Skip to main content

Posts

சிக்கன் ஆஃப்கானியும் சில எண்ணங்களும்

வழமையான சிக்கன்65, பட்டர் சிக்கன், சில்லி சிக்கன் ஆசாமிகளுக்கு சிக்கன் ஆஃப்கானி பிடிக்காது. புளிப்பு, காரம், துவர்ப்பு இவற்றைக் கலந்துகட்டி அரைத்தால் என்ன சுவை வருமோ அப்படியான மாறுபட்ட சுவையாக இருக்கும். மசாலாவுடன் சேர்த்து கொஞ்சம் பாக்கையும் அவர்கள் அரைக்கின்றார்களோ என்னும் சந்தேகம் வரக்கூடும். கொஞ்சம் கொஞ்சமாக நாக்கு சுவையறிந்து மூளைக்கு தகவல் அனுப்பிய பின்னரே அந்தத் துவர்ப்பு ஏலக்காயை அரைத்துப் போட்டதால் உண்டானது விளங்கும். நிறத்தை விடுத்து அமைப்பை மட்டும் பார்த்தால் நமது செட்டிநாடு உணவகங்களில் கிடைக்கும் சிக்கன் போன்லெஸுடன் ஒத்துப்போகும். இந்தப் பதார்த்தத்தில் கோழிக்கறியை எலும்புடன் போடுவதா எலும்புகளை நீக்கிவிட்டுப் போடுவதா என்னும் விவாதங்கள் பாகிஸ்தானிய அரசியல் விவாதங்களை விட அதிசிக்கலானவை, அதனால் தேவையற்றவை. நான் எப்பொழுதாவது சாப்பிடும் துபாய் சில்வர் ஈகிள் உணவகத்தில் எலும்புகளை நீக்கிவிட்டுத்தான் சமைக்கிறார்கள். எலும்புகள் நீக்கப்பட்ட மாமிசத்தை சாப்பிடுவதில் அப்படியொன்றும் பேரானந்தம் கிடைப்பதில்லைதான், ஆனாலும், என்னளவில் சிக்கன் ஆஃப்கானி மட்டும் அதற்கு விதிவிலக்கு. மிளகுக் காரமு...

சென்னை கானா - புத்தகம் எனது பார்வையில்-2

சென்னை கானா புத்தகம் - எனது பார்வையில்-1 வடசென்னை விளிம்புநிலை மனிதர்களின் வாழ்வுடன் இரண்டறக் கலந்துவிட்ட காவல் நிலையங்களும், அரசு மருத்துவமனைகளும் கானாக்களில் காணக்கிடைக்கும்போது அவை அறிமுகப்படுத்தும் சென்னையின் இன்னொரு முகம் கிழக்குக் கடற்கரைச் சாலைக்கும் அடுக்கு மாடிக்குடியிருப்புகளுக்கும் அன்னியமானது. நீ குடிச்சுப்புட்டு கலாட்டாப் பண்ணா புடிச்சுருவாரு அந்த போலீஸ்காரு! லாக்கப்புல அடச்சுருவாரு! ஜாமீனுண்ணு வந்தாலும் மாலு நீ தந்தாலும் வைத்திருக்கும் எஸ்.பி. உன்னை விடமாட்டாரு! * அரசாங்க ஆசுபத்திரி அங்கே ரேஷன் கடை மாதிரி ஆயிரக்கணக்கு ஜனங்க நிக்கிதுங்க அஞ்ஜி ரூபா நோட்டக் காட்டு எல்லோருக்கும் முன்ன போயி டாக்டர் முகம் பாக்கலாமுங்க! (பவுராஸ் பாண்டியன்) எஸ்.பி., எஸ்.ஐ., ஏட்டு, மஃப்டி, அக்யூஸ்ட்டு, ஏ2, ஜாமீன், பெயிலு, கஸ்டடி, தொகுதி, பகுதி, வார்டு, சார்பட்டா இப்படியான வார்த்தைகளுள் ஏதாவதொன்றை நிமிடத்தில் ஒருமுறையேனும் உபயோகிக்கும் மக்களின் வாழ்க்கை முறையின் ஒரு சிறிய கீற்றாக பவுராஸ் பாண்டியனின் மேற்கண்ட வரிகளைக் காண முடிகின்றது. பவுராஸின் வரிகளாக புத்தகத்தில் அச்சாகியிருக்கும் சில வரிகள் உண்மை...

