மோட்டார் விகடனும் பைக் இண்டியாவும் - சில கேள்விகள்

எந்தத் துறையில் ஆர்வம் இருக்கிறதோ அது தொடர்பான வாசிப்புகள் அதிகமாக இருப்பது இயல்பு. கட்டுமானத்துறை, எலிவேட்டர் வேர்ல்ட் போன்று தொழில் தொடர்பான தமிழ் ஆங்கிலப் பத்திரிகைகள் படிக்கவேண்டியது தொழிலுக்கு அவசியம். அவுட்லுக் மணி, நாணயம் விகடன் வகையறாக்களில் கொஞ்சமாவது கண்களை அலைபாயவைப்பது காலத்தின் கட்டாயம். மோட்டார் விகடன் அந்த வகையில் சேராது. அது முழுக்கமுழுக்க மனதோடு தொடர்புடைய சமாசாரம். வண்டிகள்...வண்டிகள்...வண்டிகள் வண்டிகளைத் தவிர மற்றொன்றில்லை.

நான்குசக்கரங்களில் கொஞ்சமே ஆர்வமும், இருசக்கரங்களில் அதிக ஆர்வமும் கொண்டதான மனப்பக்குவம் உள்ள தமிழ் வாசகர்கள் மோட்டார் விகடனோடு சேர்த்து சமீபத்தில் வரத்துவங்கியிருக்கும் பைக் இண்டியாவையும் சேர்த்துக்கொள்ளலாம். ஹீரோ ஹோண்டா வெளியிடும் 'ஹங்க்' இருசக்கரம் குறித்து இந்த இரண்டு பத்திரிகைகளிலும் கட்டுரை உண்டு. கட்டுரைக்கு பைக் இண்டியா தந்திருக்கும் தலைப்பு 'THE IMPUDENT HUNK', மோட்டார் விகடன் தந்திருக்கும் தலைப்பு 'கவர்ச்சி வீரன்' .

மோட்டார் விகடனில் ஹங்க் குறித்த கட்டுரையை சார்லஸ் என்பவர் எழுதியுள்ளார். பைக் இண்டியாவில் ஆசிரியர் குழுவே எழுதியுள்ளது. இரண்டு கட்டுரைகளுக்குமிடையே பக்கங்கள், படங்கள், மொழிநடை, குறித்த அகழ்வாராய்ச்சியில் இறங்காமல் வாசகர்களுக்கு வண்டியின் அறிமுகத்தை எப்படித் தந்திருக்கிறார்கள் என்று பார்த்தால் ஏதோ இருவரும் பேசிவைத்துக்கொண்டு சில விவரங்களை ஒன்றுபட்டு எழுதியதுபோல் தோன்றுகிறது; சில விவரங்களை அணுகுவதில் இருவரும் மாறுபடுகின்றார்கள்.

ஒன்றுபடுபவை:
1.
வளைகள் (tyre), சக்கர அமைப்பு குறித்த விவரங்களில் விகடன் குறிப்பிடுவது,
'சிபிஸீ எக்ஸ்ட்ரீமில் இருக்கும் அதே அளவு டயர்களே என்றாலும்....'

பைக் இண்டியா குறிப்பிடுவது,
'...Hunk even has the same wheelbase of 1325mm as that of the CBZ Xtreme.'

2.
பைக் இண்டியா எழுதுவது:
'Another prominent feature is the Hunk's low-set saddle.'

விகடன் எழுதுவது:
'...உயரம் குறைவானவர்களும் வசதியாக அமர்ந்து இதை ஓட்டும்வகையில், உயரம் 50மி.மீ. குறைக்கப்பட்டுள்ளது.'

இது என்ன பெரிய விஷயம், வண்டியின் தொழில்நுணுக்கங்களை எந்த மொழியில் எழுதினாலும் இவற்றை எழுதத்தானே வேண்டும் என நினைக்கலாம். விற்பனைப் பிரதிநிதியிடம் ஐந்து நிமிடங்கள் பேசினால் அவரும் கிளிப்பிள்ளை போல இவைகளைத்தானே சொல்வார் என்னும் எண்ணமும் தோன்றலாம்.

