ஜெயமோகன் அய்யா சொல்லிய தவறான தகவல் - எம்.ஜி.ஆர். பாடலில்

ஜெயமோகன் அய்யாவின் தீவிர வாசகன் இல்லையென்றாலும், இலக்கியம் பேசும் நண்பர்களின் பரிந்துரையின்படி அய்யாவின் விஷ்ணுபுரமும், கொற்றவையும் என்னால் வாங்கப்பட்டு, கொஞ்சமே படிக்கப்பட்டு புத்தக அலமாரியில் இருக்கின்றன.

நேற்று புத்தகக் கண்காட்சியில் மனுஷ்யபுத்திரன் அவர்களை நலன் விசாரித்துவிட்டு உயிர்மையில் அய்யாவின் புத்தகங்கள் இரண்டினை வாங்கிவந்திருக்கிறேன். இன்றைக்கு இரவுக்குள் இரண்டையும் முடிக்க முயற்சி செய்வேன் என்றபோது நண்பர் சொன்னார்,

"பாய், நிழல்வெளிக் கதைகள முடிச்சுருவீங்க. நவீன தமிழிலக்கிய அறிமுகத்த முடிக்க முடியாது...ஹெவி பாய்"

ஆனால், நேற்று இரவு சோனி சப்இல் தேவ்தாஸ் ஓடியது. இஸ்மாயில் தர்பாரின் இசையில், நுஸ்ரத் பதரின் வரிகள் 'சில்சிலா யே சாஹத்கா'வும் 'மாரு டாலா'வும் புத்தகம் படிக்கும் எண்ணத்தை மூடிவைத்தன. நண்பர் சொன்னதுபோல் நவீன தமிழிலக்கியத்தை மட்டுமல்லாமல், நிழல்வெளிக் கதைகளையும் முடிக்க முடியவில்லை. இது இங்கேயே இருக்கட்டும்.

*

எம்.ஜி.ஆர். நினைவுநாளன்று, 'ஜெயாவில் சத்யராஜின் தேன்கிண்ணத்தைப் பார்' என்னும் குறுஞ்செய்தியை நண்பரும் எழுத்தாளருமான இரா.முருகன் அவர்கள் அனுப்பியிருந்தார். காலையில் தவறவிட்ட தேன்கிண்ணத்தை இரவு பதினொன்றரை மணிவரையில் விழித்திருந்து பார்த்தேன்.

கில்லியின் உபயத்தில், ஜெயமோகன் அய்யாவின் இந்தப் பதிவையும் படித்தேன். எஸ்.ரா., கலாப்ரியா, நாஞ்சில்நாடன் ஆகியோரும் எம்.ஜி.ஆர். ரசிகர்களாக இருந்திருக்கிறார்கள் என்பதைப் படிக்கையில் மகிழ்வாக இருந்தது.

இலக்கியம் படைப்போர் சிலரின் அலைவரிசையுடன் எனது அலைவரிசையும் எம்.ஜி.ஆர். ரசிப்பு தொடர்பாக ஒன்றாக இருப்பதில் சிறிய மகிழ்ச்சி. சின்னச்சின்ன சந்தோஷங்கள்தானே வாழ்க்கையை உருவாக்குகின்றன.

மேற்சொன்ன பதிவில் அய்யா அவர்கள் எம்.ஜி.ஆர். படத்தின் காட்சிகளை நகைச்சுவையாகக் குறிப்பிட்டதை ரசித்தேன். சில இடங்களில் வாய்விட்டுச் சிரிக்க முடிந்தது. நாஅர்ஓயில் (நாகர்கோயில்) பாணி தமிழால் கூடுதல் நகைச்சுவை.

இவ்வளவு அழகாக நகைச்சுவை எழுதியிருக்கும் அய்யா சொல்லும் குறிப்பிட்ட பாடலுடன் அவர் சொல்லிய நகைச்சுவையை பொருத்திப் பார்த்தால் ஒட்டவில்லை.

//அத்துடன் மழையில் நனைந்து பாடுவதையும் எங்களூர்க்காரர்கள் விரும்பவில்லை. தென்குமரிநாட்டில் வருஷத்தில் ஏழுமாசம் மழை. எளவெடுத்த மழையாலே பிள்ளைய பெருத்துப்போய் பிளைக்கவும் பளுதில்லியே என்று நொந்துபோயிருக்கும் மக்களுக்கு மழையில் எம்.ஜி.ஆர் 'இளமை முழுதும் நனைய நனைய மழையடிக்குதடி' என்று பாடும் ஜெயலலிதாவுடன் சேற்றில் குதித்து ஆடுவது கடுப்பேற்றியது. 'அந்த பட்டத்திக் குட்டிக்கு பிராந்துண்ணா இவனுக்கு எங்க போச்சு புத்தி? ஒரு நாலு நல்லவாக்கு சொல்லி எடுத்து உள்ள கூட்டிட்டுபோயி சுக்குவெள்ளமோ மற்றோ குடுக்கப்பிடாதா? வல்ல நீர்தோசமோ மற்றோ பிடிச்சா பின்ன இவன்லா வச்சு பாக்கணும்?'// இதுதான் அய்யா எழுதியிருப்பது.

