சாலை விபத்தும் சில பகிர்தல்களும்

நேற்று காலை (20.11.07) 7.15 மணியளவில் எங்கள் பகுதியில் ஏற்பட்ட விபத்தின் விளைவுகளைக் காண நேர்ந்தது.

எனது இருசக்கரம் அந்தப் பகுதியைக் கடந்தபோது முன்பக்கம் நசுங்கி கண்ணாடிகள் நொறுங்கிய டெம்போவும், ஹெட்லைட்டின் பேனல் உடைந்து சிதறிய இருசக்கரமும் நின்றிருந்தன. உணர்வற்ற நிலையில் தரையில் ஒருவரை சாலையில் கிடத்தி சோடா தெளித்து எழுப்ப முயற்சி செய்தார்கள். அவரால் எழமுடியாமற்போனதும் அப்படியே தூக்கிக்கொண்டு சென்றார்கள். தரையில் கிடந்தவருக்கு உள்காயமும், அதிர்வும் உண்டாகியிருக்க வேண்டும், வெளியே எந்தக் காயமும் தெரியவில்லை.

சாலையின் இன்னொரு பக்கத்தில் இருசக்கரத்திலிருந்து விழுந்தவரை கைத்தாங்கலாக அழைத்து வந்தார்கள். அவரும் நிலைகுலைந்திருந்தார். மூக்கு உடைபட்டு ரத்தம் கசிந்துகொண்டிருந்தது, முகத்தில் காயங்கள். மழையின் காரணமாக அடர்த்தியான ரெயின்கோட் அணிந்திருந்ததால் அதன்மேல்தான் சிராய்ப்புகளைக் காண முடிந்தது. அவருக்கு கால்களில்தான் காயம் இருந்திருக்கவேண்டும், நடை மிகவும் தளர்வாக இருந்ததால் ஊகிக்க முடிந்தது. சற்று முன்னரே அந்த விபத்து நடந்திருக்கவேண்டும். மழை தூறிக்கொண்டிருந்தது. ஏராளனமானோர் கூடி உதவிகள் செய்யத் துவங்கியிருந்தார்கள்.

ஆறுமாதங்களுக்குள் இரண்டு விபத்துகளின் விளைவுகளைக் கண்ட அனுபவமும், ஒரு விபத்தைக் கண்டு அதில் பாதிக்கப்பட்டவர்க்கு உதவுவோருடன் என்னையும் இணைத்துக்கொண்ட அனுபவமும் இருக்கின்றன. இந்த மூன்று விபத்துகளிலும் பாதிக்கபட்டவர்களுக்கு அருகிலிருப்போரின் உதவி உடனடியாகக் கிடைத்திருக்கிறது. சோடா வாங்குதல், தெளித்தல், சாலையோரத்தில் படுக்கவைத்தல் இப்படியான செய்கைகளைச் செய்யும் மனிதாபிமானம் மிக்கவர்கள் இருக்கத்தான் செய்கின்றார்கள். பரவலான அபிப்ராயம் இருப்பதைப்போல் சென்னைவாசிகள் விபத்தில் ஒருவர் அடிபட்டுக்கிடக்கையில் பார்க்காமல் போகும் கல்நெஞ்சக்காரர்கள் அல்லர்.

நேற்று நிகழ்ந்த விபத்தின் மூலகாரணமாகச் சொல்லப்பட்டது ராங் சைடில் வந்த வண்டி. இடப்புறம் நின்றுகொண்டிருக்கும் வண்டி கிளம்பும் வரையில் பொறுமையில்லாமல், இன்னொரு வண்டி அதனை ஓவர்டேக் செய்ய ராங் சைடில் சாலையின் வலப்புறத்தை ஆக்கிரமித்து புறப்படத் துவங்கியிருக்கிறது, அதுவரையில் நின்றிருக்கும் வண்டியின் கணிப்பில் எதிர்புறம் ஒழுங்கான பக்கத்தில் வந்துகொண்டிருந்த இன்னொரு வண்டியோட்டி, சடாரெனத் தோன்றிய ராங் சைடு வண்டியை எதிர்பார்த்திருக்கவில்லை. மோசமான மோதல் நிகழ்ந்திருக்கிறது. காயம், போக்குவரத்து நெரிசல், எஃப்.ஐ.ஆர்., விபத்துக் காப்பீட்டின் க்ளெய்ம் எனத் தொடரும் பல விளைவுகள்.