ஒரு பாடலும் சில நண்பர்களும்

செல்பேசியில் வந்த எண் புதிதாக இருந்தது. அலுவலகம் தொடர்பான அழைப்புகளே பெரும்பாலும் என்பதால், வழமையான முகமனுடன் துவங்கினேன். "பேசறது யாரு தெரியுதா?" மறுமுனையில். "தெரியலீங்களே" "என்னங்க ஆசாத், உங்க பாட்ட இப்பத்தான் சென்னை சங்கமத்துல பாடுனேன், தெரியலேன்றீங்களே!" "அடடே இறையன்பனா? சரியாப்போச்சு. என்ன விசிட்ல வந்துருக்கீங்களா?" "இல்ல. இங்க ஒரு இசை நிகழ்ச்சிக்கு வந்திருக்கேன்" அவசியப்பட்ட விசாரிப்புகளுக்குப் பின், துபாய் நிகழ்ச்சியில் பாடுவதற்கு இரண்டொரு வரிகள் எழுதித் தரவேண்டுமென்று கேட்டுக்கொண்டார். புதன்கிழமை இரவு செல்பேசியில் வர்ணமெட்டை வாங்கிக்கொள்வதான திட்டம் நிறைவேறாமற்போனது. அன்று ரினைசன்ஸில் துபாய் ட்ரம்ஸ்ஸின் அதிரடிநடைகளில் லயித்துவிட்டு நண்பருடன் ஷார்ஜா சென்று திரும்புவதற்குள் நள்ளிரவாகிவிட்டது. அதற்குமேல் இறையன்பனை அழைத்து மெட்டைக் கேட்டு பாடல் எழுதும் மனநிலையில் இல்லை. வியாழன் மாலை பார்த்துக்கொள்ளலாம் என விட்டுவிட்டேன். வியாழன் மதியம் வழமையான குட்டித் தூக்கத்திற்குப் பின் நண்பரை செல்பேசியில் அழைத்து மெட்டை உள்வாங்கி அவசரம் அவசர...

சென்னை கானா - புத்தகம் எனது பார்வையில்-1

உதிரிப்பாட்டாளிகளின் கலாசார விளிம்புநிலைக் கலகக் குரல் - இப்படித்தான் கானாவை அடையாளப்படுத்துகிறார் புத்தகத்திற்கு அணிந்துரை வழங்கியிருக்கும் வே.மு.பொதியவெற்பன். அடித்தள மக்களின் இறப்புச் சடங்குகளில் மட்டுமே பாடப்பட்டு, இறந்தவர் குறித்த செய்திகளை ஒப்பாரி வழியாகத் தருவதற்கும் சற்று மேலே சென்று ஆர்ப்பாட்டமில்லாத, சோகமான, தன்னிச்சையான மெட்டுகளில் வாழ்வின் நிலையாமை குறித்த தத்துவங்களைப் பாடி, பிறகு இடையிடையே சோகத்தை மட்டுப்படுத்த தத்துவம் தவிர்த்து மற்றவற்றையும் சேர்க்கத் துவங்கி கானாக்கள் வரத்துவங்கின. கானாக்களை கல்லூரி மாணவர்கள் தங்கள் கைகளில் எடுத்துக்கொண்ட பிறகு அது கண்ட வளர்ச்சி அபாரமானது. திரையிசையிலும் கானா முயற்சிகள் தொடர்ந்து வந்தவண்ணம் இருக்கின்றன. எந்தப் படைப்பிற்கும் துவக்கத்தில் இருக்கின்ற இலக்கணம் நாளடைவில் மாறி அதுவாக வேறு திசையில் பயணம் செய்யும் நிகழ்வு கானாவிற்கும் நிகழ்ந்தது. தத்துவங்களாலும் விரக்தியாலும் அறிவுரைகளாலும் நிரப்பப்பட்டு வந்த கானா வரிகளில் காதலும் நகைச்சுவையும் கலந்தன. வை.இராமகிருஷ்ணனால் தொகுக்கப்பட்டு 2004ம் வருடம் வெளியான இந்தப் புத்தகத்திலுள்ள கானாக்களைப் ப...

சுஜாதா

கொலையுதிர்காலத்தையும் வசந்தகாலக் குற்றங்களையும் ரசித்துப் படித்திருக்கிறேன். அவருடைய தீவிர வாசகர்கள் ஓரிருவர் நண்பர்களான பிறகு நைலான் கயிற்றைத் தேடிப்பிடித்துப் படித்திருக்கிறேன். கனவுத்தொழிற்சாலையின் திரைக் கவிஞர் அருமைராசன் கதாபாத்திரத்தை மறக்க வாய்ப்பே கிடையாது. நிமிஷா நிமிஷா நிமிஷா, நில்லுங்கள் ராஜாவே எல்லாம் ஈர்த்திருக்கின்றன. திரைக்கதையில் படுகொலை செய்யப்பட்ட பிரியா, கரையெல்லாம் ஷெண்பகப்பூ வகையறாக்கள், சிறுநீரக மாற்று அறுவை சிகிச்சை - தானம் தொடர்பான கதையானது திரைக்காக இதயமாற்று அறுவை சிகிச்சையாகிப் போகும் அபாயம் உள்ள காகிதச் சங்கிலி, ராஜராஜன் கிணறு, பேசும் பொம்மைகள் இப்படியாக வார இதழ்களில் அவர் எழுதிய தொடர்களைப் படித்து, கதைகள் குறித்து அரட்டை அடித்து, இன்று வரையில் சுஜாதா வாசகனாக (வார இதழ்கள், நாவல்கள்) இருக்கிறேன். எழுத்துகளின் பல பரிமாணங்கள் அறிமுகமான பிறகு பார்வைகள் பரந்து, வாசிப்பு அனுபவத்தின் எல்லைகள் விரிந்துகொண்டே செல்லலாம். அப்பொழுது துவக்கத்தில் நிகழ்ந்த வாசிப்பு அனுபவங்கள் குறித்து பல கேள்விகள் எழலாம், அது வேறு. பலருக்கு சுஜாதா அவர்களின் எழுத்து வாசிப்பு அனுபவத்தின் து...

