கவியரங்கக் கவிதை - மறுபதிப்பு

அன்புடையீர்,

சந்தவசந்தம் யாஹூ குழுமத்தில் நடக்கும் கவியரங்கில் கலந்துகொண்டேன். எனக்கு மிகவும் பிடித்தமான எண்சீர் விருத்தத்தில் கவிதை ஒன்றை எழுதினேன். கவியரங்கின் தலைப்பு கனவிலிது கண்டேன்.

எண்சீருக்காக இரண்டு வகையான தாளக்கட்டுகளை அமைத்துக்கொண்டேன்.

முதலில்,
கவியரங்கத் தலைவருக்காகப் பாடியதில் ஒவ்வொரு அரை அடியிலும்,
[தன.னா.னன] [தன.னா.னன] [தன.னா.னன] [தன்னா]
என்னும் தாளக்கட்டு வரும்.

கனி கனி கனி மா கனி கனி கனி மா என்பார்கள்

சில இடங்களில் 'தன' என்னும் தாளம் 'னா'வாகவும், 'னா' என்னும் தாளம் 'தன'வாகவும் ஒலிக்கலாம்.

ஆயினும், ஒவ்வொரு அரை அடியிலும் முதல் மூன்று வார்த்தைகளின் கடைசிச் சீர் 'னன'வாகவும் நான்காவது வார்த்தையின் முடிவு 'னா'வாகவுமே இருக்கும்.

இசைப் பாடல்களில் இப்படி 'தன'வும் 'னா'வும் மாறி ஒலிப்பது சகஜம்.

காட்டு 1:

மதன மா.ளிகை.யில் மந்.திர மா.லை.களாம்
உதயக் கா.லம்.வரை உன்.னத லீலை.களாம்

முதல் அடியில் யில் = னா, அதே இடத்தில் இரண்டாம் அடியில் வரை = னன.

காட்டு 2:

நில்லாமல் சுழலும் பூமியிது
எல்லாரும் நடிக்கும் மேடையிது
போட்.டேன் நானும் வேஷங்களை
படித்.தேன் வாழ்க்கைப் பாடங்களை

போட் = னா, படித் = தன.

இரண்டாவதாக,
கவிதைக்காகத் தேர்ந்தெடுத்துக்கொண்ட தாளக்கட்டு,

[தன.னா.ன] [தன்.னா.ன] [தா.னா] [தா.னா]
[தன.னா.ன] [தன்.னா.ன] [தா.னா] [தா.னா]

காய் காய் மா மா காய் காய் மா மா என்பார்கள்.

இதிலும் சொற்களில் முதலில், இடையில் தன, னா, தன் இவை மாறி ஒலித்தாலும் ஒவ்வொரு சொல்லின் முடிவும் ஓரெழுத்தாகவே இருக்கும்.

*

கனவிலிது கண்டேன்


தலைவருக்கு

கவிமாமணி புகழ்தாங்கிய பெரியோரிவர்1 என்னை
. கவிபாடிட அழைத்தாலது அடியேனிவன் பேறே!
செவிகேட்டிட ஒலிகூட்டிய மணிபோலொரு ஓசை
. சொன்னாரிவர் சந்தக்கலை தந்தாரிசை கேட்டேன்!
புவிமீதினில் திரைக்காதலன் கவிவார்ப்பதும் ஆரால்!
. புதுப்பேரொடு விருத்தந்தனில் விளையாடுவ தாரால்!
நவில்வேனொரு வணக்கந்தனை நல்லோர்திசை நோக்கி!
. நானும்கவி சொல்வேனிவர் தலைமைக்(கு)அழ கூட்டி!

1 - கவிமாமணி இலந்தை இராமசாமி


கவிதை

அவையோரின் முன்னேநான் கேள்வி வைப்பேன்
. ஆண்டாண்டாய்த் தொடர்கின்ற கேள்வி யாகும்
சுவையாகச் சொல்வீரோ பதிலால் என்னைச்
. சூடாக்கிச் செல்வீரோ அறியேன் அய்யா
எவையெல்லாம் கனவென்னும் தேற்றம் தேவை
. ஏனென்றா(ல்) உறக்கத்தில் நெஞ்சம் காணும்
அவைமட்டும் கனவென்றால் இதுவே என்றன்
. அடிகளிலே கடைசிச்சொல் லாகிப் போகும்!

விழிப்போடு சிந்தைக்குள் வேகத் தோடு
. வியர்வைக்குள் குளிக்கின்ற நாட்டத் தோடு
சுழித்தோடிப் பொருளீட்டும் மோகத்தோடு
. சுகந்தேடும் வாழ்க்கைக்குப் பாதை போட்டு
வழியெங்கும் தூங்காத கண்கள் கொண்டு
. வருவோரும் போவோரும் நாளும் இங்கே
செழிக்கின்ற செல்வங்கள் பொங்க வெண்ணிச்
. சேர்க்கின்ற கனவென்ன தூக்கத்(து) உள்ளா?

ஆழ்நிலையின் உள்ளேகி நம்மை நாமே
. அறியாமல் விழிப்பாவை வேகச் சுற்றில்2
வீழ்நிலையே கனவென்னும் விஞ்ஞா னத்தில்
. விழிக்கின்றேன் என்கனவோ வேறு போக்கில்
நானிருக்கும் நிலையுள்ளே கனவென் றாலே
. நல்லதொரு முன்னேற்றப் பாதை கண்டு
மேனிலையில் நல்லோர்கள் நட்பைப் பெற்று
. மெருகூட்டும் வாழ்வினையே காணு கின்றேன்!

2 - விழிப்பாவை வேகச் சுற்று - REM, Rapid Eye Movement

என்பாடல் திரையிசையில் பாடக் கேட்டேன்
. என்கவிகள் இளையோரை ஈர்க்கக் கண்டேன்
என்பாதை ஓரத்தில் ரசிகர் வந்து
. ஏடெடுத்துக் கையொப்பம் கேட்கக் கண்டேன்
அன்பான மொழிபேசும் ஆற்றல் பெற்றேன்
. அழகாகாகத் தமிழ்மேடைப் பேச்சில் வென்றேன்
முன்பாகச் சொன்னதுபோல் இவைய னைத்தும்
. மூடாத விழிக்கனவே! வெல்லும்! வெல்லும்!

*****

அன்புடன்
ஆசாத்