இங்கே சொல்ல விழைவது என்னவென்றால், ஹீரோ ஹோண்டாவின் ஹங்க் குறித்த விவரங்களை எழுதும் இரண்டு கட்டுரையாளர்களும் நுட்பவிவரணங்களை (டெக்னிகல் ஸ்பெசிஃபிகேஷன்) உள்வாங்கிக்கொண்டு அழகாக வெளிப்படுத்துகின்றார்கள் என்பதையே.

கூடுதலாக, பெட்ரோல் கொள்கலன் குறித்து இருவரின் பார்வையும் ஒன்றாக இருப்பது விவரணம் படித்ததால் மட்டும் இருக்க முடியாதென்பது எனது எண்ணம்.

3.
பைக் இண்டியா எழுதுவது:
'Swing a leg over it and the first thing that you will notice is its big-bike feel, courtesy the beefy tank with those floating shrouds.'

விகடன் எழுதுவது:
'பெட்ரோல் டேங்க், பைக்கின் பெயருக்கேற்றபடி மிகவும் கம்பீரமாகக் காட்சியளிக்கிறது. 'விமானத்தில் இருப்பதுபோல்' என்று விளம்பரப்படுத்தப்படும் டேங்க் மூடி பார்வைக்கும் பயன்பாட்டிற்கும் சிறப்பு சேர்க்கிறது'

இரண்டு கட்டுரையாளர்களும் குறிப்பிட்டுச் சொல்லும் முக்கியமான குறைபாடு,

4.
விகடன் எழுதுவது:
'டிஜிடல் இல்லை. அனலாக் டயல்கள்தான்'

பைக் இண்டியா எழுதுவது:
'Another point that disappointed us was the lack of digital speedo...'

ஆக, நல்லவற்றை படித்துப்பார்த்து எழுதியதிலும், குறைபாட்டை அவர்களாகவே கண்டு வெளிப்படுத்தியதிலும் இருவரும் ஒருமித்திருக்கிறார்கள்.

ஆனால், வண்டியின் வடிவம் குறித்த அணுமுறைகளில் சில இடங்களில் இருவரது பார்வைகளும் வெவ்வேறாக இருக்கின்றன. குறிப்பாக, 240மி.மீ. வட்டுத்தடை (டிஸ்க் ப்ரேக்) தொடர்பாக விகடன் ஒன்றுமே சொல்லாமல், 'ஹங்கின் முன்பக்கம் டிவிஎஸ் அறிமுகப்படுத்தியுள்ள ஃப்ளேம் போன்றே இருந்தாலும் சற்று சிறியதாக இருக்கிறது' என்பதோடு நிறுத்திக்கொள்கிறது. பைக் இண்டியாவோ இந்த வட்டுத்தடையை, '...But what spoils the entire brawny and empowering look of the bike is the puny-looking 240mm front disc rotor. Imagine a burly bicep sporting a tiny littlle tattoo...nah!' இப்படி நையாண்டி செய்கிறது.

(குறிப்பு: அவர்களுடைய [ஹீரோ ஹோண்டா] சூப்பர் பைக் கரீஸ்மாவில் 276மி.மீ. வட்டுத்தடை, ராயல் என்ஃபீல்டின் புல்லட், தண்டர்பேர்ட் வகையறாக்களில் 280மி.மீ. வட்டுத்தடை.)

இப்படி இரண்டு பத்திரிகைகளையும் அடுத்தடுத்து படித்தபோது மனதில் தோன்றிய சில கேள்விகளை எழுத எண்ணம். அனைத்து கேள்விகளும் விளம்பரதாரர் தொடர்பாகத்தான் இருக்கும்.

கேள்வி எழுந்ததற்கான காரணம்:
பைக் இண்டியாவில் மொத்த பக்கங்களுக்கும் விளம்பரம் வெளியாகியுள்ள பக்கங்களுக்குமான விகிதம் 130:20.5 (முன்பின் அட்டையைச் சேர்த்து, பத்திரிகையின் சந்தா படிவம் விடுத்து). இதுவே மோட்டார் விகடனில் 128:6 (முன்பின் அட்டையைச் சேர்த்து).

