ஆடலுடன் பாடலைக் கேட்டு - சில கோவையற்ற எண்ணங்கள்

'ஷ்ஹாங் ஷ்ஹாங்' என ஆறு முறைகள் மூச்சு வாங்கும் இந்தப் பாடலை சுசீலா அம்மையார்தான் பாடியிருக்கவேண்டுமா என்று பலமுறைகள் நினைத்ததுண்டு. அதே போல் பக்கத்து வீட்டுப் பருவ மச்சான் பார்வையிலே படம் புடிச்சான் பாடலையும் அவருக்குக் கொடுத்திருக்க வேண்டுமா என்றும் சில சமயம் நினைப்பதுண்டு. சல்தா ஹை.

நாம் ஒருவரை ஒருவர் சந்திப்போம் என காதல் தேவதை சொன்னாள், நான் மாந்தோப்பில் நின்றிருந்தேன் என்றெல்லாம் எல்.ஆர்.ஈஸ்வரி அந்தப் பக்கம் வளைய வந்தபோது இவரும் இப்படி மேல்மூச்சு கீழ்மூச்சு வாங்கும் பாடல்களைப் பாடும் வாய்ப்பைப் பெற்றிருக்கிறார்.

இந்த வகையில் வெள்ளி விழா படத்தில் மென்மையான பாடலான காதோடுதான் நான் பாடுவேனிற்கு எல்.ஆர். ஈஸ்வரியையும், துள்ளலான பாடலான நான் சத்தம் போட்டுத்தான் பாடுவேனிற்கு பி.சுசீலாவையும் வேண்டுமென்றே மாற்றித் தந்ததாக எம்.எஸ்.வி. குறிப்பிட்டதை எங்கோ படித்த நினைவு.

ஆடலுடன் பாடலைக் கேட்டு பாடலின் பின்னணி மிகவும் சுவாரசியமானது. முதலில் இசையமைத்து எம்.ஜி.ஆரின் ஒப்புதலுக்காக் காட்டியபோது, ஒப்புதல் தர மறுத்திருக்கிறார். இசை மிகவும் துள்ளலாக இருக்கிறது, உடன் ஆடப்போகிறவர் எல்.விஜயலட்சுமி - தொழில்முறை நடனக் கலைஞர், என்னால் இந்த இசைக்கு ஆட முடியாது என்றும், வேறு ஒரு மெட்டுப் போடுமாறும் எம்.எஸ்.வி.யுடம் சொல்லியிருக்கிறார். பிறகு, நடன அமைப்பாளர் சோப்ரா வந்து உங்களால் முடியும், நன்றாக வரும் என்றெல்லாம் சமாதானம் சொன்ன பிறகே ஒப்புதல் அளித்திருக்கிறார்.

தமிழ் திரைப் பாடல்களில் பஞ்சாபி இசை என்றால் உடனே எனக்கு நினைவுக்கு வருவது இந்த பாடல்தான்.

இன்றைக்கு வேண்டுமானால் தொலைக்காட்சிகள், ஒலிநாடாக்கள் உபயத்தில் குருதாஸ் மான் முதல் சுக்வீந்தர் வரை பஞ்சாபி மெட்டுகளுடன் நமது வரவேற்பறைக்கு வருகிறார்கள். ஆனால், அன்றைக்கு இப்படி ஒரு வசதி இருந்ததாகத் தெரியவில்லை. எம்.எஸ்.வி. தந்தால் அதுதான் பஞ்சாபி.

கல்நாயக் வந்திருந்த நேரத்தில் அல்காவின் தீவிர ரசிகனாகி சோலிகே பீச்சேயை உரத்த சத்தத்தில் வைத்துக் கேட்டு, 'தும்ஹாரே ஷொஹர்க்கு க்யா ஹோகயா' என பக்கத்து வீட்டு கராச்சி பாபிக்களிடம் துணைவியாரை பேச்சுக் கேட்க வைத்திருக்கிறேன். பிறகும் பாடலை விடாமல் ஹெட்ஃபோனை மாட்டிக்கொண்டு கேட்டதுண்டு. பாடலின் இறுதியில் லட்சுமிகாந்த் ப்யாரிலால் அடித்த ராஜஸ்தானி மேளஒலிக்கு இன்றைக்கும் நான் ரசிகன்.

அந்த மேளஒலி தருகின்ற கிறக்கத்திற்குச் சற்றும் குறையாத கிறக்கம் எனக்கு ஆடலுடன் பாடலைக் கேட்டுவின் கடைசியில் அடிக்கப்படும் பஞ்சாபி மேளஒலியிலும் கிடைக்கும். ஹெட்ஃபோனை மாட்டிக்கொண்டு கண்களை மூடிக்கொண்டால், எல்.விஜயலட்சுமி அம்மையார் பம்பரமாகச் சுழல்வது கண்களுக்குள் தெரியும். இடையில் வரும் புல்புல்தாரா (பேஞ்சோ) மெட்டிற்கும், தபேலாவின் பக்கத் துணைக்கும், அம்மையார் தலையைப் பக்கவாட்டில் திருப்பித் திருப்பி திமிராகப் பார்க்கும் பார்வையும் தவறாமல் ஒவ்வொரு முறையும் கண்களை மூடும்போது கண்களுக்குள் தெரியும்.