*****

சில பகிர்தல்கள்:

இரண்டு வாரங்களுக்கு முன்னர் இருசக்கர ஓட்டுதலின் சூட்சமங்கள் நன்கு அறிந்த நண்பரொருவர் பின்னால் அமர்ந்திருக்க சென்னையின் மிக நெரிசலான பகுதிகளில் வண்டியோட்டிய அனுபவம் கிடைத்தது. இருசக்கரம் நன்றாக ஓட்டத்தெரிந்தவர்கள் பின்னால் அமர்ந்து வருவதற்கும் ஓட்டத்தெரியாதவர்கள் அமர்ந்து வருவதற்கும் நிறைய வித்தியாசங்கள் இருக்கின்றன.

நெருங்கி அமர்ந்து கால்களை வண்டியுடன் ஒட்டியபடி அட்டகாசமான பேலன்சுடன் அமர்ந்திருந்தார். பின்னால் ஆள் இருக்கிறாரா இல்லையா என்னும் சந்தேகம் ஏற்படுமளவிற்கு அவரது பேலன்ஸ் இருந்தது. அலுவலகம் முடிந்து மக்கள் வீட்டிற்குச் செல்லும் வேளைகளில் வண்டியலை அடிக்கின்ற நூறுஅடி சாலை, பூந்தமல்லி நெடுஞ்சாலை சந்திப்பில் நீந்தி திருமங்கலம், அண்ணாநகர் மேற்கைத் தொட்டு, பாலப் பணிகள் நடந்துகொண்டிருக்கும் பகுதியில் அதிமோசமான லெவல் க்ராசிங்கினைத் தாண்டி, எம்.டி.எச். சாலையில் வில்லிவாக்கம் வரை செல்வதற்குள் நுரைதள்ளும், ஆனாலும், பழகிவிட்டதால் உணர்வதில்லை. அவஸ்தைகளும் அனிச்சையாகிப்போவது சென்னைப் போக்குவரத்தில்தான்.

பின்னால் அமர்ந்திருந்த நண்பர் குறிப்பிட்டார், 'மினிமம் டிசிப்ளின் / சிஸ்டம் இல்லாத ட்ராஃபிக் பாய் இது.' வண்டியோட்டும்போது அடிக்கடி நினைத்துக்கொள்ளவேண்டிய வாசகம் அது.

'விதிப்படி அனைத்தும் நிகழும்' என்னும் வேதாந்தச் சிந்தனை இருந்தாலுமே நமது பக்கத்திலிருந்து எந்தத் தவறும் இல்லாமல் பார்த்துக்கொள்ளும் மனநிறைவையாவது அடைவதற்காக நான் கடைப்பிடிக்கும் சில பாதுகாப்பு நடவடிக்கைகள் சில உண்டு.

சரியாகச் சொல்வதென்றால் அனைவரும் கட்டாயமாகச் செய்யவேண்டியவைதான், சென்னைச் சாலைகளில் அப்படிப்பட்ட முறைமையை நிறைய வண்டியோட்டிகள் கடைப்பிடிக்காததால் இப்படி ஒழுங்காகச் செய்யும் அவசியமானவைகளை ஏதோ பெரிய காரியமாகச் சொல்ல நேர்வதில் வருத்தமே. நகரும் முன், திருப்பங்கள், ஓவர்டேக்குகள், எதிர்த்திசை ஹெட்லைட்டுகள் இப்படியான சிலவற்றில் நான் கடைப்பிடிக்கும் முறைகள்.

1.வலம் இடம் அலைபாய்தல்:
சத்தியமாக திருப்பம் வந்தவுடன் சடாரென லேன் ஜம்பிங் செய்து மற்றவர்களைத் திகைக்க வைப்பதில்லை.

