போட்டியில் தேர்ந்தெடுத்தமைக்கு நன்றிகள்

அன்புடையீர்,

வணக்கங்கள்.

எதிர்பாராதவிதமாக தேன்கூடு + தமிழோவியம் போட்டியில் வெற்றி கிடைத்திருக்கிறது. வாக்களித்தவர்களும், நடுவர்களுமாக ஒன்றுசேர்ந்து இதனை எனக்கு வழங்கியிருக்கிறார்கள். அவர்களுக்கு எனது நன்றிகள். போட்டியில் பங்குபெறும் வாய்ப்பை உருவாக்கித் தந்த தேன்கூட்டார்களுக்கும், தமிழோவியத்தார்களுக்கும் நன்றி சொல்லாமல் இதனைத் தொடர்வது சரியன்று. போட்டியின் அமைப்பாளர்கள் இருவருக்கும் நன்றிகள்.

இக்கடிதத்துடன் எனது சில எண்ணங்களைப் பகிர்ந்துகொள்கிறேன்.

குடும்பத்தாருடன் சுற்றுலாவில் இருக்கிறேன். சிங்கையிலிருந்து கோலாலம்பூர் வந்து இரண்டு நாள்களாகின்றன. சரி...கொஞ்சம் மின்னஞ்சல்களைப் பார்க்கலாம் என உலவி மையத்திற்குச் சென்றால் இன்ப அதிர்ச்சி. நண்பர்களிடமிருந்து பாராட்டுகள். எல்லாவற்றையும் பார்த்துவிட்டு விடுதிக்கு வந்தால், இரவு மணி ஒன்று. செல்பேசியிலிருந்த தொகை முடிந்துவிட்டது. கடைகள் அடைக்கப்பட்டுவிட்டதால் தொகையைக் கூட்ட வழியில்லை. தங்கியிருக்கும் விடுதியிலிருந்து வெளிநாட்டு அழைப்புகள் யானை விலை குதிரை விலை :). ஒருவார்த்தையில் தொலைபேசி எண்ணைத் தெரிவித்ததும் கே.வி.ராஜா தொடர்பு கொண்டார், தேன்கூட்டார்கள் தொடர்பு கொண்டார்கள். இதோ, இந்த இரவில் ஆர்வத்துடன் இதனை எழுதவைத்துவிட்டார்கள். போட்டி அமைப்பாளர்களின் ஆர்வமும் நண்பர்களின் ஊக்குவிப்பும் முடியாததாகத் தோன்றுவதையும் முடித்துக்காட்ட உதவுகின்றன.

கடந்த போட்டிகளில் வெற்றிக்கு அருகில்கூட எனது படைப்புகள் வராமற்போனதை நினைத்து வருந்தியதை இங்கே பகிர்ந்துகொண்டுள்ளேன். உடனே அந்த வருத்தத்தைத் துடைத்துப் போட்டுவிட்டு அடுத்த போட்டிக்கான தலைப்பை ஆவலுடன் எதிர்கொண்டேன். அப்படி எதிர்கொண்டமைக்கு பலன் கிடைத்திருப்பதால் இந்த நிமிடத்தில் எப்படி மகிழ்வேன் என்பதை விளக்கத் தேவையில்லை. எனது மகிழ்வுடன் படைப்பின் பின்னணியை நன்றியறிவிப்போடு சேர்த்து நண்பர்களுடன் பகிர்ந்துகொள்ளலாம் என எண்ணி இந்த மடல்.

நெல்லையிலிருந்து சென்னை - திருவல்லிக்கேணிக்குக் குடிபெயர்ந்த தமிழ் பேசும் இஸ்லாமியர்கள் பலருக்கு குடும்பத்தொழில் கைத்தறி நெசவு. பள்ளிப் பருவத்தில் கொஞ்சம் கைத்தறி நெசவாளர்களின் வாழ்க்கை முறையையும் பார்த்திருப்பதால் அதையே கதைக் களனா அமைத்துக்கொண்டேன். தறிக்காரர்களின் பேச்சு, 1960களில் அவர்களுக்குக் கிடைத்த தினக்கூலி, தறியில் புழங்கும் உபகரணங்களின் பெயர்கள் இவற்றை சென்னைக்குத் தொடர்புகொண்டு உறுதிசெய்துகொண்டேன். 1962 முதல் 1967 வரையில் வெளியான வெற்றிப் படங்களின் பட்டியலை வைத்துக்கொண்டு அவற்றிலிருந்து வருடவாரியாக நான்கைந்து பாடல்களைத் தேர்ந்தெடுத்துக்கொண்டேன். கதைக்களனை உண்மைக்கு வெகு அருகில் அமைக்க இவை உதவின.

