மு.மேத்தாவுடன் சிலமணிநேரங்கள்

மு.மேத்தாவுடன் சிலமணிநேரங்கள்

சவூதி அரேபியாவுக்கு வந்திருந்த கவிஞர் மு.மேத்தா அவர்களை மக்காவிற்கும், மதீனாவிற்கும் அழைத்துச் செல்லும் பொறுப்பு எனக்குத் தரப்பட்டது. அலுவலகத்தில் விடுமுறைக்குச் சொன்னேன். ஜித்தாவில் இருப்பவர்களுக்கு இப்படியான (அறிந்தோர்களை மக்கா, மதீனா அழைத்துச் செல்வது) சேவை புதிதானது அல்ல என்பதால் உடனே அனுமதி கிடைத்தது.

ஜித்தா - மக்கா ஒருமணிநேரப் பயணம். நலம் விசாரித்து, பயணத்திற்கான சில விவரங்களை சொல்லி முடிக்குமுன் மக்கா வந்துவிட்டது. கடமைகளைச் செய்து முடித்தபின் மக்காவின் அருகிலிருக்கும் மினா, அரஃபாத் திடல்களுக்குச் சென்றோம். மினாவில் கல்லெறியும் இடத்தில் கட்டுமானப் பணிகள் அதிவேகத்தில் முடுக்கிவிடப்பட்டிருக்கின்றன (சென்ற ஹஜ்ஜில் இங்கே அசம்பாவிதம் நிகழ்ந்தது சிலருக்கு நினைவிருக்கலாம்). சாலையோரத்தில் வண்டியை நிறுத்திவிட்டு சிலர் வேடிக்கை பார்த்துக்கொண்டிருந்தார்கள். அவர்களுடன் சேர்ந்து நாங்களும் அதையே செய்தோம். அந்தி சாயும் பொழுது வந்துவிடவே, அவசர கதியில் மக்காவிற்கு வந்து அந்தி நேரத் தொழுகை முடிந்ததுக்கொண்டு ஜித்தா புறப்பட்டோம்.

இன்றைக்கு 1 + 1 மணிநேரப் பயணம்தான், நாளை 4 + 4 மணிநேரப் பயணம் என முன்கூட்டியே சொல்லிவிட்டேன்.

அடுத்த நாள் காலையில் மதீனாவுக்குப் புறப்பட்டோம். வழக்கமாக மதீனா பயணத்தில் வழியில் ஒரு இடத்தில்தான் ஓய்வுக்கும் பெட்ரோல் நிரப்புவதற்கும் நிறுத்துவேன். நெடுஞ்சாலை துவங்குவதற்கு முன் இருக்கும் பெட்ரோல் நிலையங்களின் அமைப்பு, அதனைச் சுற்றியுள்ள கடைகள் இவற்றைப் பார்க்கவேண்டும் என்பதற்காக, ஜித்தா - மதீனா நெடுஞ்சாலையின் துவக்கத்தில் சோதனைச் சாவடியின் அருகில் இருக்கும் இடத்தில் சிறிது நேரம் நிறுத்தி இடங்களைப் பார்த்துவிட்டுப் புறப்பட்டோம்.

மதீனாவை அடைந்ததும் முதலில் 'கூபா மஸ்ஜித்' என்னும் பள்ளிவாசலுக்குச் சென்றோம். அங்கு மதியத் தொழுகையை முடித்துக்கொண்டு மஸ்ஜிதுன் நபவ்வீயை (மதீனாவில் இருக்கும் பள்ளிவாசல். பச்சை நிறமான கூரையுடன் அருகில் மினாராவுமாக இதனை படங்களில் சிலர் பார்த்திருக்கக்கூடும்) அடைந்து மதிய உணவை முடிக்கும்போது மாலை நேரத் தொழுகை துவங்கியது.

தொழுகைக்குப் பின் நபிகளாரின் அடக்கஸ்தலத்தில் 'சலாம்' சொல்லிவிட்டு வெளியே வந்து இன்னும் சில இடங்களைப் பார்த்துவிட்டு உஹத் மலையின் அடிவாரத்தில் கொஞ்ச நேரம் வண்டியை ஓட்டிவிட்டு, உஹத் போரில் உயிர் நீத்தவர்களை அடக்கம் செய்திருக்கும் இடத்திற்கு வந்து 'எமீன் சைய்யதினா ஹம்சா' (வலது பக்கத்தில் சைய்யதினா ஹம்சா) என வழிகாட்டும் வேலையைத் துவங்கியவரிடம் நன்றி சொல்லிவிட்டு, கட்டுமானப் பணிகளுக்காகக் குவித்து வைக்கப்பட்டிருக்கும் மணல்களிடையே ஒரு மாதிரியாக நடந்து வந்து ஜித்தா - மதீனா நெடுஞ்சலையில் இணைந்தோம்.

அதற்குள் அந்தி சாய்ந்துவிட்டது. இருட்டில் வண்டி ஓட்டுவதாலும் காலையிலிருந்து தொடர்ந்து வண்டி ஓட்டிக்கொண்டிருப்பதாலும் அசதியில் கண்ணயர்ந்துவிடுவேனோ என்ற பயத்தில் வழக்கத்திற்கும் மாறாக அதிகமாக சர்க்கரையுடன் ஒரு தேநீர் அருந்திவிட்டு சுறுசுறுப்பாக ஓட்டத்துவங்கினேன். இரவு நேரமாதலால், நமது வேகமான 120 - 140 செல்லாமல், 80 - 100 வேகத்தில் ஜித்தா வந்து சேர நள்ளிரவு பன்னிரண்டாகிவிட்டது.