முதல் பிழை:
அய்யா சொல்லிய பாடல் 'இளமை முழுதும் நனைய நனைய மழையடிக்குதடி' கிடையாது.

அது 'ஆடை முழுதும் நனைய நனைய'. சல்தா ஹை...இது ஒன்றும் பெரிய தவறு கிடையாது. தட்டச்சுப் பிழையாகக்கூட இருக்கலாம்.

ஏ(ன்)! இதப்புடிச்சு தொங்க இந்தப் பாண்டிக்கென்ன பிராந்தா :-)


இரண்டாவது பிழை:
'என்று பாடும் ஜெயலலிதாவுடன் சேற்றில் குதித்து ஆடுவது'

இந்தப் பாடலை அம்மையார் தனியாகத்தான் மழையில் நனைந்தபடி பாடுவார். எம்.ஜி.ஆர். மழையில் நனைந்தபடி இந்தப் பாடலில் ஆடும் காட்சி கிடையாது. தனியாக மழையில் ஆடும் அம்மையாரை ஜன்னலின் வழியாகப் பார்த்து புன்னகைப்பதான ஒருகாட்சியிலும் பாடலின் கடைசியில் மாலையிடும் காட்சியிலுமே எம்.ஜி.ஆர். உண்டு.

அம்மையாருடன் எம்.ஜி.ஆரும் சேர்ந்து மழையில் நனைவதோ, சேற்றில் குதிப்பதோ கிடையவே கிடையாது.


மூன்றாவது பிழை:
'ஒரு நாலு நல்லவாக்கு சொல்லி எடுத்து உள்ள கூட்டிட்டுபோயி சுக்குவெள்ளமோ மற்றோ குடுக்கப்பிடாதா? வல்ல நீர்தோசமோ மற்றோ பிடிச்சா பின்ன இவன்லா வச்சு பாக்கணும்?'

இதுதான் சற்றே பெரிய பிழையாக எனக்குப் படுகிறது.

ஏனென்றால், மற்ற மழைப்பாடல்களுக்கும் இந்த மழைப்பாடலுக்கும் இருக்கும் வித்தியாசமே அதுதான். அதாவது, பாதிப்பாடலில் மழையில் நனைந்துவிட்டு, பிறகு வீட்டிற்குள் வந்து தலைதுவட்டி, உடைமாற்றி வேறு உடையில் பாடல் தொடரும்.

மிகக் குறிப்பாக உலர்ந்த கூந்தல் ரசிகனுக்குத் தெரியும் விதமாகவும் ஒரு காட்சி படமாக்கப்பட்டிருக்கும்.

"நன்ஜிட்டா தலியத் தொடிக்ணும்னு சோக்கா வாத்ஜ்யார் சொல்லிக்ரார் மாமே" என வக்காலத்து வாங்கவில்லை, மாறாக, ஜெயமோகன் அய்யா சொல்வதுபோல் அம்மையாருக்கு 'பிராந்து' இந்தப் பாடலில் கிடையாதென்று சொல்கிறேன், அவ்வளவே.

நனைகிறார், உள்ளே வருகிறார், உடை மாற்றுகிறார், பாடலைத் தொடர்கிறார். இப்படி நனைவதும் - உடைமாற்றியபின் பாடலைத் தொடர்வதுமான மழைப்பாடல் (எனது இந்த நிமிட நினைவுத்திறனின்படி) இந்தப் பாடல் மட்டுமே.

அய்யா சொல்லும் 'உள்ள கூட்டிட்டுபோயி'யானது பாடலிலேயே நிகழ்ந்துவிடுகிறது. மழையில் நாயகி நனைந்த பின்னர், அப்படி நிகழும் காட்சிகளை, அதாவது 'உள்ள போயி' காட்சிளைக் கண்டபின்னும், இந்த யோசனைகளைச் சொன்னால், நாயகிக்குப் பிராந்தா? சொல்பவருக்குப் பிராந்தா?

வேறு ஏதோ பாடலை எழுதும் நினைவில் இந்தப் பாடலை ஜெயமோகன் அய்யா அவர்கள் குறிப்பிட்டிருப்பார் என்றே நான் நினைக்கிறேன்.

அய்யாவிடம் பழக்கமிருக்கும் நண்பர்கள் அது வேறு எந்தப் பாடல் என்று கேட்டுச் சொன்னார்களென்றால் நலமாக இருக்கும்.

*****

அய்யா சொல்லும் பாடல்: இளமை முழுதும் நனைய நனைய
எனது புரிதல்: ஆடை முழுதும் நனைய நனைய
படம்: நம்நாடு
நடனம்: தங்கப்பன் மாஸ்டர்
பாடல்: வாலி
இசை: எம்.எஸ்.வி.

எனது வீட்டிற்கு வரும் வாய்ப்பு உள்ள நண்பர்களுக்கு தேநீருடன் இந்தப் பாடல் போட்டுக் காண்பிக்கப்படலாம், அவர்கள் கேட்டார்களென்றால்.

அன்புடன்
ஆசாத்