நுணுக்கமாகப் பார்த்து அவரது நடன அசைவுகள் பஞ்சாபியர் பாணியில் அமைக்கப்பட்டவைதானா எனச் சொல்லும் திறன் இப்போதும் எனக்கு இல்லை. ஆனாலும்,
'மன ஊஞ்சலின் மீது பூமழை தூவிட உரியவன் நீதானே' விற்கும்,
'உன் பாதையி லேநான் ஊர்வலம் வருவேன் புதுமையை நீ பாடு' விற்கும், ஒற்றைக்காலில் நொண்டியடிக்கும் பாவத்தில் ஒரு சுற்று சுற்றுவாரே அது அச்சு அசல் பஞ்சாபி பாணி என்பதை மட்டும் என்னால் கூற இயலும்.

இதனை எழுதுகின்ற இந்த நேரத்தில், எத்தனை அழகாக உரி-யவன் கருவிளம், புது-மையை கருவிளம். இரண்டு 'ஐ'கள் அருகருகில் வந்தபோதும் அது நிரையசையாகவே இருக்கிறது என எண்ணும் இந்த நேரத்தில், ஆசிரியர் ஹரியண்ணா அவர்களும், அய்யா மதுரபாரதி அவர்களும் இணையத்தில் யாப்பிலக்கணம் சொல்லித்தந்தபோது இந்த 'ஐ'யின் பயன்பாட்டைத் தெளிவாக விளக்கியது நினைவுக்கு வருகிறது.

பாடலில், வேண்டியதைப் பெறலாம் துணிவோடூஊ ஓஹொஹோய்ங் என இழுக்கும்போது இதனை எல்.ஆர்.ஈஸ்வரி பாடியிருந்தால் எப்படி இருக்கும் என்றும் சில சமயங்களில் நினைத்ததுண்டு.

மேலே சொல்லியிருக்கும் பாடல்களான நாம் ஒருவரை ஒருவர் சந்திப்போம் (ராமன் தேடிய சீதை), நான் மாந்தோப்பில் நின்றிருந்தேன் (எங்க வீட்டுப் பிள்ளை) பாடல்கள் மட்டுமல்லாமல் எம்.ஜி.ஆரின் சில பாடல்களை எல்.ஆரும் உடன் பாடியிருக்கிறார்.

உன் விழியும் என் வாளும் சந்தித்தால் (குடியிருந்த கோயில்)
துள்ளுவதோ இளமை (குடியிருந்த கோயில்)
கட்டோடு குழலாட (பெரிய இடத்துப் பெண்)
பவழக் கொடியிலே (ஹம்மிங் மட்டும் - பணக்காரக் குடும்பம்)
காலத்தை வென்றவன் நீ (சுசீலாவுடன் - அடிமைப் பெண்)
முத்தமோ மோகமோ (பறக்கும் பாவை)
[ஆஹ்ஹா..காஞ்சனா மேடம் - எல்.ஆர்.ஈஸ்வரின்னு ஒரு லிஸ்ட்டு போடலாம் போல இருக்கே. பட்டத்து ராணியும் இதுவும் மட்டுந்தானா இல்ல நெறைய்ய இருக்கா]
ருக்குமணியே (ஒளிவிளக்கு)

பொறுமையாக யோசித்தால் இந்தப் பட்டியல் இன்னமும் நீளும். (தேவைப்பட்டால் TFMஇலும் தேடிப்பார்க்கலாம், இன்னும் தேடவில்லை)

அரபு நாடுகளில் அவர்கள் பாணி நடன இசையைக் கேட்கும்போதெல்லாம் எனக்கு எல்.ஆரின் நினைவு வருவதை மட்டும் தவிர்க்க இயலவில்லை.

ஜோர்டான் சென்றிருந்தபோது ஒரு திருமண வரவேற்பில் அரேபிய இசையில் பாடலையும் பக்க வாத்தியத்தையும் கேட்டபோது எனக்கு, 'காடு சென்ற பூங்கொடி நாடு வந்த காரணம் ஒருமுறை எண்ணிப் பார்'தான் நினைவுக்கு வந்தது.

எகிப்தில் க்ளப் அல்லைல்இல் யாரோ ஒரு அம்மையார் திருமண விருந்தில் ஆடியபோதும் பட்டத்து ராணிதான் நினைவுக்கு வந்தது.

எனக்கு அப்படி ஒரு ஈர்ப்பு எல்.ஆரிடமும் இருப்பதால்தானோ என்னவோ ஆடலுடன் பாடலைக் கேட்டுவையும் எல்.ஆர். பாடியிருந்தால் எப்படி இருந்திருக்கும் என நினைக்கத் தோன்றுகிறது.

அன்புடன்
ஆசாத்