அண்ணா மேம்பாலத்திலிருந்து வந்து பீட்டர்ஸ் சாலை செல்வதென்றால், மேம்பாலைத்திலிருந்து இறங்கியதுமே ஒழுங்காக இண்டிகேட்டரைப் போட்டு வலப்புறம் ஒதுங்கி கார்களுக்கும் பின்னால் பொறுமையாகச் சென்று வலப்புறம் திரும்பி பீட்டர்ஸ் சாலையில் ஏறுவதுவது வழக்கம். நெரிசல் குறைவாக இருக்கும் நேரங்களில், எமிரேட்ஸ் ட்ரைவிங் ஸ்கூலில் கற்றுத் தந்த 'ஷோல்டர் செக்' செய்து பின்னால் வண்டிகள் எதுவும் இல்லையென்றாலே கொஞ்சமாக ஓவர்டேக் செய்து வலப்புறம் திரும்புவேன். இல்லையேல் இரண்டு சிக்னல்கள் கடந்தாலுமே பொறுமை இழக்காமல் திரும்புவேன்.

2.நின்றிருக்கும் வாகங்களை ஓவர்டேக் செய்தல்:
பக்கத்திலிருப்போரின் 'கவரில்' மெதுவாக எட்டிப்பார்த்து ஒரு வண்டி தெரிந்தாலும், 'நீங்க போங்க சார்' என ஹெல்மெட்டிற்குள் எதிரொலிக்க அடுத்தவரை விட்டுவிடுவேன். வண்டிகள் ஏதும் இல்லாத பட்சத்தில்தான் நகர்வேன்.

3.கிளைச் சாலையிலிருந்து சாலைக்குள் நுழைதல்:
எனக்கும் நண்பர்களுக்கும் இன்றுவரையில் நடக்கும் விவாதம் இதுதான். கிளைச்சாலையிலிருந்து சாலைக்குள் நுழையும்போது நிறுத்துவதான முஸ்தீபுடன்தான் வருவேன்.

'ஏன்?' என்பார்கள் நண்பர்கள்.

'ஒரு சேஃப்டிதான்' என்பேன் நான்.

தெருக்கள் என்றாலே அப்படிப் பக்குவமாக நுழைவேன். போக்குவரத்து மிகுந்த சாலையென்றால் கிளைச்சாலையின் முடிவில் சற்றே நிறுத்தி நுழைவது பாதுகாப்பானது என உறுதிசெய்த பின்னரே நுழைவேன். சந்திப்புகளில் 'ஹால்ட் அன் கோ' பலகை இல்லையென்றாலும் நானாக அப்படிச் செய்வதுண்டு.

4.எதிர்த்திசை ஹெட்லைட்டுகள்:
இதில் மட்டும் சென்னைவாசிகள் எல்லோருக்கும் பயிற்சி உண்டு. இரவுநேரங்களில் எதிர்த்திசையில் வரும் வண்டிகளின் ஹெட்லைட்டை மறந்தும் தலையுயர்த்திப் பார்ப்பதில்லை. விழிகள் குவிவது ஹெட்லைட்டைத் தவிர்த்த சாலையில்தான்.

கீழே படத்தில் இருப்பதுபோல்.



இரவு நேரத்தில் பூந்தமல்லி நெடுஞ்சாலையில் மதுரவாயிலில் பணிகள் நடந்துகொண்டிருக்கும் பகுதியில் இருசக்கரம் ஓட்டியிருக்கும் நண்பர்கள் இந்தப் பயிற்சியில் வித்தகர்களாக இருப்பார்கள்.

துவக்கநிலையிலேயே இவற்றைக் கடைப்பிடித்துவிட்டோமென்றால், பாதுகாப்பு நடவடிக்கைகள் பழகி ஆபத்தை நாமாக வரவழைக்காத நிலையில் வண்டி ஓட்டலாம்.

'பாய்! சல்தாஹை பாய்' என நண்பர்கள் சொல்வது கேட்கிறது :-)

அன்புடன்
ஆசாத்