புத்தகக் கண்காட்சியும் நான் வாங்கிய புத்தகங்களும்

நண்பர்கள் பலர் புத்தகக் கண்காட்சி குறித்து எழுதியிருக்கிறார்கள். அவரவர் வாங்கிய பட்டியலும் படிக்கக் கிடைத்தன. எனது பார்வையையும், வாங்கிய புத்தகத்தின் பட்டியலையும் தர விருப்பம்.

பத்ரி அவர்கள் சொல்லியதைப் போல பல பதிப்பகத்தார் மெத்தனமாக இருந்தார்கள். வாடிக்கையாளர் வாங்குகின்ற புத்தகத்திற்கேற்ப அவருக்கு இன்னும் பல யோசனைகளைச் சொல்வது கிழக்கு பதிப்பகத்திலும், IFT(Islamic Foundation Trust)இலும் இருந்தவர்களே. மற்ற இடங்களில், வாங்கியதற்கு பில்போட்டார்கள், விளக்கங்கள் கேட்டால் அவர்களால் சொல்ல இயலவில்லை.

1.
நல்ல கஸ்டமர் சர்வீஸுக்கான உதாரணத்திற்கு IFTஇல் நிகழ்ந்த உரையாடல்:

'குர்ஆன் பதிப்பு ஒண்ணு எடுத்துக்கறேன்'

'ஹதீஸ் தமிழாக்கம் பாக்கறீங்களா. வேற எதுனாச்சம் டாபிக் பாக்கலாமா?
நெறைய டாப்பிக்ஸ் இருக்கு'

'இல்லைங்க இப்பத்திக்கு வேணாம்'

'வாங்க வேணாம். ஜஸ்ட் இன்·பார்மேஷனுக்காகப் பாருங்களேன்'

2.
மோசமான கஸ்டமர் சர்வீஸுக்கான உதாரணம்:

வைரமுத்து முதல் கலைஞர் வரையில் எல்லார் நூல்களும் கிடைக்கும் என்று போடப்பட்டிருந்த கடை.

'நெஞ்சுக்கு நீதி நாலு பாகமும் வேணும்'

'ம்ம்..எடுத்துக்கங்க'

புத்தகத்தை எடுத்து வைத்து கடனட்டையையும் வைத்தால்,

'கிரெடிட் கார்டு ·பெசிலிட்டி கெடையாதுங்க. கேஷ்தான்'

'பபாசில இருக்குங்க. ஒரு ஆளு அனுப்பினீங்கன்னா போய் தேச்சுட்டு வந்துரலாம்'

'ஆள் இல்லைங்க அனுப்ப'

ஆட்டோ செலவுக்கு வைத்துக்கொண்டு மீதிப் பணத்தை எடுத்துப் பார்த்தால், மூன்று பாகங்களே வாங்க முடியும் போல இருந்தது. வாங்கினேன்.

'பாத்தீங்களா, கிரெடிட் கார்டால உங்களுக்கு ஒரு புக்கு சேல்ஸ் போச்சு' எனது வாக்கியத்தை கடைக்காரர் ரசிக்கவில்லை. அடுத்த நாள் ஜித்தா புறப்படவேண்டும், நேரமில்லை என்ற கட்டாயத்தால்தான் அந்தக் கடையில் வாங்கினேன்; அவகாசம் இருந்திருந்தால் தவிர்த்திருப்பேன்.

3.
நல்ல கஸ்டமர் சர்வீஸுக்கான இன்னொரு உதாரணம்:

எனி இண்டியனில் நடந்த உரையாடல்:

'பிரசன்னா, வாலியோடது நானும் இந்த நூற்றாண்டும் வேணும்'

'இருக்கு பாய், இதோ எடுக்றேன்'

'மெல்லிசை மன்னர் எம்.எஸ்.வி.யும் வேணுமே'

'ஒரு காப்பி இருந்துச்சு, ஆனா போயிருச்சு, ஒரு சுத்து சுத்திட்டு வாங்க பாய் எங்கேர்ந்தாவது வாங்கி வைக்கிறேன்'

காபி குடித்துவிட்டு வருவதற்குள் புத்தகத்தை எங்கிருந்தோ கொண்டு வந்து தயாராக வைத்துவிட்டார்.

கண்காட்சியில், 'கொற்றவை' எனி இண்டியனுக்கு வரவில்லையென்ற போதும், கொற்றவையை பதிப்பகத்தில் வாங்காமல் எனி இண்டியனில் வாங்கவேண்டும் என நினைத்துக்கொண்டேன்.

தோ கீது டீ.நகரு. நம்ம பசங்கள அனுப்ச்சா வாங்கியாந்து, ஜித்தா வர்ர அடுத்த பார்ட்டி கைல குடுத்தனுப்பிருவாங்க :)
*

நான் வாங்கிய புத்தகங்கள்:

கண்காட்சியில்:
1. நெஞ்சுக்கு நீதி - கலைஞர் - இரண்டு, மூன்று, நான்கு பாகங்கள் - திருமகள்
2. சுஜாதாவின் புத்தகங்கள் இரண்டு (துணைவியாரின் தேர்வு) - உயிர்மை
3. சித்திரம் பேசுதடி - தியோடர் பாஸ்கரன்
3. சந்திரபாபு - முகில் - கிழக்கு
4. எடிசன் - இலந்தையார் - கிழக்கு
5. ஹஜ் - ஆசாத் :) - கிழக்கு
6. குர்ஆன் தமிழாக்கம் - IFT
7. ஹமாஸ் - சொக்கன் - கிழக்கு
8. நபிகள் நாயகக் காவியம் - அப்துற் றகீம் - யுனிவர்சல்
9. எம்.ஜி.ஆருடன் எனக்கிருந்த தொடர்பு - ம.பொ.சி. - பூங்கொடி
10. மெல்லிசை மன்னர் எம்.எஸ்.வி. - ராணிமைந்தன் - ராஜராஜன் (எனி இண்டியன் வழியாக)
11. நானும் இந்த நூற்றாண்டும் - வாலி - கலைஞன் (எனி இண்டியன் வழியாக)
12. எதிர்காலம் என்று ஒன்று - தொகுப்பு - எனி இண்டியன்

நடைபாதையில்:
13. புகழேந்தியின் நளவெண்பா
(நானு செலக்ட் பண்ணேன். ரெண்டு புக்கு எடுத்து, நண்பர் சொக்கன் காசு குடுத்துட்டு, நமக்கு ஒண்ணு கி·ப்ட் பண்ணிட்டாருங்கோவ்)

லேண்ட்மார்க்கில்:
14. The Shade of Swords - M.J.Akbar
(ஹிண்டுவில் விமர்சனம் படித்ததால் பி.கே.கரஞ்சியாவின் Counting My Blessingsஐத் தேடித்தான் போனேன்.
கவிதை வாங்கப் போனேஏன் ஒரு காற்று வாங்கி வந்தேஏன்)
15. Hand writting analysis (மகளின் தேர்வு)
16. Body language (மகளின் தேர்வு)

அன்புடன்
ஆசாத்