சில சொந்த சமாசாரங்கள் - மறுஉறுதி (ரீகன்ஃபர்மேஷன்)

அன்புடையீர்,

கட்டுமானத்துறை குமார் அவர்களின் பதிவுதான் எனது பயண முன்பதிவு மறுஉறுதி (ரீகன்ஃபர்மேஷன்) அனுபவங்களை வலைப்பதிவில் பகிர்ந்துகொள்ளத் தூண்டியது.

*

முன்ன ஒருகாலத்துல ஏர்-இந்தியா அற்புதமா சேவை செஞ்சுக்கிட்டிருந்தப்ப நமக்கு ஜித்தா-பம்பாய்க்கு பயணச்சீட்டு அதுலதான் தந்துக்கிட்டிருந்தாங்க அதுவந்து, சமீபத்துல 1985ன்னு வச்சுக்கங்களேன் (டோண்டு ராகவன் சாருக்கு நன்றிகள்).

சில பதிவுகள்ள சொல்லியிருப்பேன், அப்ப சென்னைக்கு நேரடி விமானச்சேவை ஜித்தாவுலேர்ந்து கெடையாதுங்க; மும்பைக்கு ஏர்-இந்தியாவுல வந்து, சென்னைக்கு இண்டியன் ஏர்லைன்சுக்கு மாறி வரணும். எடைப்பட்ட நேரத்துல நட்சத்திர விடுதிகள்ள ஓய்வெடுக்க வச்சதெல்லாம் ஒருகாலங்க. இந்தப் பதிவு மறுஉறுதி தொடர்பானதுன்றதால மத்தத விட்டுர்ரனே.

இந்த சென்னை-மும்பை, மும்பை-ஜித்தா மறுஉறுதிய ஒரே அலுவலகத்துல பண்ணிக்க முடியாதுங்க. சென்னை-மும்பைக்கு இண்டியன் ஏர்லைன்சுக்கும், மும்பை-ஜித்தாவுக்கு ஏர்-இந்தியாவுக்குமா ஓடவேண்டியிருக்கும். ரெண்டுபேரும் பக்கத்துப் பக்கத்துலதான் இருக்காங்க, இப்பவும் அப்படித்தான். சி.இன்.சி. சாலை. - இப்ப பேரு என்னங்க?

அலுவலகம்தான் தனித்தனியா இருக்குமே தவிர, தொடர் விமான (connection flight) சமாசாரமெல்லாம் நல்லா கூட்டுறவா கவனிச்சுக்குவாங்க.

*

87க்கு அப்புறமா நான் ஏர்-இந்தியாவுல பயணமே செய்யலைங்க. 19 வருஷத்துக்கு அப்புறமா இப்பதான் செப்டம்பர் 2006ல சிங்கைக்கு ஏர்-இந்தியாவுல போனேன். திரும்ப வந்தது மலேயாவுலேர்ந்து. அப்பதான் இந்த மறுஉறுதில ஒரு சிக்கல் வந்துதுங்க.

பயணத் தேதிக்கு மூணு நாள் முன்னதா மறுஉறுதி செஞ்சுக்றது நல்லது. அக்டோபர் 4ந்தேதி கோலாலம்பூர்-சென்னை பயணங்க, அதுக்கு ஒண்ணாந்தேதி மறுஉறுதி செஞ்சுக்றது நல்லது.

அக்டோபர் 1 ஞாயிறு, செப்டம்பர் 30 சனி, ரெண்டும் விடுமுறை நாள். நானு செப்டம்பர் 28 சாயந்திரந்தான் கோலாலம்பூருக்கு வந்தேன். செப்டம்பர் 29 காலைலயே விடுதிக்காரங்ககிட்ட சீட்டத்தந்து மறுஉறுதிக்கு சொல்லிட்டேன். என்னோட நேரம்! சீட்ட வாங்குன பணியாளர் அடுத்தடுத்த ரெண்டு நாளுக்கு வரல. காலைல வரவேற்புல கேட்டா இன்னிக்கு பண்ணிரலாம்ன்னு சொன்னாங்க, அன்னிக்கு தேதி என்ன? 30 - சனி, தொலைபேசி பண்றாங்க பண்றாங்க ஏர்-இந்தியாவுல யாரும் எடுக்கலை. அடுத்து அக்டோபர் 1 ஞாயிறு, அடடா என்னடா இது இப்படி ஆகிருச்சேன்னு எனக்கு சங்கடமாப்போச்சு.

