எழுத்துக்கூடக் கவியரங்கிற்கு எழுதியது

பொன்முட்டை
--------------

மாதமொரு முட்டையிடும் வாத்து நானையா - நல்ல
மஞ்சள்நிறப் பொன்முட்டை திர்ஹம் தானயா
காதவழிப் பாதையிலே தனிமை வெக்கையில் - நான்
கண்பிதுங்கி இட்டமுட்டைக் கதையைச் சொல்லவா

மீசைவரி மேலுதட்டில் காணும் முன்னரே - நானும்
மீனம்பாக்கம் போவதற்கு பெட்டி கட்டினேன்
வீசைவிலை ஆங்கிலமா அரபு உருதுவா - எதுவும்
விளங்காது தமிழ்தவிர முட்டி மோதினேன்

ஏட்டுச்சுரைக் காயெடுத்துக் குழம்பு வைக்கவா - இல்லை
ஏவுகின்ற வேலைசெய்து முட்டை போடவா
வாட்டுகின்ற கேள்வியெந்தன் இடுப்பு ஒடித்தது - அடடா
வளமான முட்டையொன்றை இடமு டிந்தது

வந்தகடன் தீர்ப்பதற்கு இட்ட முட்டைகள் - அங்கே
வாடகைக்கே போதவில்லை அழுகை வந்தது
சொந்தக்கதை சோகக்கதை பழகிப் போனது - எந்த
சோகத்திலும் முட்டையிடும் திறமை வந்தது

அரபுலகா பாரதமா எங்கு காணினும் - யாரும்
இடுவதெலாம் முட்டையன்றி வேறு ஒன்றிலை
இரவுநேர மையிருட்டில் அழுது தீர்ப்பது - அங்கு
இந்தியாவில் கண்டதில்லை இங்கு உள்ளது

இட்டமுட்டை எல்லாமே எங்கு போனது - சுற்றம்
ஈரநெஞ்சப் பாசத்தினால் பங்கு போனது
திட்டமிட்டுப் போட்டதெல்லாம் களவு போனது - யாரோ
தின்றுவிட்ட ஏப்பக்குரல் இங்கு கேட்டது

விட்டகுறை சரியாக்க மீண்டும் கூட்டினில் - நான்
வீழ்ந்துமுட்டை இடுங்கதையை கேட்டல் ஆகுமோ
தொட்டதெல்லாம் பொன்னாகும் பாக்கியத் தினால் - சோற்றுத்
தட்டினிலும் கைவைக்கத் தோற்றல் ஆகுமோ

மாதமொரு முட்டையிடும் வாத்து நானையா - நல்ல
மஞ்சள்நிறப் பொன்முட்டை திர்ஹம் தானயா
காதவழிப் பாதையிலே தனிமை வெக்கையில் - நான்
கண்பிதுங்கி இட்டமுட்டைக் கதையைச் சொல்லவா

*

கவியரங்கில் எனது சார்பில் இதனை வாசித்த நண்பர் ஷாஜஹானுக்கு நன்றிகள்.

*

Comments

சு. க்ருபா ஷங்கர் said…

:-)) :-)) :-))
ஆசாத், இப்படியெல்லாம் எழுதினதைப் படிச்சு ரொம்ப நாளாச்சு.

எழுதும்போது நீங்க உங்க சோகத்தை நெனச்சு எழுதிருக்கலாம், ஆனால் எனக்கு சிரிச்சு சிரிச்சு வயறு வலிக்கிறது. படிச்சுட்டு, Post a Comment link க்ளிக் பண்ணி, இந்த கமென்ட்டை தட்டச்சடிக்கும் வரையிலுமும் சிரித்துக்கொண்டுதான் இருக்கிறேன். குறைஞ்சது Publish Your Comment click பண்ற வரைக்குமாவது இந்த சிரிப்பு அடங்காது போலருக்கு. பின்னிட்டீங்க பின்னி.

இது மாதிரி இன்னும் நிறைய எழுதிப்போடுங்க. தமிழிணையம் சுத்தமாகும். :-)

12:12 AM