அடுத்து கதைமாந்தர்கள்.

ஹயாத் பாய் - கற்பனைப் பாத்திரமல்லர். தாய்வீடு (ரஜினிகாந்த்) படத்தின் சண்டைப் பயிற்சியாளர்.

இஸ்மாயில் பாய் - கற்பனைப் பாத்திரமல்லர். சென்னை சாந்தோம் தேவாலயத்தின் பின்னாலிருக்கும் மாநகராட்சி உடற்பயிற்சிக்கூடத்தின் பொறுப்பாளராக இருந்தவர். உண்மையிலேயே நீலமலைத் திருடனின் சண்டைக் காட்சிகளில் தோன்றியவர்.

லூர்து - கற்பனைப் பாத்திரமல்லர். 'எங்கிருந்தோ வந்தாள்' திரைப்படத்தில் தபேலா வாசிக்கும் கரங்கள் குளோசப் காட்சியில் காட்டப்பட்டிருக்கும். அவை தபேலா மாஸ்டர் லூர்துவின் கரங்கள். மரத்தடி டாட் காமில் எனது ரிகார்டிங் நினைவலைகள் படித்தவர்கள் இந்தப் பெயரைப் படித்திருப்பார்கள்.

கழகமென்னும் ஓடமதை - கதைக்காக எழுதப்பட்ட வரிகளல்ல; தி.மு.க.வின் பிரச்சார பாடகர் (முன்னணிப் பாடகர் கிடையாது) 'ஷண்முகப்பிரியா லோகநாதன்' உண்மையிலேயே 'மீட்டர்' போட்ட வார்த்தைகள் (1977-78).

ஹக் உம்மா, ஹக் வாப்பா - கற்பனைப் பாத்திரங்களல்லர்.

இந்த உண்மையான நபர்களின் நடுவே ஷேக் அலியும் அவனது வாப்பாவும்தான் கற்பனைப் பாத்திரங்கள். லூர்துவை மட்டும் கொஞ்சம் அதிகபட்சமாக (உண்மைக்கு மாற்றமாக) வளர்ந்துவிட்ட ஷேக் அலியுடன் கூடவே இருப்பதாகக் கற்பனை செய்துவிட்டேன்.

இன்னும் ஒரு உண்மை:

லூர்துவிடம் திரைப்பாடல் எழுத வாய்ப்பு கிடைக்குமா எனக் கேட்டதும், அதற்கு லூர்த்து 'எங்கே நிம்மதி' பாடலின் மையக்கருத்தில் இருபது வரிகள் எழுதச் சொன்னதும், பிறகு அதனை நான் தொடராமற்போனதும் உண்மையோ உண்மை (1979-80). அப்போது லூர்துவிடம் என்னை அழைத்துச் சென்ற நண்பர், தமிழ் பேசும் இஸ்லாமிய மக்களின் மத்தியில் இன்று கொஞ்சம் பிரபலமான பாடகர் 'இறையன்பன் அப்துல் குத்தூஸ்'.

போட்டியில் பரிசு கிடைக்காமற்போயிருந்தால் இவை அனைத்தும் நெருங்கிய நண்பர்கள் மட்டுமே அறிந்த விவரங்களாகியிருக்கும். பரிசு கிடைத்ததனால், அனைவருடனும் இதனைப் பகிர்ந்துகொள்கிறேன்.

வாக்களித்த நண்பர்களுக்கும், தேர்ந்தெடுத்த நடுவர்களுக்கும், போட்டியின் அமைப்பாளர்களுக்கும் மீண்டும் ஒருமுறை நன்றியைத் தெரிவித்து இதனை முடிக்கிறேன்.

அன்புடன்
ஆசாத்