இசைநிகழ்ச்சிப் புன்முறுவல்கள்

ஒலிவழங்கியைக் காதுகளில் மாட்டிக்கொண்டு கண்களை மூடிக்கொண்டால் கிடைக்கும் இன்பத்தைவிடவும் அதிகமாக ரசனைக்குத் தீனி போட இசைநிகழ்ச்சிகளால் முடியுமா? எனது பார்வையில் முடியாது; ஆனால், இசைநிகழ்ச்சி மேடைகளில் உதிர்க்கப்படும் சில சின்னச்சின்ன புன்னகைகள் போடவைக்கும் 'அடடா'க்களுக்கும் 'ஆஹா'க்களுக்கும் விலை கிடையாது. திரையில் 'வாசமில்லா மலரிது வசந்தத்தைத் தேடுது' பாடலில் ஒரு இசைக்கலைஞர் தனது வாசிப்பிற்குப் பின் சிந்திய புன்னகை இன்னமும் நினைவில் இருக்கிறது. தொலைக்காட்சியில் அநேகமாக அது சொக்குதே மனம் நிகழ்ச்சி என நினைக்கிறேன். 'ஜல் ஜல் ஜல் எனும் சலங்கை ஒலி' யைப் பாடிக்கொண்டிந்த பெண்மணி பின்னணி இசையில் அட்டகாசப்படுத்திய தபேலாக்காரரைப் பார்த்து புன்னகைத்தார். அந்த வாசிப்பை அங்கீகாரப்படுத்த அதைவிடவும் சிறந்த பரிசு அந்த மேடையில் எதுவாகவும் இருக்கமுடியாது. அந்தப் புன்னகையையும் மறக்க முடியாது. என்றோ நடைபெற்ற தெருவோர இசைக்கச்சேரியில் 'இன்பமே உந்தன் பேர் பெண்மையோ' வின் பல்லவியில் ஒலிக்கும் காங்கோ அடிக்குப் பின் அந்தக் கலைஞரும் இசைநடந்துனரும் பரிமாறிக்கொண்ட புன்னகை நீண...

ஆஸாதி எக்ஸ்பிரஸ் - சென்னை சென்ட்ரல் இரயில் நிலையத்தில்

"AZADI EXPRESS" NOW IN TAMILNADU என வெளியாகியிருந்த விளம்பரம், கண்காட்சியின் தேதிகளையும் நேரத்தையும் சொல்லியிருந்தது. பள்ளிக்கூடத்திலிருந்து வந்த குழந்தைகள் விவரங்களைச் சொன்னார்கள். பள்ளியில் விவரம் சொல்லி அனுப்பியிருக்கிறார்கள். சென்ட்ரல் இரயில் நிலையம், பிளாட்பாரம் எண்-11. ஆஸாதி எக்ஸ்பிரஸ் உபயத்தில் பிளாட்பாரம் டிக்கெட் இல்லாமலே சென்ட்ரலுக்குள் நுழைந்து வெளிவர முடிந்தது. சிப்பாய்க் கலகத்தின் 150வது ஆண்டைச் சிறப்பிக்கும் வகையில் இந்திய விடுதலைப் போராட்டத்தின் முக்கியமான சில குறிப்புகளையும், சில அரிய புகைப்படங்களையும், இந்தியக் குடியரசு அமைந்ததையும், இந்தியாவின் வெற்றிப் பாதையையும், புகைப்படங்களால் கண்காட்சியாக இரயில் பெட்டிகளில் அமைத்து, அந்தப் பெட்டிகள் இந்தியாவிலிருக்கும் முக்கியமான இரயில் நிலையங்களுக்குச் சென்று மக்களின் பார்வைக்கு வைக்கப்படுகின்றன. கண்காட்சிகள் தொடர் இரயில் பெட்டிகளுக்குள் அமைக்கப்பட்டிருக்கின்றன. முதல் பெட்டியில் ஏறி ஒவ்வொன்றாகப் பார்த்து முடித்து கடைசிப் பெட்டியிலிருந்து வெளியே வருகின்ற அமைப்பு. பெட்டிகளின் பெயர்கள்: 1.Kampany Raj (Company Raj அல்ல) 2...