சண்டைக்காட்சி ரசிகர்களுக்கு

இரட்டைச்சிலம்பம்

இது எனது நூறாவது பதிவு.

சிலம்பம் தந்த உடற்பயிற்சியையும் கவனக்கூர்மையையும் சில நாள்கள் அனுபவித்ததால் எனக்கு சிலம்பத்தின்மேல் கொஞ்சம் ஈர்ப்பு உண்டு. முறைப்படி பயின்று சண்டைக்கலையில் ஓரிரு படிகளைத் தொட்ட சமயத்தில் திடீரென்று சிலம்பத்தின் பக்கமே போகமுடியாமற் போனது. படிப்பும் அதனைத் தொடர்ந்த வேலை வாய்ப்புகளும் சிலம்பத்தைத் தொடும் வாய்ப்பை அறவே விலக்கிவைத்தன.

இருபது ஆண்டுகளுக்குப் பிறகு கடுமையான பயிற்சிகள் மேற்கொண்டு விட்டுப்போன விளையாட்டை பற்றிப் பிடித்தேன். அது ஜித்தாவில் நடைபெற்ற விழாவில் விளையாடுவதற்காக. விழா முடிந்ததும் விளையாட்டிற்கு மூட்டை கட்டியாகிவிட்டது.
மீண்டும் தொய்வு.

வலைப்பதிவு எழுதத் துவங்கியதும் சிலம்ப விளையாட்டின் துவக்கநிலை விளக்கங்களை ஒன்று, இரண்டு, மூன்று தொடர்களில் எழுதினேன். 'வீச்சு முறைகளில் அத்தனை தேர்ச்சி இல்லாமல் இதனைத் துவக்கிவிட்டோமா? இப்பொழுது முன்பு விளையாடியதைப் போல சுறுசுறுப்பாக விளையாட முடியுமா?' இப்படியான பல சிந்தனைகளில் சிலம்பத்தின் ஆழம் என்னை அச்சுறுத்த, தொடரை அப்படியே விட்டுவிட்டேன்.

இத்துடன் முன்னுரையை முடித்துக்கொண்டு விஷயத்திற்கு வருகிறேன்.

சென்னையில் நான் பழகிய வட்டத்தில் நன்கு தேர்ச்சி பெற்ற சிலம்ப ஆசிரியர்கள்கூட இரட்டைச்சிலம்பம் விளையாடத் தயங்குவார்கள். சிலம்பத்தில் பாதியளவே இருக்கும் குச்சியை வைத்துக்கொண்டு செடி குச்சி என்னும் ஆட்டம்தான் ஆடுவார்கள். காரணம், இரட்டைச்சிலம்பத்தில் கண்ணிமைக்கும் நேரம் கவனம் பிசகினாலும் ஆட்டம் தப்பாகிவிடும். கைகள், கால்கள், கவனம் அனைத்தும் ஒத்துழைக்க வேண்டும்.

வீச்சு பலமாக இருக்கவேண்டும். ஒற்றைச்சிலம்பத்தில் சிலம்பத்தை இரண்டு கைகளாலும் பிடிப்பதால் கிடைக்கும் நெம்புகோல் உபயம் (அட்வான்டேஜ்) இதில் கிடைக்காது. இறுக்கிப் பிடிக்கவேண்டும். நான்கரை அடிக்குமேல் வெளியே நீண்டு நிற்கும் சிலம்பம் தனது ஆரகதியால் (ஆங்குலர் வெலாசிட்டி) மணிக்கட்டின்மேல் அதிகமான பளுவைத் (லோட்) தரும். உறுதியான கரமாக இல்லையெனில் மணிக்கட்டில் சுளுக்கு விழவும் வாய்ப்பு உண்டு.

வீசும்போது சட்டென்று சிலம்பத்தை நிறுத்துவது சிரமம். அதன் போக்கில்விட்டு, திசையை மாற்றி, வேகத்தைக் குறைத்துதான் நிறுத்தவேண்டும். அனத்திற்கும் மேலாக, வீச்சின் வேகத்தால் மட்டுமே எதிராளியைத் தடுக்க முடியும். அதனால் எதிராளியைவிடவும் வேகமாக வீசும் திறன் வேண்டும்.

