சுட்டாச்சு சுட்டாச்சு - புத்தகம். எனது பார்வை

சுட்டாச்சு சுட்டாச்சு (புத்தகம்)

எம்.ஜி.ஆர். - எம்.ஆர்.ராதா குண்டடி வழக்கு குறித்த புத்தகம் இது.

திருவல்லிக்கேணி, ராயப்பேட்டை பகுதிகளில், குறிப்பாக, ஜானிஜான் கான் தெரு, டாக்டர் பெசன்ட் சாலை, ஷேக்தாவூத் தெரு பகுதிகளில் வாழும் நாற்பது + வயதில் இருக்கும் அனைவருக்குமே அந்தப் பகுதியில் நிகழ்ந்தவை ஒரே பாதிப்பை உண்டாக்கியிருக்குமோ. சுதாங்கன் அவர்களின் புத்தகத்தைப் படிக்கையில் அப்படித்தான் தோன்றுகிறது.

"உம்மா, அங்க போனாலும் அவரைப் பாக்க முடியாது. போலீசு கட்சிக்காரங்கன்னு பெரிய கூட்டம். ஆஸ்பத்திரி கிட்டவே போவமுடியாதுன்னா கேளேன்"

"எல, என்ன நீ அங்க கூட்டிட்டுப் போவப்போறியா இல்ல நானே போவவா. தோ இருக்கு ஆஸ்பத்திரி"

எம்.ஜி.ஆர். அவர்கள் குண்டடிபட்டு ராயப்பேட்டை மருத்துவமனையில் சேர்க்கப்பட்டிருந்தபோது எங்கள் பகுதியில் (ஆறு வயதில்) நான் கேட்ட உரையாடல்களில் இதுவும் ஒன்று. இப்படிப்பட்ட உரையாடலைக் கேட்ட அனுபவம் அந்தப்பகுதியில் வசித்தவர்களுக்கு அனேகமாக இருந்திருக்கும்.

இதுபோன்ற நிகழ்வை, புத்தக ஆசிரியர் சுதாங்கன் அவர்களும் கண்டிருக்க, அந்த நிகழ்விலிருந்துதான் ஒரு நாவலைப் போல சுட்டாச்சு சுட்டாச்சு துவங்குகிறது. ராயப்பேட்டை சுற்று வட்டாரம், அங்கிருக்கும் 'போர்ஷன்' வகை குடியிருப்புகள், வாழ்க்கை முறைகள், ஷேக் தாவூத் தெரு அரசியல் பொதுக் கூட்டங்கள் போன்றவற்றின் விவரிப்புகளை வாசித்து அனுபவிக்க திருவல்லிக்கேணியில் வளர்ந்திருக்கவேண்டுமென்ற அவசியம் இல்லை. புத்தகத்தின் மூலக் கருவான 'சுட்டாச்சு'விற்குச் செல்லு முன்பே வாசகர்களுக்கு சென்னையின் ஒரு பகுதியின் அறிமுகம் கிடைத்துவிடும்.

தமிழகத்தின் முக்கியமான அந்நிகழ்வின் ஊடே 'நந்தா' என்னுக் கற்பனைப் பாத்திரத்தை உலவவிட்டு நந்தாவே நிகழ்ச்சிகளை விவரிப்பதாகப் புத்தகம் செல்கிறது. சுதாங்கன் அவர்கள் பத்திரிகையாளராக இருப்பதால், தான் பத்திரிகையாளராக அந்நேரத்தில் இருந்திருந்தால் அவரது அணுகுமுறை இந்நிகழ்வில் எப்படி இருக்கும் என்பதன் அடிப்படையில் புத்தகத்தை எழுதினாரோ என்னும் நினைப்பும் தோன்றுகிறது.

