினாய்?' தற்கொலை முயற்சிக்கு முன்னால் இப்படிப் பக்கம் ப...