வணிக இலச்சுத் தூதுவர்கள் (brand ambassadors)

வடக்கிற்கு காஜோல், தெற்கிற்கு திரிஷா என மிகத் தெளிவாக சந்தையைப் பிரித்துக்கொண்டு, அவர்கள் இருவரையும் தமது வணிக இலச்சின் தூதர்களாக்கிய டாடா இண்டிகாமைப் போலவே, சமீபத்திய வோடோஃபோனும் சந்தை விளம்பரத்தை (வணிக இலச்சு தூதர்களை) வடக்கு தெற்காக பிரித்துக்கொண்டது. வடக்கே இர்ஃபான் கான், தெற்கே பிரகாஷ் ராஜ்.

இந்த வடக்கு தெற்கு விவகாரத்திற்கே ஆளாகாமல் அகில இந்திய அளவில் ஷாருக்கானிற்கு இருக்கும் பிரபலத்தின்மேல் அபார நம்பிக்கை வைத்து தமிழ் டப்பிங் குரலுடன் ஷாருக் தென்னகத்தில் ஏர்டெல்லை சந்தைப்படுத்துகிறார்.

திரைப்படம் வெளிவருவதற்கு முன்னர் விமர்சனங்கள் வருவதைப்போல ஏர்செல்லின் இந்த விளம்பரம் வெளிவருவதற்கு முன்னரே சூர்யாவின் விதவிதமான ஒப்பனைகள் குறித்த கருத்துகள் வெளிவந்தன.

இந்த பரபரப்பு எதிலும் கலந்துகொள்ளாமல் பி.எஸ்.என்.எல். தங்களை பிரீத்தி ஸின்தாவை முன்னிறுத்தி அடையாளம் காட்டிக்கொள்கிறார்கள்.

இப்படி அனைத்து தொலைதொடர்பு சேவையரும் யாரேனும் ஒரு பிரபலத்தை தங்கள் வ.இ.தூதராக முன்னிறுத்தி செயல்படுவதால் மட்டுமே அவர்களது சந்தைப் பங்களிப்பு தேவைப்படும் விகிதத்தில் இருப்பதில்லை. விளம்பரமும் வ.இ.தூதர்களும் குறிப்பிட்ட தயாரிப்பின் தன்மையையும், இருப்பையும் வாடிக்கையாளர்களுக்கு அறிவிப்பவை. இந்த அறிவிப்பைத் தொடர்ந்து வரும் வாடிக்கையாளர்க்கு சரியான சேவை அளிப்பதன் மூலமே அடுத்த கட்ட வெற்றி. வாடிக்கையாளரை அழைத்து வரவே வ.இ.தூதர்.

சாமானியர்களால் எளிதில் அணுகக்கூடிய பொருள்களை பிரபலங்களை முன்னிறுத்தி சந்தைப்படுத்துவதற்கு மட்டுமே இது பொருந்தும். சாமானியர்கள் உபயோகிக்காத பொருள்களும் பிரபலங்களை முன்னிறுத்துவது பொருளின் தனித்தன்மைக்குதான், ஏனெனில் அந்த மேல்தட்டுச் சந்தைக்கு இந்த விளம்பரங்களைப் பார்ப்பதற்கு நேரமில்லை.

உதாரணாமாக, TAG HEUER கைக்கடிகாரங்கள். குறைந்தபட்ச விலையாக லட்சம் பெறுமானமுள்ள கைக்கடிகாரத்தை வாங்கும் தகுதியுள்ளோர் நடிகரைப் பார்த்து கைக்கடிகாரம் வாங்குவாரென்பது ஏரணமாக (லாஜிக்) இல்லை. TAG HEUERஇன் வ.இ.தூதராக வரும் ஷாருக்கையோ (இந்தியா), டைகர்வுட்ஸையோ (பன்னாட்டு) வசீகரமானவர்கள் அல்ல என்று சொல்லவில்லை. அத்தனை விலையுள்ள கைக்கடிகாரங்களை வாங்கும் தகுதியுள்ளோர் வ.இ.தூதர்களால் ஈர்க்கப்பட வாய்ப்புகள் குறைவு.