சரி அடுத்த நாள் திங்கட்கெழம நேராவே போயிறவேண்டியதுதான்னு நெனச்சுக்கிட்டு காலைல எல்லாரும் தயாராகி கேஎல்சிசில ரெட்டைக் கோபுரத்துக்கு எதுர்ல இருக்ற ஏர்-இந்தியா அலுவலகத்துக்குப் போனா பெரிய அதிர்ச்சி. அன்னிக்கு என்ன நாளு அக்டோபர் 2, காந்தி ஜெயந்தி இல்லீங்களா - விடுமுறை. சல்தாஹை, மறுஉறுதி கெடைக்கலேன்னா அடுத்ததா எது சென்னைக்குப் போவுதோ அதுல போகவேண்டியதுதான்னுட்டு காலார நடந்து கோலாலம்பூர் தொலைக்காட்சி கோபுரத்துக்குப் போயாச்சு.

அக்டோபர் 3ந்தேதி சாவகாசமா காலைல தொலைபேசில பேசிப்பாப்போமேன்னு பேசுனேன்.

'நைனா, என்னம்மா இது 72மணி நேரத்துக்கு முன்ன மறுஉறுதி பண்ணனும். ஆனா கடந்த 72மணி நேரமா அலுவலகம் பூட்டிக் கெடக்குதம்மான்னு' மெதுவா ஆரம்பிச்சேன்.

'யோவ் அத்த வுடுய்யா, உனுக்கு இன்னா வோணும்னு' கேட்டாங்க.

'பெருசா ஒண்ணும் வாணாம், நாலு தலைக்கு சென்னைக்கு மறுஉறுதி பண்ணனும். அவ்வளவுதான்'னேன்.

'பி.என்.ஆரக் குடுப்பா'ன்னாங்க.

கொஞ்சம் கொழப்பமாகிருச்சு. மூணு சீட்டுக்கு ஒரு பி.என்.ஆரும் இன்னொரு சீட்டுக்கு மத்தவொரு பி.என்.ஆரும் இருந்திருக்கு. நாம சீட்டைக் கவனிக்காததுக்கு நாமதான தண்டனைய அனுபவிக்கணும். கெத்தா பேசுனதெல்லாம் வுட்டுட்டு,

'நைனா, இன்னொரு சீட்டுக்காரரு சின்னக் கொழந்தைம்மா, அது என்ன அடுத்த வண்டிலயா வரும். கொழந்த பேரைத் தட்டி பி.என்.ஆர். எடுத்தியானா கோலாலம்பூர் பத்தி நெனைக்கும்போதெல்லாம் உன்ன நெனச்சுக்குவேம்மா'ன்னு பேசி ஒருமாதிரியா காரியத்த முடிச்சேன்னு வைங்களேன்.

மறுஉறுதி கொழப்பமெல்லாம் நமக்கு அடிக்கடி வரும் போவும்.

*

எமிரேட்சுல துபாய்லேர்ந்து வர்ர பயணிகள் திரும்மப்போறதுக்கு மறு உறுதி தேவையில்ல. அது அவங்க வழக்கம். தொலைபேசில கேட்டா அதெல்லாம் ஒண்ணும் தேவையில்லைன்னு சொல்லுவாங்க. ஆனா, அவங்க சொல்றது துபாய் வரைக்குந்தான்றத புரிஞ்சுக்கணும். அங்கேர்ந்து அதே எமிரேட்சுல வேற எங்கியாவது போகணும்னா தவறாம மறுஉறுதி பண்ணிக்றது நல்லது.

நாலு வருஷத்துக்கு முன்னாடி சென்னை-துபாய்-ஜித்தாவுக்கு சென்னை-துபாய் மறுஉறுதி தேவையில்லாம, துபாய்-ஜித்தா பயணத்துல கொழப்பமாகி சென்னை விமான நிலையத்துல எமிரேட்சுக்காரவுங்க உதவுனதால அதிகமான பிரச்சனையில்லாம சீட்டு கெடச்சுது.

*

ஒருமுறை கேத்தே பசிஃபிக்ல நகோயா(ஜப்பான்) - ஹாங்காங்க் - பஹ்ரைன் - ஜித்தா. இப்படி ஒரு பயணங்க. மறுஉறுதியெல்லாம் சரியாகிருச்சு. பஹ்ரைன்ல ஒருநாள் தங்கற மாதிரி பயணம். நகோயா விமானநிலையத்துல சீட்டு குடுக்கும்போது பஹ்ரைன் வரைக்கும் தரமுடியாதுன்றான். என்னடான்னா,

'நீ இந்தியாக்காரன் பஹ்ரைன்ல ஒருநாள் இருக்கணும்னா உனக்கு பஹ்ரைன் விசா வேணும்'ன்றான்.

'கண்ணா, நான் இந்தியாக்காரந்தான். ஆனா, வளைகுடா கூட்டுறவு நாட்டுல வேல செய்றம்மா. அந்த விசா இருந்தா பஹ்ரைன் உள்ள போலாம்மா. இதுதான் வளைகுடா நாடுகள்ள நடைமுறைம்மா'ன்னா கேக்கமாட்டேனுட்டான். அப்பன்னா பஹ்ரன்லேர்ந்து அனுமதி வரணும்ன்றான். அட வுடுய்யா நான் விமானநிலையத்துலயே இருக்கேன் வெளில போகமட்டேன்ன்னாலும் கேக்கமாட்டேன்னுட்டான்.