கேள்வி 1:
ந்யூ பைக்ஸில் (பைக் இண்டியா) விலைப்பட்டியலின் எல்லா பக்கங்களிலும் விளம்பரம் தந்து, தனியாக ஒருபக்கமும் விளம்பரம் தந்திருக்கும் வங்கி மோட்டார் விகடனின் பைக் பஜாரை கண்டு கொள்ளாமல் விட்டது ஏன்?

கேள்வி 2:
பைக் இண்டியாவில், 1/3 பக்க அளவில், ஒருபத்தியில் பாஸ்போர்ட் அளவில் படத்தை வெளியிட்டு பெட்டிச் செய்தியாக வெளியிடப்பட்டிருக்கும் புதிய ஸ்கூட்டர் கைனடிக் ஃப்ளைட், அதில் இரண்டு பக்க அளவில் விளம்பரம் தந்துள்ளது.

ஆனால்,

ஒரு பக்கத்திற்கு படம் வரைந்து பாகங்களைக் குறித்து இன்னொரு பக்கத்தில் 1/3 அளவில் செய்தியும் வெளியிட்டு, 2/3 அளவில் படங்களையும் வெளியிட்டு மொத்தத்தில் இரண்டு பக்கம் ஒதுக்கியிருக்கும் மோட்டார் விகடனில் கைனடிக் ஃப்ளைட்டின் விளம்பரங்கள் வெளியாகவில்லை.

ஏன்?

குசும்பு:
ங்கண்ணா! நம்ம ஹெட் அன் ஷோல்டர்ல ஒண்ணார்ருவா டிப்ஸு குட்த பிபாஷா மேடம் வர்ர இந்த அடிடேஸ்மெண்ட் பாக்கணும்னா இன்னிக்கு இந்து மெட்ரோ ப்ளஸ்ல எட்டாம் பக்கம் பாத்துருங்கண்ணா. இதும் 125சிசிதான். ஆக்டிவா இன்னா ஆவப்போவ்தோ...அத அந்த போஸ்டுல தனியா பாத்துக்கலாம்.

கேள்வி 3:
பஜாஜ் டிஸ்கவர் டிடிஎஸ்-ஐ 135இன் விளம்பரம் இரண்டிலும் பின் அட்டையில் வெளியாகியுள்ளது. பஜாஜின் சந்தை அணுகுமுறை என்ன?

வாதம்:
மோட்டார் விகடன் எத்தனை எண்ணிக்கை வெளியாகின்றது, பைக் இண்டியா எத்தனை வெளியாகின்றது என்பதெல்லாம் பேசலாம். ஆனால், எண்ணிக்கையையும் விளம்பரத்தையும் அப்படி மேலெழுந்தவாரியாகத் தொடர்புபடுத்த முடியாது. விளம்பர உலகம் எண்ணற்ற சூட்சமங்களைக் கொண்டுள்ளது. விவரம் அறிந்த பதிவர்கள் விளக்கினார்களென்றால், சந்தேகங்கள் தெளியலாம்.

விதண்டாவாதம் :-)
டிஸ்கவுண்ட் கெலோரில் ரூ.21,990இற்கு கணினியைப் பார்த்த விழிகளை அடுத்த பக்கத்திற்கு செலுத்தினீர்களென்றால் ரூ.2,50,000இற்கான (தோராய விலை) கைக்கடிகார விளம்பரம் இருக்கும். இதைப் பார்ப்பவர் அதைப் பார்ப்பாரா? அதை வாங்குபவர் இதை வாங்குவாரா? ஏன் இப்படி இரண்டும் ஒரே இடத்தில்? மண்டையை உடைத்துக்கொண்டும் இந்த சமச்சீர் :-))) விளம்பரம் விளங்கவில்லை. [பார்க்க: இந்து ரீட்டைல் ப்ளஸ், 18.11.2007 பக்கம் 2, 3]

கேடயக் குறிப்பு:
மோட்டார் விகடனுக்கு சந்தாதாரர் என்பதைத் தவிர எனக்கும் அவர்களுக்கும் வேறெந்தத் தொடர்பும் கிடையாது.

அன்புடன்
ஆசாத்