சென்னையின் சில முகங்கள் - மீரான் சாகிபு தெரு

மீரான் சாகிபு தெரு

காசினோ திரையரங்கை ஒட்டிச் செல்லும் தெரு.

17'' கணினித்திரை சுவர்த்தாள் என்ன ஜுஜுபி. இந்தத் தெருவில் நுழைந்ததும் இடதுபுறத்தில் பதினாறடிக்கு எட்டடி திரைப்பட சுவரொட்டியை நின்று நெருங்கி நிதானமாகப் பார்த்து ரசிக்கலாம், யாரும் நம்மை அதிசயமாகப் பார்க்கமாட்டார்கள். சென்னையிலேயே சுவரொட்டியை இத்தனை நெருக்கமாக நின்று பொறுமையாகப் பார்க்கக்கூடிய இடம் இதுவாகத்தான் இருக்கும். நீண்ட சுவர் இன்னமும் விளம்பரதாரர்களின் குத்தகைக்குச் சிக்காமல் இலவசமாக திரைப்படச் சுவரொட்டிகளைத் தாங்கி நிற்கிறது.

எதிரே கடையில் தாராளமயமாக்கல் திரைக்கவர்ச்சி வெளிப்பட தமிழ், தெலுங்கு, மலையாளம், ஆங்கிலம் என எல்லா மொழிகளிலும் நடிகைகள் ப்ளாஸ்டிக் உறை போடப்பட்டு தூக்கில் தொங்கிக்கொண்டிருப்பார்கள். பொது இடங்களில் புகை பிடிக்கமுடியாத நிலை இருந்தபோதிலேயே மீரான் சாகிபு தெரு மட்டும் விதிவிலக்கு. நமது கோல்டு ஃப்ளேக் கிங்ஸுடன் போட்டி போட்டுக்கொண்டு 555வும் சில்லறையில் விற்பனையாகும்.

வசவசவென திரைப்பட வினியோகஸ்தர்களின் அலுவலகங்கள் ஒரு முனையிலிருந்து அடுத்த முனை வரையில் பரவிக்கிடக்கும். யாராவது வெள்ளை வேட்டி மனிதர் செய்தித்தாளில் பொட்டலாமாக எதையாவது கையில் வைத்திருந்து ஒரு கதவிலிருந்து வெளிப்பட்டு அடுத்த கதவிற்குள் நுழைந்தால், நம்புங்கள், அதற்குள் கட்டுக்கட்டாக ரூபாய் நோட்டுகள் இருக்கலாம். ஏதோ படப்பெட்டிக்காக அது கைமாறியிருக்கலாம். லட்சங்களை இப்படி லட்சியம் செய்யாமல் பணத்தில் புரளும் ஆசாமிகள் அங்கும் இருக்கிறார்கள்.

திருட்டு விசிடிக்கள் குண்டர் சட்டத்தால் தடை செய்யப்படாத நேரத்தில் பட்டியலைத் தந்த பதினைந்தாவது நிமிடத்தில் சிடியை வாங்கிச் செல்லலாம். 'வூட்ல பசங்க இருக்கும்போது சிடியப் போட்றாத'பா. வெட்டாம வந்தது' என கூடவே அறிவுரையும் கிடைக்கலாம்.

நேற்று சந்தைக்கு வந்த வெளிநாட்டு டிவிடி ப்ளேயரின் மாடல் எண்ணைத் தந்தீர்களென்றால், அதை இரண்டு மணிநேரத்தில் உங்கள் முன்னே கொண்டு வந்து நிறுத்தும் வல்லுனர்கள் வாழ்கின்ற தெரு அது.

'ஹால்ல கொஞ்சம் ஸ்பீக்கர் செட் பண்ணணும்மா'

'பண்ணிரலாம். ஹோம் தியேட்டர் கணக்கா எஃபக்ட்டு குடுத்துரலாம். ஆம்ப்ளிஃபயர் இல்லாம மூவாயிரம் ஆவும். பையண்ட சொல்லிட்டா ஸ்பீக்கர் செஞ்சுருவான். ஓக்கேயா'

பல்லால் வயரைக் கடித்து இழுத்துக்கொண்டே பதில் சொல்லும் வித்தகர்கள் இந்தத் தெருவில் இருக்கிறார்கள்.

பணம் புரண்டாலும் பகட்டாக இல்லாமல் பழைய வீடுகளை அப்படியே அலுவலகமாக்கி, கடைகளாக்கி ஒழுங்கில்லாமல் நெளிந்துகொண்டிருக்கும் தெரு. முழுதும் வணிகமயமாகிப்போன இந்தத் தெருவில் இன்னமும் ஓரிரண்டு குடியிருப்பு வீடுகள் இருக்கின்றன. கோடிக்கணக்கில் விலை கிடைக்குமென்றாலும் மூதாதையர் சொத்தென்று விடாப்பிடியாக இன்னும் யாருக்கும் விற்காமல் இருக்கிறார்கள்.

அவர்கள் பழைய நரசிங்கபுரத்து மக்கள்.

இப்படியாக மீரான் சாகிபு தெருவில் சென்னைக்கு ஒரு முகம்.

அன்புடன்
ஆசாத்