அற்புதமாக நடனம் ஆடக்கூடிய ஹ்ரித்திக், சோனி எரிக்சன் செல்பேசியின் 'வாக்மேன்' வசதியைக் காட்ட நடனமாடி வ.இ.தூதராக இருப்பதை ஏற்றுக்கொள்ளும் மனம், அவரே மடிக்கணினிக்கும் வந்து விசிலடிப்பது சொல்வது அவதிப்படுத்துகிறது.

ஆட்டமே ஆடாமல் தலையசைத்து அபிஷேக் பச்சன் மோட்டொரொல்லாவின் வ.இ.தூதராக இருப்பினும் சமீபகாலமாக அந்த விளம்பரங்களை தெற்கே காணமுடிவதில்லை.

நம்மவர் மாதவனும் யூனிவர்செல்லின் விளம்பரத்தில் வந்தாலும் அனைத்து தயாரிப்புகளும் விற்கப்படும் கடையின் விளம்பரத்தில் நடித்திருக்கும் அவரை யூனிவர்செல்லின் வ.இ.தூதர் எனச் சொல்வதில் எனக்குக் கருத்து வேறுபாடு உண்டு (இந்துவின் கட்டுரையில் மாதவனை யூனிவர்செல்லின் ப்ராண்ட் அம்பாசிடராக அடையாளப்படுத்திய படம் பார்த்த நினைவு).

இன்னொரு பக்கத்தில் திரைப் பிரபலங்கள் பெப்ஸி, கோக், மிரிண்டா, சார்பெட் குடிப்பதுபோல் சானியா மிர்சா ஸ்ப்ரைட் குடிக்கிறார். யஹீ ஹை ரைட் சாய்ஸ் பேபெ ரிமோ ஃப்ர்னாண்டஸ் குடித்து வரிசையாக கிரிக்கெட் வீரர்களும் குடிக்கையில், தாகம் டென்னிசுக்கும் தொற்றியதில் வியப்பில்லை. இருப்பினும் கிரிக்கெட் அல்லாத இன்னொரு விளையாட்டுத் துறையில் இருப்பவர் வ.இ.தூதராக வந்ததில் மகிழ்ச்சியே.

இதைச் சொல்லும் நேரத்தில் சாமுத்ரிகா பட்டிற்கும் (மீரா ஜாஸ்மின்), தனித்தனி ரகங்களுக்கும் (பிரகாஷ் ராஜ், சிம்ரன்) திரைப் பிரபலங்களை அழைத்து வந்தவர்கள் (போத்தீஸ்), கர்னாடக சங்கீத உலகிலிருந்தும் சுதா ரகுநாதனை அழைத்து வந்து, அவர் நடித்த சமீபத்திய (ஆயிரம் மலர்கள் பட்டுச் சேலை) விளம்பரத்தையும் பிரபலப்படுத்தியதைக் குறிப்பிடவேண்டும்.

ஒட்டு மொத்தக் குத்தகையாக, அமிதாப், அக்ஷய், சல்மான், பிரியங்கா என இந்திப்படவுலகினர் சூட் துணிகளின் விளம்பரங்களைக் குத்தகைக்கு எடுத்திருக்கும் நேரத்தில், கோவாவின் மரியோ மிராண்டா (கார்டூனிஸ்ட்) நினைவிற்கு வருகிறார். எந்த சூட் துணிக்கு அவர் வ.இ.தூதராக வந்தார் என மண்டையை உடைத்துப் பார்க்கிறேன் நினைவிற்கு வரவில்லை.

ஒருவேளை அவர் திரைத்துறையிலிருந்து வந்திருந்தால் நினைவில் வைத்திருப்பேனோ...

முன்பொருமுறை கைக்கடிகார வி.இ.தூதர் மூவர் குறித்து எழுதியது.

குறிப்பு:
Brand ambassador இதனுடைய தமிழாக்கமாக வணிக இலச்சுத் தூதுவர் அத்தனை பொருத்தமாக இல்லையென நினைக்கிறேன். நண்பர்கள் பொருத்தமான் தமிழாக்கம் தந்தார்களென்றால் மகிழ்வேன்.

அன்புடன்
ஆசாத்