இப்படியான காரணங்களால், இரட்டைச்சிலம்பப் பயிற்சியை மேற்கொள்வதில் பலருக்கும் தயக்கம் உண்டு. பலரும் விளையாடத் தயங்கும் இந்த விளையாட்டை எம்.ஜி.ஆர். மாட்டுக்கார வேலன் திரைப்படத்தில் நுணுக்கமாக விளையாடிக் காட்டிருப்பார்.

மாட்டுக்கார வேலனின் சண்டைப் பயிற்சியாளர் மாடக்குளம் அழகிரிசாமி என்றே இந்தப் பதிவிற்கான விவரங்களை யோசிக்கும் வரையில் நினைத்திருந்தேன். அது தவறு. ரகசிய போலீஸ் 115 படத்தின் சண்டைப் பயிற்சி உதவியாளர் மாடக்குளம் அழகர் சாமியின் பெயரை நண்பன் தூறல் நிண்ணு போச்சு படத்தைப் பார்த்துக்கொண்டிருக்கையில் சொல்ல, அது மூளையில் வேறுவிதமாகப் பதிவாகி தவறாகவே நினைத்துவந்திருக்கிறேன். மாட்டுக்கார வேலனுக்கும் ஷ்யாம் சுந்தர்தான் சண்டைப் பயிற்சி.

இக்காட்சியில் பத்து வினாடிகளுக்கு மேல் காட்சி மாறாமல் வீச்சுகள் இருக்கும். பத்து வினாடிகளுக்கும் மேலாக வெட்டி ஒட்டாமல் எடுக்கப்பட்ட சண்டைக் காட்சிகள் சிலவே. படகோட்டியிலும் ரிக்ஷாக்காரனிலும்கூட பத்து வினாடிகளுக்கும் மேலான தொடர்ந்த சிலம்பம், சுருள் கத்தி வீச்சுகள் இருக்கின்றன. ஆனாலும், அவற்றில் இருப்பவை சுழற்சிகள் மட்டுமே.

இதில் முதலில் தடுப்பதாகத் துவங்கி, முன்னும் பின்னும் திரும்பி, பிறகு சுழற்சி துவங்கும்.

முதலில் இடுப்பிற்குக் கீழே வரும் தாக்குதலை இடது கரத்தால் (சிலம்பத்தால்) தடுப்பது. அடுத்து தலைக்கு வரும் தாக்குதலை வலது கரத்தால் தடுப்பது. எதிராளி இருவரின் சிலம்பங்களையும் சுழற்றிவிட்டு திசை மாற்றுவது. தலைக்கு வரும் தாக்குதல்களைத் தடுத்து தரை வரையில் இழுத்து வந்து நிலையை (பொசிஷன்) மாற்றி நின்று கூடுதலாக வரும் எதிராளிகள் முன்புறம் இருக்குமாறு பார்த்துக்கொண்டு அனைத்தையும் தடுத்து, சிதறடிக்க வைக்கும் நிலை.

அந்நிலையில் கிடைக்கும் அவகாசத்தில் சுழற்சியைத் துவக்கி (வீடு கட்டி) முன்னேறிச் செல்வது.

இதனை செல்பேசியில் 3gp கோப்பாகப் பதிந்து வலையேற்றியிருக்கிறேன். விருப்பத்துடன் பார்த்தீர்களென்றால் மகிழ்வேன். சுட்டி.

மரத்தடி நாள்களில் சிலம்பம் குறித்து மடலாடுகையில் மதி அவர்கள் 'நீங்கள் விளையாடியதை வலையேற்ற முடியுமா' எனக் கேட்டிருந்தார். அதற்கு இப்போதுதான் நேரம் வந்திருக்கிறது.

எனது நூறாவது பதிவு அல்லவா, கொஞ்சம் முக்கியத்துவம் (எனக்குதான் எனக்கே எனக்குதான் :) ) உள்ள பதிவாக இருக்கட்டுமே என்னும் நினைப்பில் எனது விளையாட்டின் காட்சியையும் வலையேற்றியிருக்கிறேன். இது இரட்டைச் சிலம்பம் அன்று; ஒற்றைச் சிலம்பம்தான். சுட்டி .

அன்புடன்
ஆசாத்