தாவூத் இப்ராஹிம் - முகமாற்றம்

அன்புடையீர்,

பழைய செய்திதானென்றாலும் இன்று என்.டி.டிவியில் இது குறித்து வந்த செய்தித் தொகுப்பைப் பார்த்ததால் இதனை உங்களுடன் பகிர்ந்துகொள்கிறேன்.

தாவூத் இப்ராஹிம் இந்திய அரசால் தேடப்பட்டுவரும் குற்றவாளி. இவரது பாகிஸ்தானிய பாஸ்போர்ட்டுகளின் எண்களைக் குறிப்பிட்டு பாகிஸ்தானிய அரசிடம் இந்திய அரசு கொடுத்திருந்தும் பாகிஸ்தானிடமிருந்து ஒத்துழைப்பு இல்லாமையால் தாவூதைப் பிடிக்கமுடியாத நிலை.

அவற்றில் ஒரு பாஸ்போர்ட்டின் எண் KC2859011. இதில் தாவூதின் பெயர் ஆமிர்கான் என்று பதியப்பட்டுள்ளதாம்.

கராச்சியில் பணக்கார வர்க்கம் வாழும் வெவ்வேறு பகுதிகளில் ஐந்து வீடுகளின் முகவரிகள் குறிக்கப்பட்டு பாகிஸ்தான் அரசிடம் தரப்பட்டிருக்கிறது. இவை ஐந்தும் ஒரே சொந்தக்காரரின் பெயரில்தான் இருக்கின்றன. ஒரே நகரில் இத்தனை பணத்தைக் கொட்டி ஐந்து வீடுகளை வாங்கி வைத்திருக்கும் அந்த உரிமையாளர் யார் என்பதற்கும் பாகிஸ்தானிய அரசிடமிருந்து பதில் இல்லை.

கராச்சியில் ரெயின்போ சென்டரில் ஒலி ஒளிப்பேழைகள் தயாரிக்கும் / விற்கும் பிரபலமான நிறுவனம் இந்திய வெளியீடுகளை எந்தவிதமான காப்புரிமையும் இல்லாமல் பதிப்பித்து வெளியிடுகிறது. அதன் உரிமையாளர் யார்? பதில் இல்லை.

நம் அனைவருக்கும் தெரிந்த பதில், இந்தியாவில் வன்முறைக் கலாசாரம் பெருகினால் அவர்களுக்குக் கொண்டாட்டமே. வன்முறைகள் பெருக தாவூதும் காரணமாக இருப்பதால் தாவூதைக் காட்டிக்கொடுக்க பாகிஸ்தானிய அரசு அத்தனை எளிதில் முன்வராது. ஒருபுறம் நேசக்கரம் நீட்டுவதாகவும், மறுபுறம் எல்லைதாண்டிய பயங்கரவாதத்தில் ஈடுபடுவதுமாக கண்ணாமூச்சி ஆட்டத்தைத்தான் இஸ்லாமாபாத் ஆடிவருகின்றது.

2003இல் இருந்தே தாவூத் இப்ராஹிம் முகமாற்று அறுவை சிகிச்சை செய்துகொண்டதாக வதந்திகள் இருந்தபோதும் இப்போது தென்னாப்பிரிக்காவில் தாவூத் அறுவை சிகிச்சை செய்துகொண்டதாக உறுதியாகத் தெரியவருகின்றது. டாக்டர் லெஸ்ஹர் (இதைப் போன்றதொரு உச்சரிப்புதான் சரியாக விளங்கிக்கொள்ள இயலாமற்போனது) என்பவர்தான் முகமாற்று அறுவை சிகிச்சை செய்திருப்பதான செய்தி. அவரிடம் நேரடியாகப் பேச வாய்ப்பில்லாமல் அவரது உதவியாளருடன் பேசிய பேச்சினை என்.டி.டிவி ஒளிபரப்பியது. 'சிகிச்சைக்கு வருபவர்களின் பூர்வீகத்தை அறிந்துகொள்வது எங்கள் வழக்கமில்லை' என முகத்திலடித்தாற்போல அவர் பதில் சொல்கிறார்.

முகத்தை மட்டும் மாற்றாமல் கைரேகைகளையும், விழிகளையும்கூட அறுவை சிகிச்சையால் தாவூத் மாற்றிக்கொண்டதாகச் சொல்கிறார்கள்.

கொல்கத்தாவிலிருந்து யாரோ கண் மருத்துவரின் பேட்டியை ஒளிபரப்பினார்கள். விழிகளின் ஐரிஸ் பகுதியின் அமைப்பை அறுவை சிகிச்சையால் மாற்றிக்கொள்ளமுடியும் என்கிறார் அவர். கையில் வெட்டுக் காயங்கள் விழுந்தால் அறுவை சிகிச்சையால் அவற்றை மாற்றும்போது ரேகைகளையும் மாற்றமுடியும் என இன்னொரு மருத்துவர் பேட்டியளிக்கிறார்.

இந்தியாவில் வன்முறைச் சம்பவங்கள் நடக்கக் காரணமாக இருக்கும் ஒரு குற்றவாளி இப்படி அறுவை சிகிச்சையால் தனது உடலின் அடையாளங்களை மாற்றிக்கொண்டதால் அவரைக் கைது செய்து அழைத்து வர முயற்சி செய்யும் இந்திய அரசின் முன்னே வளர்ந்திருக்கும் பிரச்சனை அசாதாரணமானது.

அவரைக் கைது செய்து இந்தியாவுக்கு அழைத்து வர முடியுமா? உங்கள் பதிலை குறுஞ்செய்தியாக அனுப்புங்கள் - என்.டி.டிவி.

என்.டி.டிவிக்கு நன்றிகள்.

அன்புடன்
ஆசாத்

எனது பி.கு.:

1.
ஃபேஸ் ஆஃபில் ஜான் ட்ரவோல்டா நிக்கோலஸ் கேஜுடன் இந்த முகமாற்று ஆட்டத்தை ஆடுவார். சுரேஷ் மேனனும் வினீதும் தமிழில் 'கண்ணுக்கு மையழகு' பாட்டு வருமே அதில் ஆடினார்கள் (படம் பேரு மறந்துபோச்). திரையில் நடப்பது உண்மையாகின்றதா?

2.
89இல் இல்லஸ்ட்ரேட்டட் வீக்லியில் (டானாக வளரும்) தாவூதை நேரில் கண்ட பேட்டி பிரசுரமானது. அப்போது அவர் ஷார்ஜாவில் ஏற்றுமதி ஆடைகள் தயாரிக்கும் நிறுவனம் நடத்துகின்ற 'கவரில்' இருந்ததாகச் சொல்வார்கள். பழைய வீக்லி வைத்திருக்கும் வழக்கம் உள்ளவர்களிடம் இது கிடைக்குமா? நான் அதை மட்டும் பாதுகாத்து வைத்திருந்தேன். துபாயிலிருந்து சவூதி வரும்போது தவறவிட்ட பலவற்றில் அதுவும் ஒன்றாகிப்போனது.