டோஸ்ட்மாஸ்டர்ஸ் பதவிக்காலமும் கொஞ்சம் தற்பெருமையும் :)

மாதத்தின் ஒவ்வொரு முதல் புதன்கிழமைகளிலும் / மூன்றாவது புதன் கிழமைகளிலும் ஒரு சந்திப்பு, ஒவ்வொரு சந்திப்பிலும் ஐந்து நிமிடம் தலைமை உரைக்கான வாய்ப்பு, விடுமுறை நாள்களான 30 + 10 இல் வருகின்ற தோராயமான மூன்று புதன்களைக் கழித்தால், ஆண்டுக்கு இருபத்தியொரு முறை மேடையேறுகின்ற வாய்ப்பு. ஒருமுறைக்கு ஐந்து நிமிடங்களென்றபோது, மொத்தமாக ஆண்டொன்றில் ஒருமணி நேரமும் நாற்பத்தைந்து நிமிடங்களும் மேடையில் பேசுகின்ற வாய்ப்பு யாருக்குக் கிடைக்கும்.

ஏதாவதொரு டோஸ்ட்மாஸ்டர்ஸ் குழுமத்தில் தலைவராக இருந்தால் கிடைக்கும்.

எனக்குக் கிடைத்தது.

எனது தனித்திறனை வளர்த்துக்கொள்ளவும், ஆர்வம் இருப்போர்களைக் குழுவில் அங்கத்தினராக்கி அவர்களின் பேச்சுத்திறனை வளர்க்கவும் இந்தப் பதவி உதவியது. முப்பது உறுப்பினர்கள் கொண்ட சிறிய குழுமம்தான். வெவ்வேறு பணிகளில் வெவ்வேறு வேலைகளில் இருப்பவர்களாதலால், ஒவ்வொரு சந்திப்பின்போதும் இரண்டு வாரங்களில் அனுபவித்த ஒற்றைத்தொனியில் (monotone) கொஞ்சம் மாற்றம் ஏற்பட்டு, புத்துணர்ச்சி போன்ற ஒன்று கிடைக்கும். புத்துணர்ச்சி என்று சொல்லமாட்டேன், ஒற்றைத்தொனியை விலக்கிய ஒரு உணர்வு.

சென்ற மாதம் 22ம்தேதி முதல் அடுத்த தலைவரிடம் பொறுப்புகளைத் தந்துவிட்டு, இப்போது வட்டத்திற்குச் சென்றுவிட்டேன். டோஸ்ட்மாஸ்டர்ஸில் அப்படித்தான். ஒரு இடத்தில் பணி முடிந்ததும் குழு, தொகுதி, வட்டம், மாவட்டம், மாநிலம், நாடு என்று போய்க்கொண்டே இருக்கும். உலகெங்கும் தொண்ணூறு நாடுகளில் பத்தாயிரத்தைனூறு குழுமங்கள் கிளைட்டிருக்கின்றன என்றால் பார்த்துக்கொள்ளுங்களேன்.

இதனாலெல்லாம் நானென்னவோ மேடைப்பேச்சு வித்தகன் என்பது பொருளளன்று. மேடைப்பேச்சில் ஆர்வம் உள்ளவன் என்பது வரையிலேயே உண்மை.

டோஸ்ட்மாஸ்டர்ஸைப் பொறுத்தவரையில் உத்திகளையும், கருத்தையும் மட்டுமே பார்பார்களாதலால் உங்கள் பின்புலம் குறித்த எந்தக் கேள்வியும் எழாது. மேலும், டோஸ்ட்மாஸ்டர்ஸின் எந்த உரையிலும் பாலியல், மதம், அரசியல் இம்மூன்றைக் குறித்தும் பேசவே கூடாதென்பதால், சிற்றுரையால் ஏற்படும் கருத்து வேறுபாடென்பது எழுவதற்கு வாய்ப்புகள் இல்லை.

டோஸ்ட்மாஸ்டர்ஸ் விடுத்த மற்ற அவைகளில் பேசும்போதுதான் கத்திமேல் நடப்பதான உணர்வு. சம்பிரதாயமாகத் துவங்கினால் சிலருக்குப் பிடிக்காது, பாடல் வரிகளை எடுத்துக்கொண்டு ஒவ்வொரு வரியாகச் சொல்லி நமது ரசிப்புத் தன்மையைச் சொன்னால் சிலர் முகம் சுளிப்பார்கள். இணையத்தில் தேடி இதற்கென்று பண்டைத் தமிழ் படைப்புகளிலிருந்து பாடல்களை மேற்கோளாகச் சொன்னால் சிலர் ரசிப்பார்கள் - சிலர் ரசிக்கமாட்டார்கள். யார் யார் கூட்டத்தில் அமர்ந்திருக்கிறார் என்பதே தெரியாது.

எதைப் பேசினாலும், நன்றாகத் தெரிந்த ஒன்றைப்பற்றியே பேசுவது நல்லது. அதாவது, ஒரு தலைப்பில் அரைமணிநேரம் பேசுவதற்கான குறிப்புகளை எடுத்துக்கொண்டு, அதிலிருந்து ஐந்து நிமிடத்திற்கான குறிப்புகளை மட்டுமே உபயோகித்துக்கொள்வது நல்லது. இது எனக்குப் பிடித்தமானது. ஏனென்றால், பேசி முடித்த பின்னர் விவரமறிந்தோர்கள் நம்மைச் சுற்றிலும் நின்று அதே தலைப்பில் விவாதிக்க வாய்ப்பு உண்டு. ஐந்து நிமிடம் வரையில்தான் பேசுவதற்கு நம்மிடம் விஷயம் இருந்தது, அதற்கு மேல் இல்லையெனும் பட்சத்தில் நமது மதிப்பு பார்வையாளர்களிடம் குறைந்து போக வாய்ப்பு உண்டு.

டோஸ்ட்மாஸ்டர்ஸுக்கு வருகிறேன். பதவிக்காலத்தை வெற்றிகரமாக முடித்து அடுத்தவர்களிடம் பொறுப்புகளைத் தந்த அந்நிகழ்ச்சி நேற்றைக்குதான் 'community watch' பகுதியில் வெளியானது. இணையப் பதிப்பில் கம்யூனிட்டி வாட்ச் இல்லாததால் சுட்டி கொடுக்க முடியாது. அதனால், செய்தியின் நகலை வலையேற்றியிருக்கிறேன். புகைப்படத்தில் என்னைத் தேடாதீர்கள். இது புதிய நிர்வாகக் குழுவின் புகைப்படம். நகல் சரியாக இல்லையென்றால் திட்டாதீர்கள். சல்தாஹை சொல்லிவிடுங்கள் :)



சவூதி கெசட் நாளிதழுக்கு நன்றிகள்.

வருடத்தில் ஓரிருமுறைகள் இப்படி நகரச்செய்திகளில் பெயரைக் காட்டும் வாய்ப்பு கிடைக்கிறது. இதனினும் இன்னும் ஒருபடி மேலே போக முயற்சி செய்கிறேன். நிறைவேறும், இன்ஷா அல்லாஹ்.

அன்புடன்
ஆசாத்