ஃபூங்க் - திரைப்படம் - எனது பார்வையில்

இப்படித்தான் மிகவும் ஆர்வமாக ஆர்.ஜி.வி. என்றழைக்கப்படும் ராம் கோபால் வர்மாவின் வாஸ்து சாஸ்த்ராவை ஓடிச் சென்று அரங்கில் பார்த்தேன், திருப்தியில்லை.

ஷோலேயின் மொழிமாற்றமாயிற்றேவென ஆக் திரைப்படத்தை ஓடிச் சென்று பார்த்தேன், திருப்தியில்லை.

இன்றைக்கும் அப்படியே, 'ஃபூங்'கில் சிலிர்க்க வைத்திருப்பார் என நினைத்தேன், அவரது பூத் அளவிற்குக்கூட இல்லையென்றாகி பொரித்தெடுத்துவிட்டது, சல்தா ஹை.

ஃபூங் என்றால் 'ப்பூ' என்று ஊதுகிறோமே அதுதான். சூனியக்காரர்கள் ஊதும் அந்த 'ப்பூ'வும் ஃபூங்க்தானாம். பிளவாளுமை, ஆன்மீகம், அமானுடம் மூன்றையும் கலந்துகட்டி ஏதோ சொல்லப்போவதான எதிர்பார்ப்பை உண்டாக்கிவிட்டு, அந்தப் பெண்மணி அஷ்வினியின் முத்துப் பல்வரிசையைக் காட்டி அச்சுறுத்த நினத்ததுதான் மிச்சமானது.

ஒப்பந்தக்காரர் கதாநாயகனின் களப்பணியில் பிள்ளையார் சிலை கிடைக்க, தொழிலாளிகள் அதனைக் கோயிலாக்கவேண்டுமென்கிறார்கள், கதாநாயகன் மறுக்கிறான். தகவல் தொழில் நுட்ப வளாகம் கட்டுவதற்கு பெரிய ஒப்பந்தம் கிடைத்த மகிழ்வில் விருந்து நடக்கும்போது பணியில் சேர்ந்த இருவரின் நம்பிக்கைத் துரோகம் தெரியவர, திட்டி அனுப்புகிறான். வீட்டில் மனைவி, அம்மா, வேலைகாரி இவர்கள் மூவரின் இறைநம்பிக்கைக்கும் குறுக்கே நிற்காமல் தான் மட்டுமே நாத்திகனாக வாழ்கிறான்.

திடீரென்று அவனது குழந்தைக்கு பேய் பிடிக்கின்றது. மனநிலை மருத்துவர் அது பிளவாளுமை என்கிறார். பாட்டியம்மா சொன்ன பேய்க்கதைகள்தான் அவள் மனதில் புகுந்து இப்படி ஆட்டுகிறது என்கிறார். உடன் பணிபுரியும் ஒருவர், சரி ஒரு பேயோட்டியை முயற்சி செய்தால் என்ன என்றதும் வேறு வழியில்லாமல் ஒப்புக்கொள்கிறான். பேயோட்டி வந்து சோதித்துப் பார்த்து இது உனது எதிரிகளின் வேலை என எதிரிகளை அடையாளம் காட்டுகிறார். ஒப்பந்தத்தில் தனக்கு துரோகம் செய்தவர்கள்தான் ஓட்டுனரின் துணையுடன் சூனியம் வைத்திருக்கிறார்கள் என்பது தெரியவருகிறது.

பொம்மையில் சூனியம் ஊதி ஊசிகளால் குத்தி பொம்மையைத் துன்புறுத்த அது குழந்தையின் மீது அமானுடமாக எழுந்து குழந்தையை வதைக்கிறது. உச்சத்தில் குழந்தையைக் கொல்லும் கட்டத்தில், சூனியக்காரர்களின் இடத்திற்குச் சென்று சண்டையிட்டு அவர்களைக் கொல்வதில் பேயோட்டியின் துணையையும் கொண்டு வெல்கிறான்.

அந்நேரத்தில் குழந்தைக்கு மருத்துவமனையில் வைத்தியம் செய்த மனோநிலை மருத்துவர்தான் குழந்தையின் சுகத்திற்குக் காரணம் என அவனது மனைவி நினைப்பதுடன் கதை முடிகின்றது.

