மொஹலே ஆஜம்

மொஹலே ஆஜம்


தீபாவளி வெளியீடு இந்திப் படங்களில், 'எத்தராஸ்' பிரியங்கா சோப்ராவுக்கும், 'வீர் - ஸாரா' ப்ரீத்தி ஜிந்தாவுக்கும் போட்டியாக மதுபாலா நிற்கிறார் என்பதில் உண்மையும் இல்லாமலில்லை.


ஆயிரத்துத் தொள்ளாயிரத்து அறுபதில் வெளியான கே. ஆசி·பின் மொஹலே ஆஜம் மீண்டும் திரையிடப்படுகிறது. ப்யார் கியாத்தோ டர்னா க்யா பாடல் மட்டும் வண்ணத்தில் படம் பிடிக்கப்பட்டு மற்றதெல்லாம் கருப்பு வெள்ளையில் இருந்ததை மாற்றி, அனைத்தையும் வண்ணமயமாக்கி வெளியிடுகிறார்கள். அன்றைக்கு ஒன்றரை கோடி ரூபாய்கள் பொருட்செலவில் எடுக்கப்பட்ட திரைப்படம்.


மொஹலே ஆஜம் பார்த்த பின்னர், அதுவே நான் பார்த்த இந்திப் படங்களில் மிகவும் நேர்த்தியானது என்று சொல்லத் தயங்குவதில்லை. ஆரம்பக் காட்சியில் "ஜலாலுத்தீன் மொஹம்மத் அக்பர்" என்று முழங்கும் சிம்மக் குரலிலிருந்து, கடைசிக் காட்சியில் "ஜில்லே இலாஹி! ஜில்லே இலாஹி" எனப் பரபரக்கும் கிழவியின் குரல் வரையில் ஒவ்வொரு காட்சியாக பல நேரங்களில் அசை போட்டதுண்டு.


சலீம், பிள்ளைப் பிராயத்திலேயே ராணி ஜோத்பாயைப் பிரிந்து போர்ப்பயிற்சிக்கும் தொடர்ந்து போர்க்களத்திற்கும் சென்றுவிடுகிறான். போரில் வென்று அந்தப்புரத்திற்கு ராணியைப் பார்க்க வருகிறான். ராணி, கண்களை மூடிக்கொண்டு அவனது முகத்தில்தான் விழிப்பேன் என்று இருக்க, அவன் சிறுபிள்ளையாக இருந்தபோது இருந்த உயரத்தில் முகத்தை வைத்துக்கொண்டு, "சலீம்! வந்து விட்டாயா என் மகனே" என விழிகளைத் திறக்கிறார். மகனின் உயரத்தைக் கண்டு வியந்து, "மகனே வளர்ந்துவிட்டாயடா".. பலமுறை இந்தக் காட்சியைப் பார்த்து ரசித்திருக்கிறேன்.


அக்பராக பிரித்விராஜ் கபூரின் கம்பீரம், "ஜோ ஹம் கஹ்தேன் ஹை, வஹ் கானூன் ஹோத்தா ஹை" (நான் என்ன சொல்கிறேனோ அதுவே சட்டம்) என்ன குரல், என்ன கம்பீரம்.


திலிப் குமார் இந்தப் படம் முழுக்க ஒருவிதமான கோபத்தையும் முரட்டுத்தனத்தையும் முகத்தில் வைத்திருப்பார். காதல் காட்சிகளில் கூட அந்த முகத்திலிருந்து கோபத்தை மாற்றாமல் இருப்பதை அந்தக் காலத்தில் மக்கள் ரசித்திருக்கவேண்டும். "ஷிவா ஜீ மார்சி இவன் வர் ஆள்தாண்டா" (சிவாஜி போல நடிப்பில் இவர் ஒருவர்தான்) என்று படம் பார்த்தபோது அருகிலிருந்த உருதுப் பெரியவர் சொன்னது பசுமையாக நினைவில் இருக்கிறது.


இரவு நேரத்தில் தான்சேன் பாடும்போதுதான் அக்பர் தன்னைமறந்து இசையில் மூழ்கியிருப்பார். அதுவே தாங்கள் சந்திக்க சரியான நேரம் என்பதால் சலீமும் அனார்கலியும் சந்திக்கும் காட்சிகளில், பின்னணியில் தான்சேனின் குரலாக படேகுலாம் அலி கான் பாட, இன்றைக்கு திரையில் காணப்படும் 'நெருக்கம்' இல்லாமலே சிருங்காரத்தைக் காட்டிய காட்சி.