'நகோயாவுல ஒம்பது மணின்னா பஹ்ரைன்ல அதிகாலை நாலு மணிம்மா. யாரும் கணினி முன்னால உக்கார்ந்திருக்க மாட்டாங்க'ன்னு சொன்னாலும் கேக்கல.

அப்புறமா, கொஞ்சநேரம் கழிச்சு இவனுங்களத் தள்ளிவுட்டாப் போதும்னு,

'ஹாங்காங் வரைக்கும் தரேன், அதுக்குள்ள பஹ்ரைன்லேர்ந்து ஹாங்காங்குக்கு சேதி வந்திரும் அங்கபோயி மத்த சீட்ட வாங்கிக்க'ன்னு தள்ளிவுட்டுட்டான். தள்ளிவுட்டவன் வேற என்னவோ கொழப்படி பண்ணியிருக்கான். ஹாங்காங்குல எறங்கி விஷயத்த சொன்னா, அவனுங்க வெளங்கிக்கிட்டானுங்க. ஆனா, ஹாங்காங்-பஹ்ரைன் பயணச்சீட்டுல ஏதோ கொழப்பமாகிருச்சு. மறுஉறுதிய யாரோ மாத்திட்டாங்கன்னு ஹாங்காங்ல சொன்னாங்க.

அதுக்கு ஒரு வரிசைல நிண்ணு அதச் சரிபண்ணி, பஹ்ரைன் வந்ததும் மொத வேலையா விமான நிலையத்துல அவங்க அலுவலகத்துக்குப் போயி பஹ்ரைன்-ஜித்தா பயணத்த மறுமறுமறுமறுமறுமறுஉறுதி பண்ணினப்புறந்தான் நகரத்துக்குள்ளயே போனேன்.

*

தோ, எமிரேட்சுல அக்டோபர் 25 சென்னை-துபாய் போயி அங்கேர்ந்து 27ந்தேதி துபாய்-ஜித்தா வரதா இருத்துச்சு. அத மாத்திட்டு 27ந்தேதி நேரா சென்னை-துபாய்-ஜித்தான்னு வந்துட்டேன். பயணத்த மாத்தி மறுஉறுதி பண்ணதுதான். கோடம்பாக்கம் நெடுஞ்சாலைல பாம்குரோவ் பக்கத்துல ரியாஸ்லதான் எமிரேட்சு அலுவலகம். போனதும் பத்து நிமிஷத்துல வேல முடிஞ்சுருச்சு.

*

குவைத்து, எமிரேட்சு, ஓமனு, பிரிட்டிஷ் ஏர்வேசு (துபாய்லேர்ந்து), கேதே பசிஃபிக் (துபாய்லேர்ந்து), சவூதியா, கல்ஃப் ஏர், ஸ்ரீலங்கான்னு அந்த நேரத்துல எதுல துட்டு கம்மியோ இல்லேன்னா எடங்கெடைக்குதோ ரெண்டுல அப்பத்திக்கு முக்கியமான ஒண்ணாப் பாத்து சென்னை-ஜித்தா-துபாய்னு ஷேர் ஆட்டோ மாதிரி போயி வந்து போயி வந்து நம்ம பொழைப்பு ஓடுது.

டிசம்பர்ல திரும்பவும் வரலாமுன்னு நெனைக்கிறேன். எமிரேட்சு, ஸ்ரீலங்கன் ரெண்டுலயும் எடங்கெடைக்காது. சவூதியா வாய்ப்பே இல்லை. ஓமன்ல வந்தா மஸ்கட்ல காத்திருப்பு நேரம் அதிகம். ஆபத்பாந்தவன் கல்ஃப் ஏர்தான்...பாக்கலாம்.

என்னிக்கு இத்தையெல்லாம் வுட்டுப்போட்டுட்டு புல்லட்லயோ, பல்சர்லயோ, ஸ்ப்ளெண்டர்லயோ, ஆக்டிவாலயோ இல்ல மாருதிலயோ சென்னைய மட்டுமே சுத்திவரப்போறேன்னு தெரியல. இறைவனுக்குதான் தெரியும்.

என்னடா பெரிய வண்டிங்க பேரெல்லாம் சொல்லலையேன்னு பாக்றீங்களா. காண்ற கனவு எல்லாத்தையுமே வெளில சொல்ல முடியுங்களா? உள்ளுக்குள்ளயே பொடம்போட்டு முயற்சி பண்ணா வெற்றியடைஞ்சாலும் அடைஞ்சுருவோம். அந்த நேரத்துல வலைப்பதிவெல்லாம் எழுதுனோமுன்னா வெளில சொல்லிக்கலாம்.

அன்புடன்
ஆசாத்