மருத்துவமனையிலிருந்து துவங்கி, விவரிப்பு, மெதுவாக வழக்கின் பின்னணியை ஆராய நம்மை 1967இற்குக் கொஞ்சம் முன்னே பின்னே, எம்.ஜி.ஆர். - எம்.ஆர்.ராதா இவர்களின் கலைத்துறை நடப்புகள் எப்படி இருந்ததென்னும் விவரத்திற்குச் செல்கிறது.

அத்தியாயம் பன்னிரண்டில் இருந்து இருபத்தியிரண்டு வரையில் ஐம்பது பக்கங்கள் எம்.ஜி.ஆர். - எம்.ஆர். ராதா இருவரின் பனிப்போரை முதலில் இருந்தே விளக்கும் வகையில் எம்.ஆர்.ராதாவின் கலைத்துறை வாழ்க்கை அலசப்படுகிறது. ராதா, அவரது துணிச்சல், அரசியல் தலைவர்களுடன் அவருக்கு இருந்த தொடர்பு, அப்போதைய அரசு அவரது நாடகத்திற்கு விதித்த தடைகள் வழியாக, குண்டடிக்குக் காரணமான சர்ச்சையான 'தொழிலாளி' திரைப் பட வசனத்திற்கு வரவும், எதுவோ விறுவிறுப்பான
நாவலைப் போல வழக்கின் அடுத்த கட்டத்திற்கு அழைத்துச் செல்கிறது.

பிறகு விவரங்கள். குறுக்கு விசாரணைகள், வாக்குமூலங்களெல்லாம் 'கற்பனை நடையில், அத்தனைனயும் உண்மை' என்று அட்டையில் சொல்லப்பட்ட குறிப்பினை, வாசிப்பு அனுபவம் கொஞ்சம் மறக்க வைத்தது. நீதிமன்ற விவாதங்கள் கற்பனை நடையாகவே தோன்றவில்லை.

அந்தக் கால திரைத்துறை, அரசியல், காவல்துறை, நீதித்துறை அனைத்தையும்தொட்டு சுகமாக அறுபதுகளுக்கு பின்னோக்கிச் சென்று வரலாம்.

வழக்கின் தீர்ப்பிற்குக் காரணமாக இருந்தவை:
எம்.ஜி.ஆர்., எம்.ஆர்.ராதா, வாசு இம்மூவரின் வாக்குமூலங்கள், ராதா அவர்களின் வாக்குமூலத்தில் இருந்த முரண்பாடு, துப்பாக்கி, அதிலிருந்து வெளியான குண்டுகள், சுட்டபோது மூவரும் இருந்த நிலை (பொசிஷன்), ஆடையில் படிந்த ரத்தக் கறைகள், எம்.ஜி.ஆர். அவர்கள் காமராஜரைக் கொல்ல சதித் திட்டம் தீட்டியதான செய்தி (இது வதந்தி என மறுக்கப்பட்டுள்ளது), அதனால் கோபமடைந்த எம்.ஆர்.ராதாவின் மனநிலை, எம்.ஜி.ஆர். - எம்.ஆர்.ராதா இருவருக்கும் ஏற்கெனவே இருந்த பனிப்போர்.

தீர்ப்பு முடிந்ததும், ஒரே பக்கத்தில் நந்தா பாத்திரத்தை முடித்து சரியே. வழக்கின் சிந்தனையிலிருந்து வாசகர்கள் நந்தாவின் மேல் ஈர்ப்பு கொள்ளாமல் இருக்க அப்படி முடித்தது நல்லதாகவே தோன்றுகிறது. நந்தாவின் வருகையே வழக்கை சுவாரசியமாகச் சொல்லத்தானே, அது முடிந்ததும் அவரும் வாசகர்களை நோக்கி கையசைத்துவிட்டு உடனே விடைபெறுவதுதான் முறை.

சுட்டாச்சு சுட்டாச்சு
ஆசிரியர்: சுதாங்கன்
கிழக்கு பதிப்பகம்
விலை: ரூ. 120

அன்புடன்
ஆசாத்