தாலிபான் என்னும் தவறு

தாலிபான் என்னும் தவறு

தாலிபான் என்றால் மாணவர் இயக்கம் என்பது போன்ற பொருள்.

தாலிபான்கள் குறித்து நினைக்கும்போதெல்லாம் சில கேள்விகள் எழுவதுண்டு.

தாலிபான்களின் தலையாய பிரச்சனை இஸ்லாத்தை நிலைநாட்டுவதா?

தங்கள் நாட்டிற்குக் கிடைக்கவேண்டிய பல நன்மைகள் இன்னொரு நாட்டின் தலையீட்டால் விலகிப்போவதை அறியாதவர்களாகவே இருக்கின்றார்களா?

தாங்கள் உருவாக்கப்பட்டதில் இன்னொரு நாட்டின் உளவுத்துறைக்கு தலையாய பங்கு இருக்கிறது என்றும் அறியாதவர்களாக இருக்கிறார்களா?

அந்த அளவிற்கு மூளைச் சலவை செய்யப்பட்டிருக்கிறார்களா?

அல்லது இவற்றை மீறிய ஏதோ ஒன்றா?

ஆங்கிலேயர் இந்தியாவை விட்டுச் சென்றபோது அங்கே இங்கே அவர்களிடமிருந்த ஆப்கானின் பகுதிகள் பாகிஸ்தானுக்குக் கிடைத்தன. அதனைத் திரும்பப் பெறுவதற்கு தாலிபான் அமைப்பு முயற்சிகள் செய்திருந்தால் அது பத்திரிகை உலகால் கவனிக்கப்படாமல் இருந்திருக்குமா?

விவரமறிந்த ஆப்கானிகள் சிலருக்கு தாலிபான்களின் மேல் தீராத வெறுப்பு இருக்கிறது. ஒரு தலைமுறையையே கூலிப் போராளிகளாக மாற்றிவிட்டார்கள் என்றும் அவர்கள் சொல்வதுண்டு. ஆப்கானை சில நூற்றாண்டுகள் பின்னால் அழைத்துச் சென்று முன்னேற்றத்தை அழித்ததுதான் தாலிபான் ஆப்கானுக்கெனச் செய்தது.

இவர்களின் இந்த அராஜகத்தின் அடிப்படை என்ன?

எந்த அடிப்படையிலுமே நியாயப்படுத்த முடியாத காட்டுமிராண்டுத்தனமான செயலாக சூர்ய நாராயணாவைக் கொன்றுவிட்டு, ஆப்கனில் இருக்கும் அனைத்து இந்தியர்களுக்கும் சவால் விட்டுக்கொண்டு எதனைச் செய்யத் துடிக்கிறார்கள்.

நண்பர் ஆசிப் மீரானின் வலைப்பதிவில் இருக்கும் பின்னூட்டங்களில் விவாதித்த கருத்துகளின்படி தாலிபான்கள் இந்துக்களைக் கொல்கிறார்களோ இந்தியர்களைக் கொல்கிறார்களோ அது பார்ப்பவரின் கண்ணோட்டப்படி இருக்க, என்னைப் பொறுத்தவரையில் வன்மையாகக் கண்டிக்கப்பட வேண்டிய காட்டுமிராண்டித்தனத்தைத்தான் நிறைவேற்றுகிறார்கள்.

தப்பித்து ஓடியதால் சுட்டுவிட்டதாகவும் பிறகுதான் கழுத்தை அறுத்ததாகவும் ஒரு செய்தி வெளியாகியிருக்கிறது. இது என்ன கழுத்தை அறுத்த மனிதத்தன்மையற்ற செயலை நியாயப்படுத்தி சப்பைக்கட்டு கட்டவா? சுட்டுக் கொன்ற பின் கழுத்தை அறுத்ததாகச் சொல்வதை நம்புதற்கில்லை. ஒருவேளை அப்படி அறுத்திருந்தால் அது மிருகத்தனத்திலும் கேவலமானது.

மறுமை வாழ்வில் எனக்குள்ள நம்பிக்கையின் அடிப்படையில், தாலிபான்கள் செய்திருக்கும் அநியாயங்களுக்கு இந்த உலகில் இல்லையென்றாலும் மறுமை உலகில் தண்டனை கிடைக்காமற்போகாது.

*

பாகிஸ்தானில் செட்டில் ஆகிவிட்ட ஒரு ஆப்கானியிடம் சற்று முன்னர் பேசும்போது கேட்டேன்.

'ஏனய்யா இப்படி நடக்கிறது?'

'சகோதரா! நான் ஐந்தாயிரம் வருடங்களாக ஆப்கானி! ஆயிரத்து நானூறு வருடங்களாக முஸ்லிம்! ஐம்பதாண்டுகளாக பாகிஸ்தானி! நான் இப்போது ஆப்கானியல்லன்! போதுமா!' என்று துவங்கி பதினைந்து நிமிடங்களுக்கு தாலிபான்களைப் பொறிந்து தள்ளிய விஷயங்களை நேரம் கிடைக்கும்போது இன்னொரு பதிவில் எழுதுவேன்.

*

அன்புடன்
ஆசாத்