சில பகிர்தல்கள்:

கவிஞர் என்ற ஒளிவட்டத்தில் அவர் இருப்பதாக எனக்குத் தோன்றவில்லை.

அரபி உச்சரிப்புகள் சிலவற்றை நான் திருத்திச் சொல்லியபோது மீண்டும் ஒருமுறை கேட்டு சரியாக உச்சரித்துப் பார்த்துக்கொண்டார்.

தெரியாத விஷயத்தை, தெரியாது என்று சொல்லி விளக்கங்கள் கேட்டுக் கொண்டார். 'அங்கே இப்படிப் படித்தேனே' போன்ற கருத்துப் பரிமாற்றங்களில் ஈடுபடவில்லை.

மதீனாவில் மஸ்ஜிதுன் நபவ்வீயிலிருந்து வெளியே வந்ததும் சட்டென்று விரிகின்ற ஹில்டன், இன்டர்காண்டினெண்டல், சுழல் மெத்தை உணவு விடுதி வகையறாக்களுக்கு இன்னும் சிறிது தொலைவில் அனுமதி அளித்திருக்கலாமோ என்பது அவரது பார்வை.

சமீபத்தில் ராம் கோபால் வர்மாவின் (உதயம்) படத்தில் இரண்டு பாடல்கள் எழுதியிருப்பதாகச் சொன்னதும் என்னிடமிருந்த ஷிவாவின் (அதேதான் - உதயத்தின் இந்தி வடிவம்) பாடல்களை ஓடவிட்டேன். உருதுப் பாடல்களில் ஒற்றெழுத்துகளையும் அலகிடுவார்கள் என்று நான் சொல்லியதை நினைவில் வைத்திருந்து, ஷிவாவின் 'சாரா யே ஆலம் நூறானீ ஹை' பாடலைப் போட்டபோது,
'நீங்கள் சொல்லியது இதுதானே. இதோ இந்த மெட்டிற்கான தமிழ்ப் பாடலை எழுதும்போது எனக்கு அசை பிரிப்பதில் பிரச்சனை வந்தது' எனச் சொல்லி நூறானீஹை என்னும் வாக்கியத்தில் நான்கு அசைகளுமே நெடில்களாக வந்ததும், அதற்கு தமிழில் நான்கு அசையுள்ள வார்த்தையைப் போடாமல் பிரித்ததையும் பகிர்ந்துகொண்டார்.

கமலுக்கும் தனக்கும் நடந்த சில உரையாடல்களைப் பகிர்ந்துகொண்டார்.

ருபையாத்துகள் குறித்து சிறிது பேசியதால் என்னிடமிருந்த ஃபிட்ஸ்ஜெரால்ட்டின் ருபையாத் மொழிமாற்றம் (ஆங்கிலம்), ஆ.மா.ஜெகதீசனின் மொழிமாற்றம் (தமிழ்), நாகூர் ரூமியின் மொழிமாற்றம் (தமிழ்) இவற்றைக் காட்டினேன், ரூமி சாஹேபின் புத்தகத்தை இரவில் படிப்பதற்கு எடுத்துக்கொண்டார்.

அவரது திரைப் பாடல் தொகுதியில் கையெழுத்திட்டுத் தருமமாறு கேட்டுக்கொண்டபோது, 'ம்ம்...இத வச்சிருக்கீங்களா' என்று கேட்டுக்கொண்டே கையெழுத்திட்டார்.

படகோட்டி படப் பாடல்களையும் ஓடவிட்டேன். என்ன அற்புதமான வரிகள் என வாலி அவர்களைப் புகழ்ந்து பேசியபோது கவனித்தேன், வாலியவர்களைக் குறிப்பிடும்போதெல்லாம் 'வாலியண்ணன்' என்றே குறிப்பிடுகிறார்.

கஜலை மொழிமாற்றி அதே சந்தத்துடன் எழுதியிருக்கிறேன் என்றபோது, சிறிதும் தயங்காமல், 'மலரை மட்டும் தராமல் விலங்கையும் தந்திருக்கிறீர்களா' என சிரித்துக்கொண்டே சொன்னார்.

லண்டனிலிருந்து முருகனார் (இரா.முருகன்) என்னிடம் பேசியபோது அருகில் மு.மேத்தா இருக்கிறார் என்று சொல்லி மு.மேத்தாவிடம் செல்பேசியைத் தந்தேன். மீராவின் நினவுகளை மேத்தாவுடன் பகிர்ந்துகொண்ட முருகனார் கண்ணீர்ப்பூக்கள் கவிதைத் தொகுதியை மிகவும் சிலாகித்துப் பேசியிருக்கிறார்.

இன்று காலையில்,
'பஹ்ரைன் புறப்பட்டுக்கிட்டிருக்கேன். தம்மாம்லேர்ந்து பாலத்துக்கு வந்த்தாச்சு. ரொம்ப நன்றி ஆசாத். சென்னைக்கு வந்தா தொடர்பு கொள்ளுங்க' எனச் சொல்லி விடை பெற்றார்.

கவிஞருடன் செலவழித்த சிலமணிநேரங்கள் சுவையான அனுபவத்தைத் தந்திருக்கின்றன.

அன்புடன்
ஆசாத்