வாளமீனுக்கும் வெலாங்குமீனுக்கும்

கானா மீனா?

சவூதி அரேபியாவில் உட்கார்ந்துகொண்டிருப்பதால் வாள மீனுக்கும் வெலாங்கு மீனுக்கும் நடக்கும் கல்யாணத்தை ரசிப்பதற்கு இத்தனை நாள்கள் ஆயின. இதற்கு முன்னரே எத்தனையோ கானாப் பாடல்கள் தமிழ்த்திரையில் பிரபலமாகியிருந்தபோதும் இப்படி அனைவரையும் இழுத்து வந்து ஆட்டம் போடவைத்திருக்கும் பாடலில் என்ன விசேஷம் இருக்கிறது என குறிப்பாக எதையும் சொல்ல இயலவில்லை; ஆனால், பாடலின் வெற்றிக்கு கானா உலகநாதன் மட்டுமே காரணம் அல்லர் என்பது எனது தெளிவு.

கானாவின் வரிகளுக்குச் செல்லுமுன், பின்னணி இசை குத்துப்பாட்டிற்காக உறுமினாலும், நளினமான சில நடன அசைவுகளை மாளவிகாவிற்கு அமைத்துத் தந்த நடன அமைப்பாளர் ஷோபி அவர்களுக்கு முதல் பாராட்டு.

·பால்குனி பாதக்கின் 'மேரி ச்சூனர் உடுஉடு ஜாயே' பாடலை அப்படியே நகலெடுத்த 'எந்தன் சேலையும் நழுவியதேனோ' (நடிகை: காலஞ்சென்ற பிரதியுக்ஷா) பாடலைப் பார்ப்பதுபோலவே பல காட்சிகள் இருந்து, சிறிது நெளியவைத்து, சமீபத்திய ரசனைக்கும் நமக்கும் தலைமுறை இடைவெளி இருப்பதை உணர்த்தியபோதும், ஷோபிக்காக இரண்டு வரிகள் கானா எழுதாமல் இருக்க முடியவில்லை.

ஆட்டம்போடுது மாளவிக்கா ஷோபிக்கா! - அய்ய
அப்பீட் வுட்டது சைதாப்பேட்ட டோபிக்கா!
தேட்டம் போடுது தெனந்தெனமும் ஷோவுக்கா! - அய்ய
தேடி வந்தது த்யேட்டராண்ட டாவுக்கா!

*

சென்னைக் கடற்கரையோரத்தில் எழுதப்பட்ட கானாக்கள் சிலவற்றில் மீன்வாசம் இருக்கும். அது ஒரு கையொப்பம் போல.

மீனின் பெயர்களும் சென்னையின் சுற்று வட்டாரங்களில் அதிகமாக புழங்கப்படும் பெயர்களாகவே இருக்கும். காரப்பொடி, செங்கரா, சென்னாக்குனி, மடவை, தும்பிலி, வவ்வாலு, வஞ்சிரம், பாறை, எறா, சுறா, கெளுத்தி, விலாங்கு, உளுவை, வாளை இப்படியாக பல மீன்களின் பெயர்கள் கானாக்களில் அடிக்கடி தலையைக் காட்டும்.

'வாராயோ வெண்ணிலாவே' பாடலை கானாவாக மாற்றி 'வாராயோ வாளமீனு கேளாயோ கெளுத்திமீனு' என்று பாடப்பட்ட பழைய கானா ஒன்று சென்னை அயோத்தியா குப்பம், ராயபுரம் பகுதிகளில் (எழுபதுகளின் மத்தியில்) வலம் வந்தது.

'இல்லறம் இப்படி நடந்தால் நல்லறமாமோ நிலவே'

என்னும் வரிகள்

'மீச மொளச்சது எறா! நடுக்கடலுல கெடைக்குது சொறா!'

என்று மாற்றப்பட்டதைக் கேட்டால் மனம் விட்டுச் சிரிக்கலாம்.

இப்படியான மீனவக் கையொப்பம் சரிவிகிதத்தில் அமைந்தது 'வாளமீனுக்கும் வெலாங்குமீனுக்கும் கல்யாணம்' பாடலின் வெற்றிக்கு இன்னொரு காரணம்.

கொத்தவால்சாவடியின் கையொப்பம் தாங்கி வந்த தேவாவின் பாடலுக்கு (கொத்தவால்சாவடி லேடி நீ கோயம்பேடு வாடி) வரவேற்பு இருந்து அதுவும் பிரபலமானபோதிலும், வாளமீனில் இருக்கும் கூடுதல் ஈர்ப்பிற்குக் காரணம் மேற்சொன்ன நடன அமைப்பு.

கானாக்களை எழுத்தில் படிப்பதைவிடவும், பாடலாகக் கேட்கும்போது சென்னைத் தமிழின் தன்மை தனியாகத் தெரியும். உதாரணமாக, 'வாங்க', 'போங்க' என்னும் வார்த்தைகளும், மரியாதைக்காக 'ங்க' சேர்த்துக்கொள்ளும் சில வார்த்தைகளும் கானாவில் உச்சரிக்கப்படும்போது, என்னைப் போன்ற கானா ரசிகர்கள் 'வாஹ் வாஹ்' சொல்லி ரசிப்போம். எங்களுக்கு அதனுடனான ஈர்ப்பு அப்படி. கொத்தவால்சாவடி லேடி பாடலில்,

'காஜா பீடி கவ்னர் பீடி கறீம் பீடிங்கோ! - அத
வலிச்சுப் பாத்த பசங்களெல்லாம் ரொம்பொக் கேடிங்கோ!'

