மீனா குமாரி

அஜ்மானில் சுற்றிவிட்டு எமிரேட்ஸ் நெடுஞ்சாலையில் பயணித்து ராஷிதியா, விமான நிலையம் என வலம் வந்து பழைய தழல் வட்டச்சுற்று (பிளேம் ரவுண்ட் அபவுட்) புதிய டனாட்டா நிறுத்தம் கடந்து கடிகாரக் கோபுரத்தை அடையுமுன் ஒரு விவரத்தை பண்பலையில் கேட்டேன். மீனா குமாரியின் இயற்பெயர் மஹ்ஜபீன். தந்தையார் அலி பக்ஷ், தாயார் இக்பால் பேகம். குழந்தையாக இருக்கும்போதே பார்சி திரையில் குழந்தை நட்சத்திரமாகத் தோன்றியிருக்கிறார்.

மேற்சொன்னது இணையத்தில் கிடைக்கக்கூடிய தகவல்கள்தான். அடுத்து சொன்னது இணையத்தில் அவ்வளவு எளிதில் கிடைக்ககூடிய தகவல் அன்று.

குழந்தையாக நடிக்க முடியாமலும் குமாரியாக நடிக்க முடியாமலும் இருந்த பருவத்தில் இரண்டு வருட ஓய்விற்குப் பின் மீனா குமாரி என்னும் பெயருடன் இந்தித் திரையில் நட்சத்திரமாகியிருக்கிறார். இவர் நடித்து வெளிவந்த முதல் இரண்டு படங்களுமே தோல்வியடைந்திருக்கின்றன. மூன்றாவது
படத்திலிருந்துதான் வெற்றி கிடைத்திருக்கிறது. அநேகமாக படத்தின் பெயர் மத்ஹோஷ்.

இன்னொரு விவரம் வானொலியில் வரும்போது எனது வண்டி கடிகாரக்கோபுர வட்டச்சுற்றுள் நுழைந்து வலது திரும்பி அபூபக்கர் சித்தீக் சாலையில் பயணிக்கவேண்டும் இந்த இடத்து வெள்ளிக்கிழமை நெரிசலை துபாய் நண்பர்களிடம் கேட்டால் சொல்வார்கள். அப்படியான நெரிசலில் படத்தின் பெயரில் அத்தனை கவனம் செல்லவில்லை. அந்தப் படத்தில் அவரது விரலில் அடிபட்டிருக்கிறது, அநேகமாக விரலை எடுத்திருக்கிறார்கள். அதன் பின்னர் அவர் எந்தப் படத்தில் நடித்தாலும் முந்தானையால் கைகளை மூடிவைத்தே இருந்திருக்கிறார்.

ஐஎம்டிபியிலும், விக்கியிலும், மீனா குமாரியின் ஆரம்பகாலப் படங்களின் தகவல்கள் கிடைக்கவில்லை. தேடிப்பார்க்கவேண்டும்.

மீனா குமாரி என்னைப் பாதித்தது, பாக்கீஸாவில். அதன் பாதிப்பாலும் இன்னும் சில பாதிப்புகளாலும் முஜ்ரா என்னும் சிறுகதையை எழுதினேன்.

*

தமிழன் வேணு எழுதியது:

"ந ஜாவோ சைய்யா சுடாக்கே பையா..கசம் தும்ஹாரி மே ரோப்படூங்கி..ரோப்படூங்கி" (கையை விடுவித்து விட்டுப் போகாதே அன்பே! உன் மீது ஆணை,நான் அழுதுவிடுவேன்) ஏறக்குறைய இது தான் பொருள் என்று நினைக்கிறேன். ஆனால், இந்தப் பாடலைப் பார்த்தால், மீனாகுமாரி அழுகிற மாதிரியா தெரிவார்? சாஹிப்-பீவி அவுர் குலாம் படத்தில் இந்தப் பாடலைக் கேட்டு ரஹ்மான் வசியப்பட்டாரோ இல்லையோ, கேட்கிற ரசிகர்கள் கண்டிப்பாக வசியப்பட்டார்கள்.

ஹிந்தித் திரைப்படங்களைப் பொறுத்தவரைக்கும் திலீப் குமார் "Tragedy King" என்றால், மீனாகுமாரி தான் "Tragedy Queen,' என்று எண்ணுகிறேன். ஆனால், ஒரு வேடிக்கை பாருங்கள்; திலீப் குமார்-மீனாகுமாரி இருவரும் சேர்ந்து நடித்த கோஹினூர் என்ற திரைப்படம் படு ஜாலியான படம். கத்திச்சண்டை, குதிரையில் துரத்துவது, விழுதைப் பிடித்துத் தொங்கிப் போவது என்று பழைய ரஞ்சன் படங்களைப் பார்ப்பது போலிருக்கும் அந்தப் படம்.

பகீஸா - மறக்கவே முடியாத படம். ’சல்தே சல்தே.." பாடல் இப்போது கேட்டாலும் தாளம் போடத்தோன்றும்.

தமிழில் வெளிவந்த ’நெஞ்சில் ஓர் ஆலயம்,’ ஹிந்தியில் ’தில் ஏக் மந்திர்’ என்ற பெயரில் வந்தபோது அதில் தேவிகாவின் பாத்திரத்தில் நடித்தவர் மீனாகுமார். ’என்ன நினைத்து என்னை அழைத்தாயோ?’
என்ற பாடலுக்கு இணையாக, ’ருக் ஜா..’ என்ற பாடலும் ஹிந்தியில் கண்களைக் ளமாக்கியதென்றால், மீனாகுமாரியின் நடிப்பு!