கலி = மலர், அனார் = மாதுளம், அனார்கலி = மாதுளம்பூ.


சலீமிற்கும் அனார்கலிக்கும் இருக்கும் நெருக்கத்தை, சலீமை மணமுடிக்கவிருக்கும் 'பஹார்' அரண்மனையில் சொல்லும்போது, "இப்போதெல்லாம் மாதுளம்பூக்கள் அந்தப்புரத்தில் அதிகமாகப் பூத்துக் குலுங்குகின்றனவே". எதிரான (நெகடிவ்) கதாபாத்திரத்தில், திமிர் தலைக்கேறியபடியான பாத்திரத்தில் நடித்திருக்கும் ஷஷிகலாவை என்ன சொல்வது!


ப்யார் கியாத்தோ டர்னா க்யா பாடலுக்காகப் போடப்பட்ட அரங்கம் நீண்ட நாள்களாக பொருட்காட்சியைப் போல மக்கள் வந்து பார்த்துப் போனதாக இருந்ததாம்.


"சுப்னா சக்கேகா இஷ்க் ஹமாரா சாரோன் தர·ப் ஹை உன்கா நஸாரா" என்னும் வரிகளில், மதுபாலா (அனார்கலி) சுழல்வது க்ரா·பிக்ஸ் சமாச்சாரங்கள் இல்லாமல் சின்னச்சின்னக் கண்ணாடிகளில் பிரித்வி ராஜ்கபூரின் (அக்பர்) அருகிலும் தலைக்கு மேலும் பிரதிபலித்தது பேசப்பட்ட ஒளிப்பதிவாம். (இக் காட்சியைப் படமாக்கியவர் ஒளிப்பதிவாளர் அல்லாமல், இயக்குனர் கே.ஆசி·பே என்பது கூடுதல் வதந்தி)


ப்யார் கியா தோ டர்னா க்யா என்னும் அந்தப் பாடலை அதே வர்ண மெட்டிற்கு வார்த்தைகள் வருகின்றவகையில் மொழிமாற்றம் செய்தேன். இதே படத்தில் இடம்பெற்ற இன்னொரு பாடலான 'தேரி மெஹ்·பில்மே கிஸ்மத்தே ஆஸ்மாக்கர் ஹம் பி தேக்கேங்கே' என்னும் பாடலின் மொழிபெயர்ப்பும் அதனைச் சார்ந்த கட்டுரையும் ராயர் காப்பி க்ளப், மரத்தடி, இரண்டிலும் இருக்கின்றது. மரத்தடி டாட் காமும் அந்த மொழி மாற்றத்தையும் கட்டுரையையும் வலையேற்றி கவுரவித்தது.


*
பாடல்:
ப்யார் கியாத்தோ டர்னா க்யா
கவிஞர்: ஷகீல் பதாயுனி
இசை: நவ்ஷாத்


பாடல்
காதல் கொண்டேன் அஞ்சிடுவேனோ!
காதல் கொண்டேன் அஞ்சிடுவேனோ!
காதல் கொள்வ(து) ஒன்றும் குற்றமில்லையே - வாழ்விலே!
காதல் கொள்வதொன்றும் குற்றமில்லையே
அச்சம் கொண்டே கெஞ்சிடுவேனோ!
காதல் கொண்டேன் அஞ்சிடுவேனோ!


எந்தன் நெஞ்சிலே இன்பத்தின் கோவை
என்னைக் கொல்லுமோ ஊரார் பார்வை
மாந்தர் இறப்பது மண்ணில் புதிதா
மனம் நடுங்கிடும் வஞ்சியும் நானோ!
காதல் கொண்டேன் அஞ்சிடுவேனோ!


மன்னன் நினைவு மனத்துள் விரியும்
மங்காத் தீபம் அரங்கில் எரியும்
காதலில் வாழ்வேன்! காதலில் வீழ்வேன்!
கவலை கொண்டே துஞ்சிடுவேனோ!
காதல் கொண்டேன் அஞ்சிடுவேனோ!


கொண்ட கனவை மூடுதற்கில்லை
கொற்றவன் ஒற்றில் நாற்புற எல்லை!
ஆண்டவன் அறியாக் காதலும் உண்டோ
மானிடர் அறிய மருள்வவது(ம்) ஏனோ!
காதல் கொண்டேன் அஞ்சிடுவேனோ!


*


அன்புடன்
ஆசாத்