என்று ஒரு அடி வரும். இதில் உச்சரிக்கப்படும் அந்த 'ங்கோ', ங்கோவென்று நின்றுவிடாமல், லேசாக 'ங்கோவ்' என்று அந்த 'வ்'வை அரை அளவிற்கும் குறைவாகவே உச்சரித்து இழுக்கும்போது கிடைக்கும் நிறைவு, கேட்டு ரசிக்க வேண்டியது.

அதே 'ங்கோவ்' இழுவை, வாளமீனுக்குமிலும் உண்டு.

'பஞ்சாயத்து தலைவருன்னா சுறாமீனு தானுங்கோ(வ்)! - அவரு
.சொன்னபடி இருவருக்கும் நிச்சயதார்த்தம் தானுங்கோ(வ்)!
....
மாப்பிள்ள வாளமீனு பழவேற்காடு தானுங்கோ(வ்)! - அந்த
மணப்பொண்ணு வெலாங்குமீனு மீஞ்சூரு தானுங்கோ(வ்)!'
வரிகளில் உலகநாதன் சென்னைத் தமிழின் கானா மொழியை அட்டகாசமாகக் கையாண்டிருக்கிறார்.

நாட்டியம், வாத்தியம் என்று இயைபுத்தொடையாக கானாவின் இலக்கணம் கடைப்பிடிக்கப்பட்டிருக்கிறது.

ஊர்வலத்தில் ஆடிவரும் நண்டுதான நாட்டியம்! - அய்ய
மேளதாளம் முழங்கிவரும் வஞ்சிரமீனு வாத்தியம்!

கானாக்களில் மரபாக எழுதப்படும் இன்னொரு உத்தி, 'டா' சேர்த்துக்கொள்வது. சென்னையில் புழங்கிய பழைய கானா ஒன்றில்,

'சப்பி சாராயம் எனக்கு வாணா(ம்)! - இப்போ
நடக்குத*டா* அமிஞ்சிக்கர கானா' என்று வரிகள் துவங்கும். இதில் நடக்குதடாவை உச்சரிக்கும்போது ந*ட*___வில் 'ட'வின் உச்சரிப்பில் லேசாக 'டு'வின் சாயல் தெரிந்ததென்றால் அது அசல் சென்னை உச்சரிப்பு. இந்த 'டா' சேர்க்கும் உத்தியும் வாளமீனுக்குமில் உண்டு. '... -

'அங்க - தேரு போல போகுத*டா* ஊர்கோலக்காட்சியும்! ஊர்கோலக்காட்சியும்! வாளமீனுக்கும்...'

*

மீனவர்களின் சாட்டையான திருக்கை(மீனின்) வாலும் கானாக்களில் அங்கங்கே தலைகாட்டும். திருக்கை என்னும் மீனின் வால் முன்னொரு காலத்தில் சாட்டையாக மீனவர்களால் உபயோகப்படுத்தப்பட்டிருக்கிறது. திருக்கை வாலை வைத்திருப்பது குற்றம் (அறுபதுகளின் இறுதியில்) என்று காவல் துறையால் சொல்லப்பட்டதாக சில ஆதாரமற்ற செய்திகளைக் கேட்டதுண்டு. திருக்கை வாலை சாட்டையாக வைத்திருப்பதுதான் குற்றமே தவிர கானாவில் உபயோகிப்பது குற்றமன்று.

'இந்த திருமணத்த நடத்தி வைக்கும் திருக்க வாலு ஆருங்கோ(வ்)?
இந்த மணமக்கள வாழ்த்துகிற பெரிய மன்சன் யாருங்கோ(வ்)?
தலைவரு திமிங்கலந் தானுங்கோ(வ்)!..வாளமீனுக்கும்..'

மொத்தத்தில், இசையும் (சுந்தர் C. பாபு?), பாடலும் (கானா உலகநாதன்), பாடியவரும் (கா.உ), ஆடியவரும் (மாளவிகா), ஆட்டுவித்தவரும் (ஷோபி), இயக்குநர் + ஒளிப்பதிவாளர் எல்லாருமாகச் சேர்ந்து என்னைப் போன்ற ரசிகர்களை மூன்று நான்கு நிமிடங்களுக்கு கானா உலகில் மிதக்கவிடுகிறார்கள்.

இந்தப் பாடல் இடம்பெற்ற சித்திரம் பேசுதடி படத்தைப் பற்றி...சிலர் ஆஹா ஓஹோ என்கிறார்கள். எனக்கு...சொல்வதற்கு ஒன்றுமில்லை.

அன்புடன்
ஆசாத்

மீன் குறிப்பு:
நமது ஊர் செங்கரா மீனுக்கு சவூதி அரேபியாவில் என்ன பெயர் தெரியுமோ?

சுல்தான் இப்ராஹீம்.

(சத்தியமாங்க! சவூதிக்கார வலைப்பதிவர்களைக் கேட்டுப்பாருங்களேன்)