இந்தப் படம் பிடிக்காததன் காரணங்களுள் சில: முதலாவதாக, பல காட்சிகளை ராம்ஸே சகோதரர்களின் அமானுடப் படங்களின் மறுபதிப்பாக எடுத்திருப்பது பிடிக்கவில்லை. அதாவது, காட்சிகளைக் காட்டும்போது அமானுடத் தோற்றமளிக்கும் பொம்மைகளை அணுகிக் காட்டி காட்சிகளை அமைத்தது. அடுத்து, அவரது (ராம் கோபால் வர்மா) பூத் படத்தின் மறுபதிப்பாக பேய்பிடித்தக் குழந்தை பேசுவது, குழந்தையைக் கட்டிலில் இருந்து உயர்த்தி வீழ்த்துவது இத்தியாதிகளைக் காட்டியது. வாஸ்து சாஸ்த்ராவில் சிறுவன் பந்து விளையாடும் போது சற்றே வெளியே போவான், அப்போது அந்தப் பந்து அப்படியே அந்தரத்தில் நிற்கும். அமானுடம் வீட்டில் நுழைந்திருப்பதற்கான காட்சியை இப்படி எடுத்த ராம் கோபால் வர்மா அவர்களால் இதுபோன்ற ஏதாவது இன்னொரு உத்தியை இந்தப் படத்தில் வேறெங்கும் காண்பிக்க இயலாமற்போனதில் வருத்தமே.

சூனியக்காரர்களை அவன் வீழ்த்தியதால் அமானும் வீழ்ந்ததா?

பிள்ளையாருக்குக் கோயில் கட்ட அனுமதித்து அங்கே பூஜை நிகழும் நேரத்தில் அவன் சூனியக்காரர்களுடன் மோதியதில் பிள்ளையாரின் அனுக்கிரகத்தால் அவன் சூனியக்காரர்களை வென்றானா?

குழந்தையின் பிளவாளுமை நோக்கு சிகிச்சையளித்த மருத்துவர் வென்றாரா?

இப்படிக் கேள்விமேல் கேள்வியாக தொங்கலில் விட்டு, கதையை முடித்ததாகப் பெயர் செய்தாலுமே, சூனியமும் அமானுடமும் உண்மை என்பதையே கதையின் முடிவு வலியுறுத்துகின்றது.

படத்தில் நடித்த குழந்தையின் பெயர் அஹ்ஸாஸ் சன்னா என ஐ.எம்.டி.பி.யிலும் படித்தேன். அவரது நடிப்பு நன்றாக இருந்தது. தினமும் நாட்காட்டியில் இருக்கும் அனுமார் படத்தைக் கும்பிட்டுவிட்டுப் படுக்கும் வேலைக்காரிக்கு நடிப்பைக் காட்டும் வாய்ப்பு கிடைத்த அளவிற்குக்கூட அம்மாவாக நடித்தவருக்குக் கிடைக்கவில்லை. பாட்டியாக நடித்தவர் வெள்ளை முடியுடன் தலையை ஆட்டிக்கொண்டே வழமையான அமானுடப் படங்களில் வரும் பாட்டி. அஷ்வினி அம்மையார் அதிகம் நடிக்காதவர், இனிமேல் நடிக்கலாம். திரையில் யாரையேனும் பயமுறுத்த வேண்டியிருந்தால் தயாரிப்பாளர்கள் அம்மையாரை நாட வாய்ப்பிருக்கிறது.

மொத்தத்தில் யாருக்குப் படம் பிடித்திருக்குமோ எனக்குப் பிடிக்கவில்லை, வடக்கே எங்கோ தனியாக அமர்ந்து படத்தைப் பார்த்து ஐந்து லட்சத்தைப் பரிசாகப் பெற்றவருக்கு படம் மிகவும் பிடித்திருக்கலாம். எங்காவது காண்ட்ராக்ட் படத்தின் குறுவட்டு கிடைக்குமாவெனத் தேடவேண்டும், ஆர்.ஜி.வி. அதிலாவது என்போன்ற ரசிகனை ஏமாற்றாதிருக்கவேண்டும்.

அன்புடன்
ஆசாத்